Désiré Malet

Li pice-crosse èt si murwau

Télemint tchin di sès caurs : to n’auros nin dja l’èwe ki kû sès oûs, Françwès n’èst nin gaiye : todi miersêu : si feume enn’a yu s’sô èt pètè èvoye, i n’veut pus sès èfants ; à fwace dol’ véye vlu vikè sul’ pouf, minme lès soçons lî tournèt l’dos.
I s’anoye èt somadji, i n’èst nin kome al’ dicauce bin sûr !
Kan minme, on djoû, one vî conuchance passe li soû d’l’uche. C’èst’one home ki veut clére : do cô, il a sintu çou ki tournéve mau ol’cassine .
I mosture li finièsse : « kwè vèyév’ yute di vos caraus ? » dis’ti.
« One voléye di djins di totes les sôtes : dès djonnes èt dès vîs, dès feumes, dès èfants soriants, bramin do trayin, do rmouwe-mènadge ! »
« Et dins vosse murwau kwè vèyéve ? » I respond : « on grigneû vî home tot seû, avou one laide mawe, maurivnant, nin amichtauve po on cèn’.”
L’ôte responda “ waît ! Li murwaut èt l’finièsse ont stî portant faît do minme vère, li sêule difèrince, c’èst li coûtche d’ârdjint padrî li vère di vos’murwaut !!! »
D. Malet (inspirè d’on sicrîjeû è francès . . .)

Dès omes èt dès Diès

Avez’v vèyu ci film là ? C’èstone istware k’èst’arivéye à Thibirine ès l’Algériye. Dès trapisses français y ont stî stornès.

Vêci à Rotchoirt nos avans ossi one abbiye dès trapisses èt li Pére Abbé a vnu al’séyance èt pu responde aux dgins ki vlinne lî cauzè.

Faut dire ki lès trapisses vèci èl Belgike sont knochus prèmîremint po lès bîres ki bressenu. Vêla, po vikè èt dinnè aus zè dgins i fiyèt créche dès légumes èt dès hiebes po soladgi lès maus, fèt dol’ laume , enzd. . Onke di zels, li Frére Luc èst docteûr èt sogne lès malaudes.

Picote à migote fêt leu trau dins li viladge èt yesse bin veyu dès dgins do payis, çou ki n’èst nin do gout dès estrémisses muzulmans ni co dès maîsses politikes algériyens

Dins on prèmî timps, tortos, ossi bin lès estrémisses ki lès politicyiens sayèt do lès trakèt foû do payis èt lès man’cèt di totes lès maniéres ; zels i z’ont peû bien entendu, portant i dècidèt do dmorè èt leus cassines après enn’avère bramin dvizè int’zels.

On nute, wère di timps après l’Noyè, dès dgins – on n’sé nin kî, lès ont vnu hapè sins doûceur, on lès vèt co rotès lontimps ol’nîve dins l’sipèsse brume di montagne èt pu : pu rin !!! . . . !

Onn ’ritrouverèt leus cwarps tot misbridgès ki bin pu taurd, èt à l’eûre d’a nutte , maugrè lès enkètes on ni sé nin pa kî i s’ont stî pris. . . .

Lès cis k’ont wêti li film on s’t’ atauchè li Pére Abbé avou totes sôtes di kestions : -Pokwè lès mwinnes ont dmorè su plèce dins l’dandgî. . . ? Pokwè èstinn’t’i là …. ?

Ess’ki lès Trapisses si sintnnu lès minmes èl Belgike ki vêla ?

Bramin dès kestions èt lès response da Dom Gilbert ont sî.

Fwart kichoyus, noz’estins binauches do rvèye lès imaudges, èt co d’pu di comprinde lès pondants èt lès djondants di st’afère là.

Pådje Wiki sol fime :

http://wa.wikipedia.org/wiki/Des_omes_et_des_di%C3%A8s_%28fime%29

Fåt i fé awè peu les efants avou les crocmitinnes ?

Is-ont fêt awè li pèpète à bramint dès èfants nawère : on lès lume : li spètimps, Pépé crochet, Marie Sacatrape, lès rodjes bonèts . . .
Nos parints avinn’t-i rêzon, avinn’t-i twârt do lès pratikè ???

Faut-i co s’è siervu ? Ayi, Ayi !!!

Riconuchant ki, dou k’ i gna on-èfant k’a stî chapè do toumè o pous’ , si pa èyèt s’ moman ont bin fêt do lî aveur fêt sogne dès rodjes bonèts. Si one bauchèle ni s’a nin lèyi atauchè pa on mau toûrnè, grâce (merci) aux cis ki lî ont causè do spètimps !
Si l’ pitit arnauche n’a nin tchèyu dins l’trô dol grote, aurait-i yu peû di Mariye Sacatrape ?

Faut-i lès atèrè, tos cès lêds mvèts là ? Ayi, Ayi !!!

Avou totes cès crakes là, on lz’î aprind lès mintes, on kmince pa Père Fouetard, pu lès rodjes bonèts èt tos lès ôtes, totes sôtes di mwais contes à tél pwint k’ i gn a brâmint ki kand is-ont crèchu, k’ont peû do nwar, ou do moussi o bwès. Is tronnèt au mwins’ dès bruts oudobin do rescontrè dès djins ki n’ conuchèt nin.

On-z a télemint causè dès pédofiles (pa dès côp avou rêzon) ki dès èfants s’ dimèfièt minme d’one djin k’olzî fêt tot jusse one pitite clignète.

Po fini, lès parints pudront çou k’èst raizonâbe, tuzant à l’âdge di leu raupin po lzî minti èt pus po s’disminti. Dji va vos contè one sakwè di m’ vicadje po vos acertinè ki lès peus d’on’ èfant dimorèt ol tiesse brâmint pus lontimps k’on pinse.

Prèmîre sinne, en 44 au rcwè dins nost abri : Volà on’officîr alemand ki broke èt nos manncè avou deus pistolets to bwêrlant : « SCHNAPS !! » (I vlot à beure adon k’ il estot dja fin sô, i n’ plantot pus !) . Nosse pére parvint à l’ rapauji èt l’èvoyè dou k’ i gn a dol gote swè-dijant. . . (Lès Amerikins î astinn’) On n’ l’ a pus rvèyu !

Deuzinme sinne : è l’Espagne è 1962. Dîj-ût ans après, dins nost otel, on-ome bin gây (guêy ?), binauche di s’djôurnée, i nos atauche tot soriant, on vère ol mwin èt lachè : amichtauve : « SCHNAPS ??? »

Bardaf !! ké côp d’ bordon !! Tot bâbaud, dji blanki ,dji paume causu : l’ome ni comprind nin dpus k’ mi, il erva si dmandant kwè.

----
po on "dvwer" al sicole di walon d' Bive, li 15 d' octôbe 2011.