Li walon d\'èmon nos-ôtes
Vous souhaitez réagir à ce message ? Créez un compte en quelques clics ou connectez-vous pour continuer.
Li walon d\'èmon nos-ôtes

forum pou lès dgins qui vwèyenu voltî leu lin.we
 
AccueilPortailRechercherDernières imagesS'enregistrerConnexion
Le Deal du moment :
TCL C74 Series 55C743 – TV 55” 4K QLED 144 ...
Voir le deal
499 €

 

 Richard Joelants

Aller en bas 
AuteurMessage
lucyin




Masculin Nombre de messages : 646
Age : 70
Localisation : Sidi Smayl Marok
Date d'inscription : 01/08/2006

Richard Joelants Empty
MessageSujet: Richard Joelants   Richard Joelants Icon_minitimeJeu 28 Nov - 3:11

Lès deûs houyeûs

Lès deûs-omes rotît sol trotwér tot drènés. A l’alûre qu’i-z-avît, i n’aveût nole dotance possibe……c’èsteût dès houyeûs !
I crohît l’walon come on n’èl fêt pus po l’djoû d’oûy èt pôr qu’i djåsît d’feumes, on-î aléve nin po li dzos dè cwî !
Li pus grand foumîve li pîpe qu’i rèsprindéve qwand i faléve : « Rin d’tél qui l’Lamâtche » dihève-t-i à l’ôte, « li Lamâtche 13, il èst pus tène ».
« C’èst vrèy » rèspondéve-t-i l’ôte qui racontéve qu’aveût todi pus malåhèye dè t’ni l’côp tote ine pwèzêye sins hètchî on côp !
C’èsteût vrèy ossu qu’ine fèye lavé èt r’moussî, li prumîr-ovrèdje c’èsteût dè stamper ‘ne bone pîpe ca di ç’timps la, l’cigarète n’èsteût bone qui po lès blanc-bètch’ où po lès flaminds.
I djåsît pôr tot ‘nn’è riyant tot s’tapant so lès gros d’djambes, d’ine hèrtcheûse, li fèye d’à Djhan Cotchèt, qu’s-aveût lèyî rafûler treûs côps d’ènnè rote èl vîle vonne podrî l’réserve d’avône po lès djvås……èt qu’on l’oyéve brêre treûs vôyes pus long èt deûs-astèdjes pus hôt èt pus bas !!!
Lès deûs-omes si loumî Pol Cwèpî èt Djhan Grindôr. Vint-ans……vint-ans qu’èstît èssonne è l’èkipe d’à Tchårlî : vint-ans po k’mincî å Gosson 2, après å Horloz……turtos passés al vonne !
Å Gosson, wice qui l’poussîre ni spågnîve nolu, li poussîre èt l’gåz ; i faléve tini l’oûy sins låker on seûl moumint.
Après, å Horloz, wice qu’on flatch’téve è l’èwe d’å matin diqu’à deûs-eûres, qu’on n’apiçive lès pîds tot bleû à fwèce d’ovrer à pîd d’hås !
Asteûre lès deûs-omes prindît l’vôye d’amon Lîbèrt……amon Lîbèrt valèt, wice qu’on vûdîve li pus clapant dès pèkèts èt wice qui lès plats-coû èstît plin disqu’à ras-bwérd. Amon Lîbèrt ossi wice qu’on-aveût l’pacyince dè ratinde li Sainte-Touche po v’fé vosse compte !
Åd’divant d’mon Alberty, li toûbakî, Cwèpî moussa è botike, l’ôte, Grindôr ala s’assîre on pô pus long, al pîre dè nêgue.
Å moumint qu’Cwèpî sôrta foû dè botike, il î prinda ine toss’rèye qui måqua dèl fé sèfoker !Li rodje lî èsprinda tos l’visèdje et sès rins n’arèstît nin dè monter pwis dè rid’hinde al dihûtinme arèdje. Po fini, i rètcha sol trotwér, cåzî so sès solés ! On rètchå tot neûr, avou on filèt d’song è mitan èt dèl same tot åtoû.
On bokèt di s’cwér mahî avou on bokèt dè beûre!
Dj’ènn’a co vèyou après tot plins d’cès rètchås d’houyeûs…mins cila, dji n’l-a måy polou roûvî.
Cinq saminnes après, Djhan Cwèpî d’hindéve li « Bordelais », li rowe Chif d’ôr èt prindéve li row e di l’ête……inte di qwate plantches.

R.Joelants    15/12/07

Serè epaidî e rfondou e l' Rantoele 68.
Revenir en haut Aller en bas
http://aberteke.org
lucyin




Masculin Nombre de messages : 646
Age : 70
Localisation : Sidi Smayl Marok
Date d'inscription : 01/08/2006

Richard Joelants Empty
MessageSujet: Re: Richard Joelants   Richard Joelants Icon_minitimeJeu 29 Mai - 3:35

Cwatlins Omer do Toetlî

Al-Khayyam, mathématicien, astronome, philosophe, poète persan, auteur des célèbres Ruba'iyat. Mètou è walon ( 6 meûs d'ovrèdje) po nn'in passer houte dèl seûle vrèy! Come dji v's-èl di binamèye Louline.

Quatrain N°41
------------------
Li bin èt l'mâ qui s'trovèt èl natûre ûmin.ne
Li boneûr èt l'mâleûr qui l'dèstinêye nos wâde,
Ni dis nin qu'c'èst dèl fâte dè cîr, pace qui l'sûtisté dè cîr
A lès brès' mèye fèyes pus loyîs qu'lès tonk.

Quatrain N° 40
--------------------
Dji n'sé si l'ci qui façona mi-èsse
M'a wårdé 'ne dimeûre ou d'vins l'abominåbe infér;
Mins on pô d'amagnî, ine adorêye èt dè vin so l'vète hourèye d'ine plin.ne
Coula c'èst dès çanses...Wåde por twè l'cîr à quî ti fès crédit!

Quatrain N° 39
-------------------
Li vin c'è-st-on djowion liquide, èt l'coupe ènnè l'houyîre,
Li coupe èst l'cwérps èt l'vin l'åme:
Li coupe di crustal wice qui l'vin rèye
E-st-ine låme la qu'èst catchî li song' dè coûr.
Quatrain N° 38
-------------------
Dji beû dè vin, èt on m'dit, à dreûte èt à hintche;
"Ni beûs nin dè vin, c'èst l'in'mi dèl rilijion!"
Cwand dj'a savou qui l'vin èsteût l'in'mi dèl rilijion,
Dj'a di:" Par Allah! lèyîz m'beûre si song, c'è-st-in ake di dévôcion".

Quatrain N° 37
-------------------
Done-mu dè vin, médî di m'coûr blèssî
Bon k'pagnon dès cis qui l'amoûr a nåhi;
Mi èsprit inme mî l'sôl'rèye èt sès mintes
Qui l'vôsseûre dès cîrs, fond dè cråne dè monde.

Quatrain N° 36
-------------------
Beû dè vin...C'èst lu l'vèye éternéle.
C'èst l'trézôr qui t'as d'manou dès djoûs di t'djônèsse
Li såhon dès rôses èt dè vin, èt dès k'pagnons sôs!
Seûy ureûs on moumint, ci moumint c'èst l'vèye.

Quatrain N° 35
--------------------
Beû dè vin, ca ti dwèm'rès lontins d'zos l'årzèye
Sins 'ne kinohance, ine amice, on camaråde, ine feûme;
Louke à n'djamåy dîre ci scrèt à nolu;
Lès tulipas fanés ni r'florih'ront djamåy.

Quatrain N° 34
-------------------
On dit qui l'djårdin d'Eden èstchante lès houris;
Dji di qui l'djus dèl troke èst seûl sawoureûs
I fåt t'ènnè-t-ni ås çanses fêt-à fêt' èt r'nonçî à gågne promètou;
Ca l'brut dès tabeûrs, fré, n'èst bê qui di d'lon.

Quatrain N° 33
--------------------
Dji n'a sondjî dè cîr qui come d'ine plèce di r'pwès,
Ca, dj'a tant tchoulé qui dji n'veû qu'à pon.ne;
L'infér n'èst qu'ine blawète à costé di çou qu'a èduré mi åme
Et dji n'creû å Paradis qui qwand dji gostèye on moumint d'påye.

uatrain N° 32
-------------------
A prétins, so l'bwérd d'on fleûve ou so l'çi d'on tchamp,
Avou quéques camarådes èt 'ne crapôde bèle come ine houri;
Apwèrtez l'coupe...lès cis qu'buvèt l'bwèsson d'å matin
N'ont nou compte à rinde al mosquèye èt sont libes dèl sinagogue.

Quatrain N° 31
-------------------
Tot å k'mincemint a stu scrît çou qui sèrè
Sins r'la li pène sicrèye, sins toûrmints ni dè bin, ni dè må.
Li prumî djoû, Elle a noté çou qui sèrè
Nos mås èt nos-èhins sont-st-al vûde.

Quatrain N° 30
-------------------
Li mistére deût d'mani vwèlé ås bas-èsprits
Et lès s'crèts impossibes à sêzi po lès sots.
Tûse à çou qu'ti fês båbe à båbe dès-ôtès djins;
I fåt catchî nos-èspwérs à tote l'ûmånité.

Quatrain N° 29
--------------------
Nolu n'pout passer po-drî l'teûle qui catche l'advina;
Nou cèrvê ni sét çou qui vike po d-zos lès simblants.
Såve å coûr dèl tére, nos-èstans sins lodjis'...
Beû dè vin.....Sés's qu'a d'téls mèssèdjes i n'a nole fin?

Quatrain N° 28
-------------------
Mi coûr mi dit "Dj'a l'bolant d'zîr d'ine siyince inspirêye;
Acsègne-mu, si t'ènnès capåbe".
Dji di l'Alif*; mi coûr riprind " Ennè dis nin d'pus
Si l'onk è-st-èl mohone, c'è-st-assez d'ine lète."
* Alif: prûmîre lète di l'alfabèt, qui done à étinde à l'divine unité.
" Li çi qui k'noh' li onk, kinohe tot" ( Hafiz)

Quatrain N°25
-----------------
Si, d'vins l'såhon dè prétins, ine saquî qui rèssonle ine houri
Mi vûde, sol vète hourèye d'on tchamp, ine timbale plinte di vin,
Bin qu'couchal pôreût à turtos sonler råre:
On tchin våt mî qu'mi si dji d'bitèye adon li no dè cîr.

Quatrain N°20
------------------
Come l'êwe dè fleûve ou bin l'vint dè dézèrt,
On novê djoû s'såve di m'vicårèye...
Li pon.ne n'a måy fêt lanwi m'pinsêye, à propos di deûs djoûs:
Li çi qui n'èst nin co, li ci qu'èst passé.

Quatrain N°17
------------------
Li prétins doûçemint évinte li vizèdje dèl rôse;
Et l'åbion dè cot'hê, come on vizèdje qu'on inme èst doûs!
Rin di çou qu'ti poûs dîre dè passé ni m'èstchante;
Seûye ureûs d'oûy, ni djåse nin d'îr.
Revenir en haut Aller en bas
http://aberteke.org
lucyin




Masculin Nombre de messages : 646
Age : 70
Localisation : Sidi Smayl Marok
Date d'inscription : 01/08/2006

Richard Joelants Empty
MessageSujet: Re: Richard Joelants   Richard Joelants Icon_minitimeMer 21 Jan - 13:37

Payîs d'Tîleû.

Si pout tchanter so l'êr "Le plat pays" de J.Brel
-----------------
Sins voleûr fé 'ne saqwè qu'a dèdja fêt j'grand Djåkes
Sûremint qui po çoula i fåreût on miråke
Fåt portant bin qu'ça stitche dè fî fond di cwirasse
Qui dji m'disgadje li coûr sins fé dès friston-frasses
Tot v'djåzant di m'viyèdje, vîle patrèye dès houyîres
Avou l'måle èr di l'èsse qui fêt brère totes lès pîres
Dè vîs payîs d'onk di Tîleû.

Sèpant bin qui m'comeûne n'èst nin payîs d'cocagne
Qu'on î beût dè pèkêt pus vite qui dè tchampagne
La wice qui dès neûrs diâles rimontèt foû d'leû têye
Vûdîs d'vou trimé catwaze-eûres d'afilêye
Et pwis djoûs après djoûs fîrs di totes leûs souweûrs
Avou lès grands vints d'plève po bin'nler leûs broûleûres
Dè vî payîs d'onk di Tîleû

Avou tant dès nûlèyes qu'ine rouwale s'a pièrdou
Avou tant dès poussîres qui l'cîr ènnè forbou
Et pwis tant dès foumîres qu'on n'wèze pus lès houmer
Qu'lès cwèrbås pwèrtèt l'doû tot sayant dè vaner
Avou l'neûre bihe di Mås' dès hôteûrs di Tchèrate
Avou l'neûre bîhe di Mås' qui s'vint hiyî è cwate
So l'vîs payîs d'onk di Tîleû

Avou come dè midi qui hant'reût Djus-d'la Moûse
Cwand l'solo båhe li fleûve qui landjinèye si coûsse
Cwand lès hinêyes vinèt rabrèssî Bôrdelê
Qui lès suçås s'drovèt, qu'lès-oûhês lès bètchtèt
Cwand l'tchôd vint nos fé rîre èt qu'il èst bin lèvé
Adon qu'po fé plêzîr i s'rimète à tchanter
Li vîs payîs d'onk di Tîleû.

Tileû, mi tot p'tit viyèdje, come dji v's-inme.

Richard Joelants.
Revenir en haut Aller en bas
http://aberteke.org
lucyin




Masculin Nombre de messages : 646
Age : 70
Localisation : Sidi Smayl Marok
Date d'inscription : 01/08/2006

Richard Joelants Empty
MessageSujet: Re: Richard Joelants   Richard Joelants Icon_minitimeMer 21 Jan - 13:38

Vochal ine pitite saqwè qui m'fêt dîre: "Di wice èstez-v' vos?" dji n'pou m'èspètchi dè responde:"di Tîleû", mâgré qui vola 50 ans qui dji d'mane à Sèrè.

Tîleû
-------
Cwand dj'a qwité nosse bon viyèdje, dji n'féve qui dè candjî d'halèdje,
ça n'mi rindéve nin anoyeû, Tîleû
Dji n'âreû mây polou tûzer, qui vos-alîz insi m'mâquer,
à l'atake dji féve li brâcleû, Tîleû
Qwand on-a on pô pus d'vint-ans, on screût fwért malin èt portant,
li vèye fêt sès comptes lèye ossi, tot va-st-insi.
 
Ca çi n'èst nin mâquer d'corèdje, di ric'nohe qu'â coûr dès picèdjes,
vis prindèt come on colèbeû, Tîleû
E l'iviér si conter l'osté, bin sovint s'rat'ni dè tchoûler,
pace qu'è s'pon.ne on-èst tot fî seû, Tîleû
Porçûre si vôye tot lanwihant, adon qu'on n'pout pus fé l'èfant,
si mète èl tièsse qu'on-a tchûzi, l'mèyeû pârti
 
Si disfinde dè miner l'arèdje, sofler lès nûlèyes di l'orèdje,
come twè si mostrer corèdjeû, Tîleû
Sognî sès pon.nes, èlzès bin.nler, po qu'èle s'arèstèsse dè son.ner,
tofér si mostrer bon djouweû, avou Tîleû
Ritrover d'l'èspwér tot s'dihant, qu'i vât mî d'tchèrî èn-avant,
Ca n'chève pôr à rin d's-alanwi, ça fêt sofri
 
Asteûre qwand dji r'vin so m'halèdje, èt qui dj'î r'trouve mi bon viyèdje
dji n'arive pus à-t-èsse ureûs, Tîleû
Dji n'sâye minme pus di t'candôzer, n'a 'ne saqwè è m'coûr qu'èst boqué
dji n'a pus rin d'in-amoureû, Tîleû
C'èst vrèy qui dji n'a pus vint-ans, èt qu'Moûse à passé tot corant,
Avou lèye, c'èst vrèy qui dj'a pri,cinq creûs ossi
Adon dji passe sins m'arèster, nolu n'pout pus m'î ricfwèrter,
Pôr qu'asteûre vos n'èstez pus la....Papa.
 
 Richard Joelants
 
A mon Père,
Revenir en haut Aller en bas
http://aberteke.org
lucyin




Masculin Nombre de messages : 646
Age : 70
Localisation : Sidi Smayl Marok
Date d'inscription : 01/08/2006

Richard Joelants Empty
MessageSujet: Re: Richard Joelants   Richard Joelants Icon_minitimeDim 19 Fév - 14:41

Di c'timps là,

Mi p'tit fi qu'èst portant bin binamé n'a qu'on défôt; c'è-st-on foû malâhèye po magnî. I n'èst sûr nin tot seû m'dîréve èt c'èst vrèye qui d'vins l'vwèzinèdje dj'ô fwért sovint lès parints èt lès vîs parints di tos cès djônês là s'plinde di çou qu'on lome ine plâye ou bin d'trop di gâterèyes. C'èst vrèye ca chaque fèye qui l'grand vint magnî èl mohone, mi k'pagnèye si grète li copète di s'tièsse po lî trover 'ne saqwè à s'gos'.
Lès timps ont bin candjî....dji m'sovin d'ine swèrèye walone dè timps d'guére al mohone dè peûpe di Tîleû wice qui, so vosse bilèt i n'avaût on numèrô qui d'néve dreût al tombola qu'on sètchîve à l'antrake. Li prumî pris c'èsteût on blanc pan èt l'deuzin.me, ine botèye di vin. Mi vîle Mame qui m'aclèvéve èt qui m'sètchîve tot avâ à s'cou d'héve todi:" Dji n'a nole tchance, dji n'gangn'rè mây". Portant on sèm'di, c'èst bin s'numèro qu'on brèya l'prumî. Tote tronlante , èle mi d'ha:" alez-î m'fi v's-avez dès mèyeusès djambes qui mi". Dji m'veû co griper so li scanfôr po r'çûre li pan qui sintéve si bon èt rid'hinde come si n's-avîz gangnî l'milion.
Nos n'avans nin loukî l'deuzin.me pârtèye dè spèctâke po rintrer pus rade èl coulèye,fîrs dè poleûr rapwèrter à m'Mame èt à m'Papa li pan qui d'véve fé nos apwèrter on moumint d'boneûr divins ces timps si deûrs po lès p'titès djins.
Dji veû co m'Mame côper l'pan.Elle féve dès trintches ossi fènes qu'ine fouye di gazète, avou dè sayin al copète....mum....qué magn'hon mès djins! On s'ralètchîve lès deûts.
Li pan vika treûs djoûs, mins çou qui fêt fruzi co po l'djoû d'oûy, c'èst qui m'pôve Papa s'continta dè rassonler di s'mègue main lès miyètes à chaque fèye qu'on côpéve ine trintche...C'èst tot çou qu'il ava dè pan, portant treûs samin.nes pus târd Florant Vannitsen li martchand d'crompîres l'èminéve so s'camion à Sinte Rosaliye wice qu'on d'véve li côper djus on bokèt di stoumac.Onze djoûs pus târd i r'prindéve l'ovrèdje à Chimeuse, ployî è deûs come on tot vî ome.
C'èst po çoula, mâgré lès côps d'oûy di r'proches di m'feume, qwand l'gand rouspète so l'amagnî, dji n'pou m'èspètchî dè dîre tot hôt:" I v'fâreût 'ne bone guère mi fi". A chaque fèye , li grand r'lîve li tièsse tot m'dihant:" ça va grand pére, dji m'va fé 'ne fwèce", èt s'vîle Mame di lî dîre ossi vite:" Ni v'rindez nin malâde mi fi".
Portant, çoula n'si paséve nin insi di c'timps là!
 
Richard Joelants   06/02/2017

(serè eplaideye e rfondou dins l' Rantoele 81)
Revenir en haut Aller en bas
http://aberteke.org
lucyin




Masculin Nombre de messages : 646
Age : 70
Localisation : Sidi Smayl Marok
Date d'inscription : 01/08/2006

Richard Joelants Empty
MessageSujet: Re: Richard Joelants   Richard Joelants Icon_minitimeMer 16 Aoû - 4:01

Vîlès sov'nances
-----------------------
C'èsteût dè timps dès "robots".On aveût l'âbitude avou lès bonbardemints dè cori à l'abri ossi rate qu'on poléve.
Ci nut' la ènnè touma 3 ou 4 dè costé d'Ougrêye èt d'kinkempwès ossi, bin qu'nos avîs pris l'dècision dè d'mani èl câve, mi Papa nos d'hat:" C'côp chal mès -èfants i nos fârèt bin riprinde li vôye di l'abri. Tot apiçant al vole quéques cof'teûs po s'ristchâfer la wice qui n'féve nin solo nos vola èvôye tot corant prindant l'rowe lêrèsse, dèl cité et d'zos lès vègnes po r'djonde l'abri d'Chimeuse qu'èsteût d'fwért long li pus sûr disconte lès bombes èt lès robots.
Come nos-arivîs â pîd d'l-ovrèdje, divant nos-ôtes si dispètchît come î polît ine pitite feume avou sès qwate èfants. Vos v'dotez bin qui l'feume aveût totes lès pon.nes dè monde a fé avanci s'trûlèye. A l'copète dèl pinte qui minéve à l'abri, li rèsponsâbe brèya:" Et vos la nosse dame dispètchîz-v' on pô avou tos vos djônes, mi dji deû sèrer l'pwète.
Dj'oya-st-ossi to passant divant l'ome di l'abri li feume qui lî brèya tote d'soflèye:" Dihez mâhonteû, c'èst lès robètes qu'ont dès djônes".
Cisse-lale, mâgré qui dji n'aveû qu'7 ans, dji n'la mâye roûvî...."c'èst lès robètes qu'on dès djônes..., c'èsteût 'ne tote bèle rèplique èt l'rèsponsâbe ni trova rin à risponde.
Mi, après tant d'an.nêyes, elle èst d'manowe è m'tièsse disqu'à dièrin djoû di m'vèye, c'èst come si c'èsteût scrît è m'cèrvê.
Li guère parèt......

(e rfondou dins l' Rantoele 83)
Revenir en haut Aller en bas
http://aberteke.org
Contenu sponsorisé





Richard Joelants Empty
MessageSujet: Re: Richard Joelants   Richard Joelants Icon_minitime

Revenir en haut Aller en bas
 
Richard Joelants
Revenir en haut 
Page 1 sur 1

Permission de ce forum:Vous ne pouvez pas répondre aux sujets dans ce forum
Li walon d\'èmon nos-ôtes :: Scrijeûs(e)s-
Sauter vers:  
Ne ratez plus aucun deal !
Abonnez-vous pour recevoir par notification une sélection des meilleurs deals chaque jour.
IgnorerAutoriser