Li Tchin.ne èt l' Cladjot.
Li tchin.ne arin.ne on djoû l' cladjot :
« Vos avoz bin sudjèt d' amète li crèyâcion,
D'zos l' pwèds d'on grêy rontia, jusk'à l' têre, vos vèrdjoz
Et l' mwins' aîradje ki, d'ocâsion,
Di l'êwe riv'léye l' murwè bladjot,
Cocheût vosse tièsse èt vos l' rabache
Kant m' fiér opis', stritchi fusse tél l'Imalaya,
Nin contint d' ratièni l' feu d' l'agnant solia,
Fout co la figue au vint warache.
Rin k' l'air vos-èst stoûrbion, por mi, tot n' èst k' frum'jon,
Si dèdj à vos soûrdîz à l' ombrîye di m' fouyadje
Ki racov'téye tot l'vwèsinadje,
Dji vos pôreùs sièrvu d' maujon
Kant, pa-t't-avau, roudîye l'oradje;
Mins, au pus sovint, vos crèchoz
Au plin-air dès frèchaus ou su l' bwârd dès richots
Por mi, l' Bon Diè a fait vosse paurt à l' rassatchète.
- Vosse charitè, dandj'reû, rèspond-t-èle li rawète,
Pratike d'one fwârt bone âme, mins rovioz vos toûrmints :
Dj'a bin mwins' peû ki vos do vint èt d' sès grûl'mints;
Dji pléye, dji n' chortéye nin. Si, au djoû d'audjoûrdu,
D'vant sès randons, sès côps twârdus,
Sins blonci, sins cranki, vos-avoz t'nu,
I faut ratinde pus lon.» Lès mots n' sont nin tot v'nus
Ki do fin fond dès tris, drigléye, pire k'on d'lachi,
Li pus tigneûs dès spwès k'on djoû
Li nwâre bîje eûye covè dins lès racwins di s' choû.
L'aube si rastoke èt l' djonc flitchi.
Oureûs, tchèssant, li vint oufèle
Tant k' à l' difin, i chove è têre
Li ci ki s' front drèssi aleùt kèki lès stwèles
Et h sès pîds, kausu, forint junk' à l'infêr.
E rfondou :
http://berdelaedje.walon.org/viewtopic.php?p=2159#2159
(avou l' åjhmince do scrijheu)
Mer 17 Fév - 6:40