Il a scrît on côp on tecse e walon d' après Vå-dlé-Rozire, e-n ene "ortografeye di l' oteur". Li tecse a parexhou e rfondou pu e rfondant dins Li Rantoele.
Vo l' cial e Feller
Li Meksike
On djoû dè mârs nonante-cate, on-z è pôsé noûs pîs su les tères d'Amèrike latine.
On, c'est mi, Claudy Raskin, èt ma fame k' astét à ç' momint-là, one bwêcèle.
Poqwè l' Amèrike Latine ? èt poqwè nin ?
On-z è kmincè nosse pèripe, k' è dèrè vint mwès, po l' Meksike.
A chîje eures èt dmèye dè l'après-non.ne - i fèjét d'jà nwâr - on-z atèrichét à Meksico, la pus grande vèye do monde ! Vint deus milions d' abitants. Ele è on oûte rècôrd, lu cî d' la mégalopole la pus pôluée dol planète.
On-z analét normâlmint po lontins, sins savèr po ostant, lu nombe dè djoûrs, dè smin.nes, dè mwès ou d'anées k' alét dèrer noste avanture. On dvét rwètu à chake dolar, po permète à nosse rèfe dè sèy lu pus long possipe.
Prèmîre ètape: Mussè fû d' l' aèropôrt èt passè les controles des dwanes. Oh ! on n' avét rin à s' rèprotchè, si ç' n' astét k' on plét mussè o payi avu cink pèlicules foto, èt k' mi, dj' è-n avé dè pus d' deus çants.
Po controlè les djins à Meksico, les dwanîs ant on sistème impârcial, on feu à deus coleurs, roudje ou vert. To poûsses su on bouton ; si c' est rodje, on t' rètoûne lu stach èt si c' est vert, t' ès trankile.
Djè m' aprotche a tronlant sins l' mostri, èt djè bouche su l' boton. Angwasse ! one sègonde, … deus sgondes, … trwâs sgondes ; la lampe vèrt s'alume ! Po on coûp, dj' è u dol chance â djeu !
On-z è pris on taksi, one koksinèle verte. Les taksis sant tos les mèmes, des véwés koksinèle. I gn è k' la coleur ki tchindje, pa des coûps djène, pa des coûps vert, sûjant la companie.
Èt on-z è dmandé â tchâfeu on lodjmint nin trop tchîr. Mès atancion, nin trop tchîr por zèls èt nin trop tchîr po « Gringo »*, come i djant. Paskè i sondjant kè si on-z est « Gringo », on-z est plin d' brokes. Alors', todi bin lz î prècisè noûs dèsirs.
I nos è mon.né dins one bèle mâjon coloniale, vestîje d l'influ.ince eûropé.ène, l'Espagne, pol coûp.
On-z è mètu lu poû d' afères k' on-z avét dins one tote pètite tchan.me èt pu, on-z è stî fè on ptit toûr so la plèce çantrale dè Meksico, « lu Zoccalo » C' est à ç' momint là précis k'on s' è vrêmint rindu compte k' èl trisse récôr de vèye la pus poluée â monde n' astét nin po rire.
La catèdrale, èclêrée pa des grosses lampes, rèssonét à one vedète dè la tchanson su sin.ne. Les féssôs d' lumîre fèjint des grands cônes come si la plèce astét rimplie d' fumijènes. Ké fumîre, ké polucion, k' on respire là, kè ces vint-deus miyons d' omes, fames èt afants respirant.
"Ê Manu, la catèdrale, èle pantche k' on dîrit, ou bin c'est mi k' è la berluwe?"
Ele pantche vrêmint èt voci pocwè.
Cand les espagnols ant vnu an kinze çant dîj-noûf èt k' il ant dèscouvru la cité Astèke, ci-cile su trouvét al mitan des fagnes. Dè ç' tins-la, la tère astét gordjée d' èwe. Mès, la dèmografie galopante èt èl bèswin d' èwe dè pus an pus grand ant vite o.u sou.è les tères.
Asteûre, les napes frèatikes, câzi â mème pwint, mènaçant d' s' afêssè dèssu zèles-minmes. èt c'est asture lu pwès dol vèye ki provoke lu tasmint. Vola pokwè ki l' catèdrale pantche èt k' les mâjons s' fissurant.
Après la ptite pormon.nade, on-z è rintrè dins nosse pitite gayole. Prèmîre nute d' one longue sèrie ; c'est nosse veû à tos les deus.
Lu landmwin â matin, prèmîre ocupâcion : on s' è mètu à tossè tos les deus come des démons èt on motchét tot nwâr. L' êr est bin poluwé, s' i falét co s' a convinke. èt pîs, on s' lave èt on s' musse.
Et vla l' prèmî contretins por mi. Come dj' èl dijé pus oût, on-z è poû d' bagadjes. Ca, cand on-z a va pou wit' djoûrs an vacances, on prind tot ç' k' i fât, po n' nin d'vlèr rèlavè. Mès cand on kite la mâjon po des mwès (espèrans-l'), on n' prind k' lu strik minimom : on pijama, deus camusoles, deus trwâs calsons, trwas cate pères du tchâsses, one tchèmije, on pulovèr, on fin paltot, one calote, deus ptits draps pou s' choûrbu èt one père dè bons solès. èt c' est tot ç' k' i gn avét dins nosse baluchon.
Djè rtoûne tot l' satch … Nondidju, dj' è rouviè mes calsons. La fame mu prète one dè ses culotes. Ebin !, c'est la k' on rmarke kè ça n' est nin coûpé dol mème manîre. C'est come di on mètét des trukes dins on filèt trawè !
Djè di al fame : « Lu cî ki vut voyadjè lontins rèwête à sa monture ». èt nosse monture, ç' astét lu porte-manoûye. Insi, dj' irans mindjè dins la rûe ou su les martchîs. Por mi, ça n' astét rin : dj' avé dja cnuchi ça chîs mwès à m' prèmî voyadje o Pèrou, an catre-vint neuf nonante. Mès por lèye, ç' astét on oûte père dè mantches.
Vs astèz septikes ? Adon, wètèz d'imajinè tos ces alimints, po brâmint inconus ô batayon : Les pwins â slo, la tchâr padzo les moches èt les pèchons d' l' ocèyan, k' on dîrit k' il ant vnu à pî. èt tot ça dins des rûes nin fwart ragostantes, â mitan dè mile èt mile djins an vwètures, busses èt camions, vômichant one sipèsse fumire nware.
Sins rouviè non pus, â dzeû di noûs tièsses, l' èpée d' Damoclesse : l' èwe, pwarteuse di totes sôrtes dè miséres èt do kolèra ki, à ç' momint-lè fèjét des ravadjes.
Dins ces sondicions-là, on voyadje kèmince todi pa les trwas wits, come djè lz è ouké : wit eûres po dwarmu, wit eûres po voyadjè èt wit eûres sol trône, si v' vèyèz çkè dj' vu dire.
Après one kinzêne dè djoûrs, on-z è nosse ritme dè crwazière. Prinde one kârte, lèchi tumè l' dwat èt dmandè comint çk'on fêt po nalè dins ç' viadje-là. Sovint, on s' atindét rèsponde : "Mès, gringo, gn è rin à vèy la." èt dè leu responde : « prèmîrmint, djè n' su nin gringo, ca non-Amèrikin, mès « croûdo » (cru, nin cût) èt deûzièm'mint, si v' dèjèz k' i gn è rin, alôrse, ça nos intèresse sûrmint, ca i fèt k' i gn arè dja pont d' tourisses, ki sant trop sovint ierspectueus dol populâcion locale avu ses us èt coutumes.
Et on s'rè sûrs dè trouvè là des djins ki fant do Meksike, çu k' il est anute. Paskè les tampes précolombiens, aztèkes, ou mayas, fant partie do passè. Nu confondèz nin; gn' è ossu les Incas, mès c' est dpus â Sûd : Ecwateûr, Pèrou, Bolivie.
On pèrnét don lu busse k' on nos avét indikè po nos rinde a l' andrwat tchwazi pa nosse dwat. On coûp là, on s' pormon.nét dins l' viadje po pârlè avu les djins, respondant à leus kèstions, èt zèls âs nosses.
Discutè avu ces djins là, ç' astét come si chake coûp, lu tins s'arètét. Ç' astét des parantèses ; èt vos plèz m' crware : des parantèses, i gn è u, su vint mwès. Mi k' ème tant d' pârler. Dij coûps, çant coûps, mile coûps rèpètè, les mèmes afères ; mès , si on n' astét nin d' acôrd, on n' avét k' à pârti ou rèvnu voci. Nu jamês rouviè k' on-z est addé zèls èt kè c' est à nozoûtes d' ènaler a leû ranconte, à nozoûtes dè les akseptè èt nin l' contrère. Mès, i fât bin l'avouè, gn è des coûps k' ça s'rè bin malâji !
Djè fèjé des fotos, ca c' est bin là m' mèstî : des nwar èt blankes po des èkspôsicions èt des diapôsitifs an couleur po dinre des confèrances, cand on rintèrrit. Ça m' fèjét don deus aparèys foto pindus â cô. èt i fât bin l' dire, ça susitét pa des coûps des convwatisses. Mème si on lzi djét, k' des sous, on nn avét wère. Wère por zèls, ç' astét dja brâmint !
Et mème s' i n' savint nin la valeur dè ces aparèys, la rvinte di ces-ci lèzi ârit permis dè mète tote ène lêtrîe dins leus èpinards.
D' â lon, les fotos d' djins nu côzint k' rârmint des problèmes; mès, d' près, ç' astét one oûte père dè mantches. Lèzi dmandè astét la mwinde des politesses; ca i n' fât jamês rouviè kè, zèls ossu, c' est des djins come vos èt mi, èt nin des curiôsitès touristikes.
Ça v' plèrit, vos, si on illusse inconu, à deus mètes dè vos, brakét su vos ès-n aparèy foto, po "apè" voste imâdje ? Sovint, la rèsponse astét on r'fus, ca ç' astét volè leu-z âme. Totfi, avu kékes dôlars, ci-çale, come pa majie, dèmèrét dins leu cwar èt n' sondjét pus a-z analè.
Mês djè r'fusé chake coûp èç djeu-là, ca ç' astét rognè davantadje dins nosse boûrse. Eureuzmint, il arivét pas des coûps kè ma dmande trouveuche one issue favorâbe.
Après avèr catoûrné dins tot l' viadje, on pèrnét la mème voûye k' â matin, mès à pîs, ç' côp-ci. La façon k' dj' avins po rascontrer les djins nos fèjét rotè on bon vint kilomètes par djoûr. Mès dj' avins, come ça, lu mwayin d' tot vèy.
Ça i est ! Il è vnu, l' tins d' kitè Meksico èt d' naler dèscouvru lu Meksike. Anfin, one pârtie d' ci-ci, lu Sud èt l' Esse, ca l' Meksike asteûre est pus tchîr kè çu k' on n' sondjét.
A nosse dèpart dè Beljike, on sondjét k' on pourit dmèru chîs mwès dins ç' payis frontîre avu les USA. I nos fârè rastrinde çu programe-là, si on vut plèr porsûre nosse programâcion, si ci-cile è jamês egzistè !
Si on-z è cmincè pol Meksike, c'est po la rèzon ki sût. Après « mu » Pèrou, dè 89-90, dj' è promètu à Manu, kè dj' esté co à l' aréoport dè Luksambourg, avant mème dè lî dire bondjoûr, k' on djoûr, djè la ramon.nri ladrî.
Avu l' tins, les budjets nos permètint d' analè. Mès la comére è tumé grâvmint malâde; on-z è don rèpwartu l' dèpârt.
Çu ki est môvès po one afère est bone po one oûte : nosse cagnote grochichét. C' est insi k' â Pèrou, on-z è rajoutè l' Ekwateûr èt la Bolivie ; pus, tot rwêtant one cârte, lu Chili èt l' Arjantine n' astint nin si lon k' ça. Pocwé don d' èn nin sayî d' i naler ossu.
Et ça n' est k' poû d' tins dvant nosse dèpart k' on-z è rajoutè l' Meksike. Nosse route astét don asteure "tracée".
Meksike, èt pu l'avion ou batê jusk' à l' Ekwateûr, Pèrou, Bolivie. Si ça nos astét possibe, on-z î rmètrit l' Chili èt l'Arjantine. Vos vièrez pus târd, si totfî, vos lu vlèz, kè ç' projet-là è subi brâmint, brâmint d' tchindjmints, â fur èt â mèzure des rancontes èt des umeurs.
Gn ârè, si ça vs intèrèsse, vint mwès d' avantures, d' anekdotes, d' èton.mints, d' èmerveymints mès eco d' oûtes afères, alèz.
Mès, atincion, sins l' mwinde prètancion d' sèy unike, ni scrijeu.
(*) « Gringo », c'e-st on mot ki dèsigne on Amèrikin do Nôr (USA), ki, pa èkstansion, su dène a tos les cîs ki sant afublès d' one blanke pê.
Sam 19 Juin - 13:03