François Nyns

Lidjwès, fir di l’ esse et del mostrer

Gilbert Mottard

Seul ome politike walon a-z aveur situ Mayeur, Gouverneur, Minisse et ôteur walon. Ci n’ est don nin :" Tos les minmes "?

Octôbe 1983. I-n a vint' ût' ans dedja...

Pol tote prumire feye, dispoy 1830, on Gouverneur di nosse province va fé tot s’ discours è walon, divant l’ Consey, å grand complet.
Ç’ est don avou s’ cour ki Gilbert Mottard va djåzer del vicåreye des ptitès djins d’ amon nos ôtes, di leus djoyes, di leus ponnes, di leus-èspwers et coula, ene eure long. El såle, on n’ oyéve ni hûse ni mûse...
Rinde li firté ås Lidjwès ! Ké bê programe !

Di-set' ans pus tard...

- Moncheu Mottard, pôrîz-v', s’ i v' plêt, fé ene pitite préface po nosse gazete è walon?
- Nèni !
- Pocwè don vos? Serîs-gne trop a gôche...trop a dreute, mutwèt?
- Nèni !
- Pocwè, adon?
- Paski dji va scrire avou vos-ôtes.
Et c' è-st insi ki nosse Gouverneur sicriya d’ vins nos cwinze numerôs.
Enn’ a-st èwaré pus d’ onk, vos m' polez creure!
Mins d’ abôrd, les swassante ôteurs vikants k' ont-st ovré avou lu.

Prétins 2.002.

- Moncheu Mottard, nos alans buskinter on vî curé d’ å Bierleu po ses katre-vints-ans. Vos l’ avez sur rèscontré a Brussel cwand v vs estîz Minisse. Mutwet esteut i sénateur ou député, dji n’ sé pus; end a tant fêt, dê! Pôrîz-v' fé on petit messedje ki nos djondrîs ås cis di tos ses camarådes? Li led’ dimin, nos rçûvîs l’ messedje ki nos a bin-n ècoredjî po-z adjincener l’ fiesse da Djef Ulburghs, å Bierleu.
Mins ki vs estîz-st ètike! Nos discutis, ene a eune, vos (rårès) fåtes d’ ortografe divant d’ mete vos scriyedjes è l’ ôrdinateur.
Mins k' on-z a stu firs et contints d’ ovrer avou vos, sîh ou set' ans å long.
Çou ki y' freut plêzir, la k° v vs estez, mi djel sé bin !
Po nos grands scolis des sîhinmes annêyes ki vont cwiter l’ comeune po des pus hôtes scoles, avou l’ côp di spate del Comission d’ Istwere, des Bibliyotêkes, on bê pitit live, d’ ene karantinne di pådjes avou on " C.D. " :
Lîdjwès, fir di l’ esse et del mostrer

Vosse discours ki v' va come on want. Il est prèt'. Î estans-gne?

F. Nyns, scriyeu a Intrez don, pitit fi, fi, et fré d’ houyeu.

È-st-i possibe â monde ?
ou
Po 'nn' ariver là?
ou
Wice alans-gne?

l-n-aveût bin trop' del djint è l' èglîse di Zolder à l' ètèremint di m' copleû Djèf Ulburghs!
On sèfokéve.

Après on qwârt d' eûre, vo-nos-là sol grande pièce de viyèdje, à balziner avou on vi houyeû pinsioné di Winterslag et haper èssonle on pô del frisse êr. Ouf !

Èt, halîhalof, sayî d' discuter di tchic et d' tchac.

A pon.ne lî aveû-dje dit qui m' popa, à traze ans, avou s' fré et treûs pus grandes soûrs avît qwité Herk-de-Stad po s' vini ètèrer èl houyîre d' âs Cwèrbâs â Bièrleû, qu' i m' dimanda d' ine traque, èwaré, mins sérieûsemint :
" Kimint, à Lîdje, i-n-aveût ossi dès houyîres ?!?!"

Qu' on djône hûzê flamind ou bin on twèrtchî politicard del Vlaamse Biesse, li neûre aricrègne, mi d'mande ine si-fête, passe co.

Mins nin on houyeû...S' i V' plêt, mon Diu, nin on houyeû.

N' âreût-i don rin-n-apris, trinte ans â long, è fi fond dès beûrs flaminds, mi vî houyeû di Winterslag?

N' èst-ce nin pus grave çoula, qui totes lès bouhes al gueûye qui lès Walons riçûvèt pol moumint?

Po rèmîdrer rin.ne, dji lî a dit, qu' è m' comeune, sol lisse dès djins qui vôtèt, i-n-a 35% di noms flaminds.

Èt qu' cès Flaminds-là sont dimnous dès-arèdjîs Tchantchès.

Èt qui c' èst l' Walonerèye qu' a fêt viker tote li Bèljique disqu' à 1960.

Mins vos n' mi direz mây pou qu' vos pinsez d' çoula.

Ca, po scrîre è walon, i fat fé come lès treûs mârticots èt n' nin adûzer lès politiques, lès crwèyinces, ni lès pédofiles.

Mostrez-m' on soûl bon scriyèdje è walon so Cools, Lahaut, Julie èt Mélissa...

I fat t'ni s' ran, dit-st-i l' pourcê.

François Nyns, pitit fi, fi, et fré d' houyeü.
Mi pére èsteût Flamind ; c' est portant lu qui m' a-st-apris l' walon. Tot tchantant.

lucyin a écrit:

Mostrez-m' on soûl bon scriyèdje è walon so Cools, Lahaut, Julie èt Mélissa...

Lahaut :

http://rifondou.walon.org/Hendschel_Laurent.php#julyin

Afwaire Dutroux

http://rifondou.walon.org/dutroux.html

So Cools, gn a co rén, mins on pout fé åjheymint on papî so Wiki

Vos 'nnè frez vos crâs ou vos mêgues.

L' ôte vinrdi, sol brocante di Sint Foyin, po cinq pèlés Eûros, on bê slobs live è walon di 464 pâdjes.

Jules Feller-Oeuvres lyriques du poète wallon Martin Lejeune-1925.

Abèye mi sètchê d' plastic biodégrada...

Èco on trézôr di pus', à mète avou tos l's-ôtes, è m' cavèrne d' Ali Baba.

 pus' fêt-on dè walon, èt pus' veût-on qu' on n' kinoh qui pô d' tchwès. JEAN Lejeune, à Lîdje, avou s' Cadet, passe co. MARTIN Lejeune d' Dison...Inconnu au Batayon.

On docteûr â grand coûr, amoureûs di s' contrêye èt dès djins d' amon nos-ôtes, in-arawé scriyeû walon ossi.

Mwèrt trop djône, à 43 ans... Damadje.

Toûrner lès pâdjes di s' live, c' èst come fouyeter lès pâdjes di nos alboms es fotos ou d' passer so 'ne blanke teûle, nos hopês d' diapos, di nos supêrwit' qui dwèrmèt pâhûlemint d'vins leûs classeûrs.

Et totes lès îmâdjes da Martin Lejeune sont cléres èt nètes, bin câdrêyes, sins " flou artistique" ni "solarisation" .

On pô sépia, tot l' minme.

Dj'inméve bin, mi, ine pitite hipète di timps-in timps, divins mès fotos...

On comprind qu' Jules Feller âye potchî à djonts-pîds so 'ne parèye ocâzion po mète è valeûr sès fameûsès régues d' ortografe. Ine préface di 58 pâdjes, rin qu' ça. Bon! Martin Lejeune èsteût s' cama. Mins acèrtiner qu'il a-st-apwèrté 36.000, awè, 36.000 corècsions è live da Martin, èst-ce bin s' kidûre come on cama?

Ni sèreût-ce nin on pô bêcôp po s' mète lu-minme è valeûr avou ovrèdje di s' cama? Dji pinse todi mâ, dê mi.

Wayaway si l' Lucyin ou l' Pablo rifondahît mây l' oûve da Martin... Â dèpârt, ci-chat âreût-i scrît po dès-èstènés?

Adon qu' i nos djâse dès r'bouteûs, dès macrês-r'crèyous, di Pire Andrî èt d' Bèlèm, on n' troûve nou scriyèdje so Chapuis! Nin on mot! Ewarant n' èst-il pas? On docteûr ossi, dèl minme contrêye ossi, qu' inméve lès p'titès djins, ossi.

Chapuis, lu, s' a rècrèsté disconte lès éminences, lès monsigneûrs qui lî ont bin fêt payî èt sofri l' mârtîre co pés qu' l' Ôte, là, n-a 2.000 ans so s' creûh. Touwer Chapuis à 33 ans come l' Ôte ossi, po l' ègzimpe... Mèan, mâssî bouria.

Il ârè bin falou dès razan.nêyes po 'lzî crâwer dès dorêyes al crinme èl g...djéve èt quéques bons côps pîds â cou po lès r'mète è leû pièce, lès éminences èt totes leûs mâssistés. C' èst bin pô èt bin târd.

Épilogue. Lèhez tot l' minme, al pâdje 173, " On doe' ". On pout, inte lès rôyes, tûzer, rin qu' tûzer, à Grigwêre Chapuis. C' èst todi ça.

François Nyns

Mårtén l' djonne so l' Aberteke :

http://rifondou.walon.org/lejeune_martin.html

so Wikipedia :

http://wa.wikipedia.org/wiki/Martin_Lejeune

C' è-st-ine saqui, m' vi copleû Djèf.

 Bièrleû, po sès 85 ans.
Mêsse Houyeû dè Payis d' Lîdje, Dèputé Eûropèyin, Dèputé èt Sénateûr di nosse payis, Docteûr ès' Politique dèl K.U.L., Citwèyin d' Oneûr di Grâce- Hologne...c'èst vrêmint 'ne saquî, mi vî copleû Djèf.

Mutwèt l' av' vèyou è fond d'Sèrè, ou bin d'vins 'ne manifèstâcion avou lès houyeûs à Genk, avou lès cis d' Beringen so lès plâjes dès ritchès djins di Knokmazout' ? L' Ariz-v' apôrçû è Kosovo, èl Palèstine?

Po v' dire li vrèye, dji n' l' a hâbité qu' ine qwinzin.ne d'an.nêyes â Bièrleû, tot djusse après l' guère.
Qwand i djaléve a pires finde, dji l' a vèyou fé s' toûrnêye è qwârtî avou dès rèyons d'acîr à sès solés...Pwis, al nut', bin vite pwèrter avou lu, so s' vî vélo d' fème, on grand gros sètch rimpli d' sès dièrin.nès gayètes, à 'ne famile ou l' ôte sol tèris' dè Cwèrbâ.

Dji l' a vèyou à Zolder, bagnî come on marswin è l' êwe di crustal dès ètangs di s' bèle Campine.

Dîh ans â long, è l' osté, qui ç' seûye è Payis Walon ou èl Campine, sins hiper ine an.nêye, nos-avans, avou lu èt 'ne cinquantin.ne di rafwèrcis galiârds d' â Bièrleû, passé lès pus bèlès vacances di nosse djônèsse.

Sé-dje si v's-avez knohou mi copleû Djèf, qui vint d'èsse buskinté avou tos lès ômonîs italiyins qu' ovrèt-st-è monde ètîr?

Lu qui n' saveût qui l' flamind qwand il a dèbarqué amon nos-ôtes.

Ça y èst! Mins c' èst bin sûr! I s' adjih di m' copleû Djèf Ulburghs, li curé po l's- ovrîs!

Mi copleû, mi copleû, c'èst vite dit...

Djèf n' èst da pèrsone, vu qu' il èst da tot l' monde.

-Quéle îdèye dè hâbiter on curé, vos qu' è-st-on pô comunisse so lès bwèrds?
- D'abôrd, hâbiter on curé, ci n' èst nin hâbiter lès curés. Djusse?
-Djusse, Ogusse ! Mins qui v' poléve-t-i bin-n-aprinde?
- I m' a-st-apris...Qu'on-z-aveût-st-on coûr...Èt pwis...Av' dèdjà oyou rire Djèf? In-ome di coûr qui rèye d' ine si fête manîre ni pout-èsse qu' in-ome tot-oute. Pol pô qu' on l' âye oyou ine seûle fèye, on n' pout roûvî l' rire da Djèf Ulburghs. Inte di nos deûs, ni sèreût-ce nin çou qu' i mâque li pus', tot-âtoû d' nos-ôtes? Aveûr dè coûr, s' êdî onk à l' ôte, rire à s' difâfiler l' botroûle...

Deûs pôves qui s' êdèt...èt vola l' Bon Diu qui rèye, dit-st-i li spot. Vèyez-v' co sovint coula è vosse gwârtî pol djoû d' oûy?

Minme amon lès djônes...?

-Mins ni mètez-v' nin âhèyemint Djèf so on pî di stok?

Dèl minme di manîre qui dj' î mète lès houyeûs, lès militants ovrîs, lès ôteûrs walons d' ir èt d' oûy.

-Mins qu' èst-ce don qu' a fêt èt qui fêt todi cori, d' on hâr d' on hote, nosse vî priyèsse, qu' a tot l'rninme 85 ans?

Mâdjinez...

Dj' a passé dès mèyes d' eûres adlé lu. Djèl pinséve kinoh come mi potche...

Djèf nos l' a portant mostré, on djoû, di 1948. Mins n's-èstîs bin djônes po prinde astème à dès vèyès pîres â mitan d' on bwès èt qu' avît mutwèt stu dès stâs, ou 'ne pitite mohinète qui ravizéve à pon.ne ine tchapèle èt s' clokî.

On-z-î vèyéve bin quéquès lètes sicrîtes è latin so lès meûrs d' â-d'vins; ine pîre di tèye qui poléve fé tûzer à 'n-âté...Mins note potale, nou sint âs meûrs.

Po Djèf, c' èsteût-st-in-èrmitèdje. Si-èrmitèdje. Qui r'prézintéve grossîremint, li mohone dè Christ, èl Palèstine, qwand c' èst qu' I vikéve avou sès parints, n-a deûs mèyes ans di d' chal.

N-a-st-avou dès télès mohinètes, kipwèrtêyes, parèt-i, par dès andjes, tot-avâ l' monde ètîr. Dihans-gne pus vite, maç'nêyes, par ine famile d' Italiyins qui s' louméve Angelis'.

Todi 'nnè-st-i qu' on-z-î vèya dès èrmites qui n' fit qui l' bin âtoû d' zèls, èt qui volît d' abôrd, sins po ottant qwiter l' èglîse catolique, viker simplumint pus près dès djins, sins falbalas ni tralalas.

Dispôy si pus p'tite djônèsse, èt tot dè long di s' vèye, â Bièrleû, à Sèrè, à Heusden, Djèf a tûzé dè fé raviker lès vèyès Ores èt l' idèyâl dès vis-èrmites :

Nos rapler I 'ènocin.neté d'on p'tit poupâ, è s' crêche, èt...l' pôve mohone d' on scrinî.

Vola, tènè, à m' sonlant, cou qu' a fêt cori m' copleû Djèf tote si vèye.

Et come i-n'a rin d' pus makté èt tièstou qu' on Flamind...après Tchantchès!!!...

Ènn'a-t-i falou dès discussions èt dès him èt dès ham avou l' tchèsturlin d' Vogelsang, avou l' èvèque di Hassel, avou l' comeune...Èt lu qui passe po on curé socialisse...ènn'a-t-i vèyou d' totes lès coleûrs, pâr li djène-breune dè C.V.P., lès cagots?

Tot l' minme, c' èst fêt. L' èrmitèdje èst fi-ni. Tèr-mi-né.

Li sondje di tote si vicârèye vike èt ravike.

Djèf a rèyûssi s' vèye di curé. D' ome ossi, d' alieûr.

Èt al copète dé martchî, po n' nin gâter l' potêye, tot riyant, tot riyant...

Veûy si live : De Kluis van Bolderberg en haar geheimen. 177 pâdjes.
Veûy ossi Le livre d° or di ses 80 ans. Les mèssèdjes d' ine cintin.ne di sès camarâdes d' â Bièrleû.

On comprind qu' Jules Feller âye potchî à djonts-pîds so 'ne parèye ocâzion po mète è valeûr sès fameûsès régues d' ortografe. Ine préface di 58 pâdjes, rin qu' ça. Bon! Martin Lejeune èsteût s' cama. Mins acèrtiner qu'il a-st-apwèrté 36.000, awè, 36.000 corècsions è live da Martin, èst-ce bin s' kidûre come on cama?

Parfète santé, frèzé, ine bone an.nêye, frèzêye.

Li sondje da Françwès

A câse dès liqueûrs âs droles di jèbes qui mès copleûs
-(dj'ènn'a co à r'vinde)-, mi sinkèt cès djoûs-chal,
come direût l'ôte: « dj'a fêt on sondje ».
Qui dji v' raconte. , .
Nos-èstîs turtos rassonlés èl bèle grande sâle d'âs C'mones, avou les CIS d'Indjis èt d'â Bièrleû, di Trô, di Grâce (ci n'èst nin pô dire) , d'Ivoz èt d'Tîleû, di Hu, minme di Sint Foyin, po m'ni hoûter, sawourer, aplôdi lès tchansons èt lès-ôteûrs, lès compoziteûrs qu'on-z-inme tant.
Enn'a-dje ricnohou, dès grands èt dès fèls!
I-n-aveût, tinez-v' bin : Djâke LEFEVRE, Véronique ROBA, LES DROLES DI LODJEUS, lès frés JOIRIS, Michel FELNER, di Tchèrate, Filipe ANCIAUX, Jacky VALENTIN, André GADISSEUR, André CAPITAINE, THEUNIS, Mariane HANS, di Frantchimont, lès DUYSENX, Georges SIMONIS, lès bèlès tchansons da Fèré, mètowes è lîdjwès par in-aplé R. DJOULANTS
Dès monumints, v' di-dje... Djôzèf VRINDTS, François RENARD, Emile
LAMBERT ~DJake~BERTRAND ~A ; GAUDlTiAUBOIS don lu,avou tot-âtoû
di s' tchèrète à rôlètes, Bob DECHAMPS, Ii gros DUNKÊR, JEZABEL,
MIMILE, lès SULLON, René CHAUMONT...
Oh! Ci n'èsteût nin on fèstival ni on grand pris. Nôna. Lès-ôrganizateûrs
avit tot simplumint volou r'mète à "oneûr, nos bèlès tchansons walones.
Ine djône glawène, à l'intrêye, m'a-st-acèrtiné qui l' swèrêye aveût stu
mètowe so pids par deûs-omes di Sèrè : Filipe Anciaux èt l'ci qui tint ine
pitite sicole di walon so lès hôteûrs d'âs' C'mones, qu' dj'a roûvî s'no (R.Joelants)
Il avît mî compris qui l's-ôtes, qui c'èst l'tchanson walone qui rindrè on pô d' I'
èhowe à nosse lingadje. Quéle bèle swèrêye, fât-st-assoti.
Tot s'féve è walon, come à Intrez don...
El sâle, MARCATCHOU èt Gilbêrt GEORGES èstît-st-al fièsse.
Dj'î a minme vèyou deûs curés: Flagothier èt Schoonbroodt. Ewarant.
Portant, èl cwène, adlé l'buvète, ènn'a quéqu'eunes èt quéqu'onk qu'avît l'êr di s'mâgriyi ; i fit 'ne seûre mène. Âhèye à comprinde. C'èsteût lès hôts mêsses di la R. T. B. F. di mès fèsses, èt dès Andojênes, avou tos leûs blablablas è francès qwand c'èst qu'i d'vizèt dè walon.
Inte deûs tchanteûs, lès-èfants dès scoles d'avâr-Ià, v'nît d'biter dès' bwègnes mèssèdjes, dès spots, dès pinsêyes d'a Pière FAULX...
Lès paroles di totes lès tchansons èstît-st-imprimêyes so lès programes.
Nou pris, noie mèdaye po rèscompinser lès tchanteûs. Mins qué succès, mès-amis, po totes leûs plaques, leûs C.D. qu'ont stu vindous come dès p'tits pans, so on cligne d'oûy di timps. On-z-a minme toumé à coûrt avou nos vis N° d'INTREZ DON...Mi feume ènn'a rim'nou tote règuèdêye… Mins n’ èsteût c’ qu’ on sondje ! Fr.NIJNS

Ènn'a qu'ont 'ne drole di manîre di s' mète è va/eûr : plok'ter ou blâmer lès oûves di nos vîs ôteûrs. N'èst nin powête quî vout, c'èst bin d'acwèrd. Mins, mâgré lès avis' d'in-univèrsitêre,
dj'inm'rè tofêr Ii bê vî ome al lavaliêre.

Quéquès p'titès loumîres so l'ome qui djètéve dès clârtés

On profèsseûr à l'univèrsité, èt qu'acsègnîve divins lès aténées, èsteût c'nohou.! Di d' lâdje èt d' long, grâce âs ovrèdjes qu'i féve so nosse walon.
I c'nohéve lès vîs dicsionêres, i critiquéve lès dièrin.nès grammêres, féve dès ètûdes à longueûr di djoûrnêye, mins n'âreût polou twèrtchî 'ne bone pasquêye.
Lu, à mons d' trinte ans, dimna l' pus grand dès critiques, di tot çou qu'è walon si scriyéve èl Bèljique.
(I savèt tot fé qwand i sôrtèt d' l'univèrsité. Dinez-'lzî don deûs tchins à discowter!)
As vîs scriyeûs, âs tchansonîs qui lî mostrit turtos çou qu'avît scrît, i n'aveût qu'ine parole al boque : nos n'èstans nin dèl minme èpoque. Mi, dj'oûveûre po lès djoûs à v'ni. Po qu' nosse waIon âye in-av'ni.
Èt c'è-st-insi qu'nosse tant-à-fêre, avou l'acwêrd* dès boches**, dè timps dèl guêre, fat-st-on p'tit lîve qui djètéve dès clârtés so lès scriyèdjes di nosse contrêye. Adon qui lès walons èstît à pan briber, qui l' Walonerèye vikéve lès pus neûrès eûres di s' vèye, vol-là don qu'i tape li houwêye so lès scriyeûs d'amon nos-ôtes èt qu'i lès blâme onk après l'ôte.
« Çou qu' vos scriyez là n'èst wêre bon : vos n'èstez qu' dès p'tits mirlitons ». Minme li grand Colas Defrecheux ènnè ramassa so s' tèyeû. Hinri Simon trova grâce à sès oûy. Çi sèreût bièsse
di s'è prinde à lu, minme pol djoû d'oûy. .
Èsteût-ce vôrmint adji come patriote qui dè spiyî l' moral di sès compatriotes?
Ratnez don s’ prumî mâva côp d'né â Walon.
Qwand i s' mâvléve, Doné Bovrèye dihéve sovint dès vrèyes. Lu ratinda l' libérâcion po lî r'claper l' badjawe bin à s' façon.(Veûy: ESTOCADES...)
Quéque timps pus târd, nosse critique fa 'ne antolojîe. Ine antolojîe sol walon ???
Nèni. L' cisse qui d'véve pwèrter s' nom ! Circulez, vos r'passerez, après mi, i-n'ârè pus rin à dire so l’ walon. C'èst tèr-mi-né. C'èst mi qu'èst tot, Maquêye n'èst pus rin. Adon qu'ine antolojîe deût èsse on c'mincemint ! Quéle difèrince avou lès ôtes pitits ovrèdjes di nosse réjion! A pârt dès vîlès pasquêyes dè timps d' Matî-Salé, on n'î troûve wêre dès tchansons ; li tèyâte, lu, èl lèya so l’ costé. C'èsteût s' tchûse, c'èsteût-st-ine fâte! Roûvî lès tchansons èt l' tèyâte ?
Estez-v' bin sûr qu'on djâse co dè (minme) Walon ???

Li pére d'â Cuzin Bèbêrt èt sès «Bonès tchansons» passît sûr à sès oûy po-z-èsse trop populêre.

Li walon n'èsteût pus l' lingadje dès simpès djins. I dimnéve d'on plin côp l' ci dès tèyoricyins.

…è cèrvê d’ l’ ome  di syince, w’ e-st-l l’ cour walon....?
C'èst s' deûzinme mâva côp d'né â Walon. Ca, hazârd èt tot, c'è-st-à pârti di ç' djoû-là, qui bin dès scriyeûs ont r'ployî leû hèma. (Çoula s'passéve â c'mincemint d' 1980). Vola, ossi, çou qu'on d'véve rapler so l' ci qui djètéve dès clârtés. Come Râ ou bin come li r'lûhant vièr ?
Moralité. L'académîe francèsse.di nosse payîs houka adlé lèy li bê vî ome al lavaliêre.
. Zit' marcou po nost-univèrsitêre.

F. Nyns, dins "Intrez don", riprezinté e rfondou dins l' Rantoele 70, esté 2014

* Autorisation N°3330, page 164.(Clartés sur.lès lettres wallonnes contemporaines.M.P.)
** Boche : Almand (djône-), qwand il èst moussî à sôdârd èt qui passe nosse frontiére, tos lès trinte ou quarante ans, tot tchantant, èt qui nos suce li song', qwatre ans â long, come li wandion.

Racourti et metou e rfondou dins l' Rantoele 70

Louk^iz ossu les reyaccions di lijheus dins l' Rantoele 71

Mi dico da Elisée Legros

Neni, i n’ a nén k’ avénxhe li droet, ki polénxhe dire tot l’ bén et tot l’ må k’ i pinsèt des ovraedjes des scrijheus walons.

II è-st-ècuriné, flêrant, télemint qu'il a chèrvou; di qwè, vos n' l' adûzeriz nin avou dès èknèyes!
-Di qui, di qwè djâzez-v', don, fré Tchantchès?
-Bin di m' dico F.- W. da Elisée Legros, va sûremint !
-C' èst vrèy qui bin des scriyeûs walons d' oûy vis ènnè diront: quéle èplâsse!
- Ossi, rin qu'à veûy l' ètat di vos dicos, pâr Ii F.- W., dji v' dirè qué scriyeûs walon
ui v's- èstez. Mins tot lèhant vos scriyèdjes, dji v' dirè qui qui v's-estez.
Tincion! Vos-oûy, vos se cèrvê ènnè prindront on fameûs côp ossi.
-N' sèriz-v' nin on pô mazo, vos Tchantchès?
-Hoûte on pô, Diojêne... Qwand l' mêsse, Jean Haust, qu' èsteût d'djà fwèrt midone
avou ses « Voyez... » poqwe nln « Veyez… » ? , e s’ dico W-F, nos pinsîs :
Bah!. Ci n'èst qu'on Tic di filologue, c' èst come ine dècoracion dèl grande guêre qui fêt tûzer à nos vis parints...
Si èlève, lu, E. Legros, a sûr. volou fé mis qui l' mêsse.
C' è-st-ine mwayène di 29 "Voyez" qui v's-ârez par pâdje.
-Ci n' èst pus on Tic, sés-se çoula, c' è-st-on TOC di filologue.
-Adon tos lès ramtèdjes, lès nos dès hamtês, dès viyèdjes, qui rimnèt à chaque pâdje...
-Fât dire qui lès fûzions d' comeunes n' èstît nin co dècîdêyes.
-D'acwèrd!
Mins insister so lès difèrinces, èst-ce bin-n-ovrer pol walon?
Mwért, mwèrt, mwêrt... ni sèreût-ce nin divizer po mÎs ringner?
Notez bin qu'à Grâce on dit: Mwart! Ça vique, èdon, çoula!
Adon tos leûs " arch ", archaïque? C' è-st-âs scriyeûs à 'nnè dècider, dè dire qu'on mot èst si vi qu' i n' èst pus vrèy. Nin âs filologues.
An 1787, par ègzimpe, Cambresier qui voléve aprinde Ii francès âs Walons, propôzéve qui staminê pôreût dimni, è francès :estaminet.
E Larousse d' oûy, qui vèyans-gne? "Estal'Dinet." du wallon staminê. Merci Larousse. Mins po nos filologues c' è-st-archaïque: Arch.
Mây pus nou scriyeû walon ni s' chèrvirè d'on mot marqué arch.
Mins po qui 5' prindèt-i, nos filologues?
C'èst tot çoula m' sonle-t-i, qui fa qu'on djoû, â comité dèl Walone, après 'ne longue discussion tot l' minme, qui Simon Stasse, nosse Kêssi, si mèta à rfé on dico W.-F., F.-W. On djâzéve minme d'on dico dès sinonimes... Mèrci, Simon.

-n-a co d' l' ovrèdje po lès djônes ranteûlîs. Bon corèdje.
Po m' pârt, dj' a fêt m' dag. Mès oûy ont 77 ans. Mi ôrdinateûr n' è po ut pus.
Mutwèt qui m' fi, on djoû.. Sét-on mây?
 r'vèy, binamé Pire.

Mins vos, Tchantchès,
Vos qu'a 'ne g...djéve qui hagne âs qwate costés, qui rètchîzvosse vènin , parèt-i, so nos brâves filolokes astèrlokes, qui trovez qu' i-n-a bin d' l' adîre divins lès ovrèdjes di nos mènîrs walons, qu' ârîz-v' fêt è s' pièce?
-C' èst vrèy qui d' pôye longtimps, dji n' hâbite pus lès robètes di crôye, lès béniwiwis, lès treûs vîs mârticots, lès tructeûs, lès minteûrs, lès pistagrawes.
Pâr si e' èst dès mêsses di nosse walon. Fez-m' confiyince, qwand c' èst qu' i fèt 'ne frâgne, ine hipè'te, dji n' lès rate nin èt, èl savèt bin.
Mins, Diojêne, dj' a mès côps d' coûr ossi. Et nin dès mwindes.
El pièce dès 14.355 mots è francès qu' i nos d'mande d' aler veûy è s' dico F.-W. ,
èl pièce da E. Legros, dj' âreû rèvoyî Ii lèheû âs mots walons dè dico da J. Haust.
Ç’ âreût stu pus pratique èt èconomique pâr po nosse cèrvê èt po nos vîs-oûy ossi. Mins rèvoyî 14.355 fèyes Ii lèheû à l' oûve dè vî mêsse? Vos n' î pinsez nin, èdon
Diojêne, « ce vaisseau fantôme qui se termine en échec… »
C'est mi qui, c' èst mi qu' 8, c' èst mi qu'est...
Prindez vosse corèdje à deûs mins. Lîhez d'abord, sins hiper ine rôye, lès pâdjes 3,
9, èt 241; vos î troûvrez ddja 181 Il VOYEZ ". C' è-st-on bon c'mincemint. Corèdje!
Nombe di "Voyez" so 487 pâdjes.

Pâdjes di 1 à 10 : 393/ di 11 à 20: 303/ di 21 à 30 : 263/ di 31 à 40: 290/
di 41 à 50: 281/ di 51 à 60: 275/ di 61 à 70 : 312/ di 71 à 80 : 258/
di 81 à 90 : 202/ di 91 à 100 : 234/ di 101 à 110: 226/ di 111 à 120 : 270/
di 121 à 130: 201/ di 131 à 140: 241/ di 141 à 150: 276/ di 151 à 160: 267/
di 161 à 170: 277/ di 171 à 180 : 291/ di 181 à 190 : 254/ di 191 à 200: 323/ di 201 à 210: 296/ di 211 à 220 : 316/ di 221 à 230 : 275/ di 231 à 240 : 316/ di 241 à 250: 310/ di 251 à 260: 268/ di 261 à 270: 342/ di 271 à 280: 273/
di 281 à 290 : 299/ di 291 à 300 : 272/ di 301 à 310 : 269/ di 311 à 320 : 283/
di 321 à 330 : 289/ di 331 à 340: 270/ di 341 à 350 : 339/ di 351 à 360 : 322/ di 361 à 370 : 295/ di 371 à 380: 336/ di 381 à 390 : 299/ di 391 à 400: 376/ di 401 à 410: 364/ di 411 à 420 : 32~/ di 421 à 430: 304/ di 431 à 440: 334/ di 441 à 450 : 351/ di 451 à 460 : 334/ di 461 à 470 : 345/ di 471 à 480 : 345/
di 481 : à 487: 171/
14.355 Il VOYEZ Il po 487 pâdjes.
F.Nyns 8.8.2014

Rarindjî e rmetou dins l' Rantoele 71.

Èco « on non-anivèrsêre »

F.Nyns


D'pôy vint' cinq ans, chaque an.nêye èt sins lâker, nos r'trovans nos copleûs catalans tot près d' Pèrpignan.
C'èst dès comunisses èt dès vrèyes. Ènn'a co, minme s' I div'nèt foû râres à trover. .
On pô come lès scriyeûs walons à Lîdje.
Ureûsemint qu'à Intrez don, n's-èstans co 'ne cinquantin.ne à. poleûr djâzer èt scrîre li walon èssonle!
-Mins qui v's-èstez pèssimisse, Françwès. Fât-st-arawer!
-I-n-a d' qwè!.
.
Dj'a d'abôrd hapé on clapant côp d'solo so mès deûs spales tot fant l’ Djâke, come Aldo Matchône, a Canèt-Plâje.


Adon pwis, mès deûs p'tits fis, dès potchâs v' di-dje, ont pèhî come dès rwès-pèheûs èl Massane, avou leûs twèrtchîs èt houlés-agayons. Mi, come Bèrwète!
Èt dji tûzève â cint' èt cinquantinme anivèrsêre di nosse pus vèye socièté walone. .
Volans-gne wadjî qui s'comité èst capâbe dèl fièster è francès ?

Mins veûy touwer èt mascrâwer dès cintin.nes d' ènocints èt dès-èfants è Liban, sins l' poleûr èspêtchi ; par dès Djwifs qui pièrdèt leûs tâtes èt leûs nougats, èt po l’ pus sûr, leû-zoneûr admistèrdam-tèrvitèrdam ; i-n-a d' qwè potchi foû d' sès bagues èt d' sès clicotes!

1936. I-n-a sèptante ans. Vo chal lès condjîs payîs.
Loukîz-lès dèbarquer so lès plâjes dès ritchès djins. I r'lèvèt lès djambes di leûs pantalons disqu'âs gngnos po moussî è l'êwe. Leûs-èfants fèt dès tchèstês è sâvion. Èt leûs fèmes, don ! Quéle oreûr ! Èle si hâgnèt, s' ègzibèt divins dès spès mayots d' lin.ne. Quéle oreûr...
Vôrmint... Come dîreût l'ôte. (Veûy : Umanité Dîmègne dè 13.7.06)
I sont dès cint' èt dès mèyes à monter sol trin, mutwèt pol prumire fèye, po rire, s'amûzer, viker quéquès-eûres di boneûr èssonle, â bwèrd dèl mér. Èt portant... .
« On n' nos va tot l' minme nin payî à n' rin fé », pinsît-i lès-ovris...
« Vât mi Hitlêr qui l' front populêre », dihit-i lès ritchâs èt lès cagts. . .
Èt po rèmîdrer rin.ne, come po spiyi l' èhowe dè moûvemint ovri, PARIS SOIR, so 'ne plin.ne prumîre pâdje di djulèt' 36 :
« Dpôu 1873, i n-a mây tant ploû so l’ France, il a toumé dès gruzês ossi gros qu' dès balons d' foutbal so l’ Lorin.ne èt li Doubs. N-a minme avou dès tornâdes so l' Ârdène. Li sèt' di djulèt', il a ploû a sèyês so Paris, ottant so on djoû k iso tot-on meûs ».

ATMOSFÊRE … ATMOSFÊRE

Quéle tape ! Mins oûy, on Francès sa treüs ni pout prinde dès condjîs...
Lès Rèstos da Coluche n'ont mây si bin roté.
Èt pwis, n-a Chirac èt Sarko... Quéle atèlêye, quél èspwèr, qué programe.
Notez bin qu' lès cis qu' èstît d'vant zèls n' ont wêre fêt mi.

Corne nOsse camarâde E. Sullon, dji v' va dîre li meune. Nos-avîs deûs trézôrs à d'ner come èritèdie à nos ptits-èfants.
- Li purnîr : on franc èt rude walon avou tote si ritchèsse.
- Li deûzinme : l'Union dès-ovris èt l' fwèce di leû pârti, di leû sindicat. Qu’ ènn-avans gn’ fêt ?

Volà, tènèz, cou qu' c'èst qui d' diâzer d' anivèrsêres...
Vât mutwèt mi di n' lès mây pus fièster èt d' lès roüvî, ine bone fèye à fé ! I n' apwèrtèt qu' dès neûrès-îdèyes èt dèl kinôye.
Alè, à vosse santé!

Li scriyeû si r'chève ine razâde di Banyuls qui, li sonle-t-i, a tot d' on côp on p'tit gos' di vinêgue… Eûreûsemint va, qu'i-n-a co dès scriyeûs walons qui s' ègadjèt d' timps-in timps d'vins leûs scriyèdjes.
Francwès NIJNS (Intrez don 2006)

Rarindjî e rmetou dins l' Rantoele 72.

Li pèheû c’ èst l’ prumîr ècolojisse èt l’ mèyeû gâr d’ êwe

So Moûse, lès cormorans magnèt ottant d’ pèchons so on djoû ki tos lès braknîs ènnè prindèt so cint-ans ! Èt l’ èpufkinèdje di nos-êwes, â pwèzon, â mazout’, c’ èst co pé k’ lès cormorans !

Al copète dè martchî, n-a lès noûvès digues, lès bârèdjes, lès çantrales, lès canâls, lès bièsses réglumints ossi clérs ki dè djus d’ tchique…

Mins vos, ni v’s-avîzez nin d’ wârder on djvènin (petit chevenne ou meunier) di cwate çantimètes divins vos ptitès rossètes (gardon), vos-amwèces (amorce) ! Way po vosse pèrmis … ki costêye asteûre bon-zè tchîr. I-n-a d’ cwè divni anoyeûs.

C’ èst tot çoula ossi ki fêt k’ on n’ veût pus wêre dès pèheûs so Moûse. Di Lîdje a Hu, kibin ‘nnè veûrez-v’ co ? Comptez lès on djoû ! Di Hu a Lîdje, kibin veûrez-v’ co d’ botikes po lès pèheûs ? Kwèrez lès !

Portant, l’ bon pèheû, l’ ci ki lêt s’ plèce pus prôpe tot ‘nn-alant ki tot-z-arivant ; nin l’ ci ki hène sès vûdès bwètes di bîre èt sès plastikes divins lès bouhons, lès ronhes… Èt ki tape lès pèrikes èt lès raboulotèdjes di sès lignes di fond so l’ bwèrd èt adon, ki fèt sofri l’ mârtîre âs mouwètes, âs colons. Av’ dèdja vèyou l’ pôve oûhê, sès pates èmacralêyes divins ‘ne boule di 30/100° ? L’ oûhê èst bon a touwer !

Li bon pèheû, di-dj’, c’ èst prumîr ècolojisse. C’ è-st-on gâr d’ êwe k’ i fâreût rèscompinser ! Kimint ?

Si lès-omes politikes walons avahîse li bone îdèye dè rinde totes lès êwes banâhes (ouvert à tous) âs pèheûs. On-z-îreût kwèri s’ pèrmis al police dès comeune ; i n’ costèyereût ki 5 eûros po treûs vèdjes. Ine vèdje po rin po lès mons’ di cwinze ans. C’ è-st-ine saye a fé deûs ans â long.

Insi, rveûreût-on mutwèt on pô pus d’ pèheûs so Moûse. Èt adon on-z-ôreût :
─ Tins, n-a m’ gamin ki prind dès hôtîtches (hotu) al pâsse (pâte) avou on dmèy mète di fond …
─ Louke, èco ‘ne cowète â rodje vièr (petite anguille), chal tot-â bwèrd…
─ N-a dès fâmeûs govions (goujon) avâr chal… C’ è-st-a n’ nin creûre !

Madjinez on pô : on gâr d’ êwe, in-ècolo tos lès cinkantes mète, â bwèrd di Moûse. Mins come po l’ walon, c’ èst bin trop târd. Montgnêye a djouwé. Nos-omes politikes fèt bin lès soris. Mins c’ èst damadje k’ i n’ èlzî mètèt nole cowe.

Ine bone îdèye k’ n’ costêye rin ? Ça n’ deût nin èsse fwèrt bon ! Al pèhe, on ‘nn-èrva sovint avou ç’ k’ on-z-apwète.

Francwès NIJNS (Tchantchès d’ Bièrleû)

-----
Serè eplaidî e rfondou dins l' Rantoele 74, esté 2015

Lès pèhons d' Moûse ? I valèt bin l's-ôtes !

Trûtes, rossètes, brâmes…
Jean-Marie m’ sorodje, m' èmina on djoû dè costé d' Lièrneû po-z-î pèhî dès trûtes sâmonêyes
èn-on vivî. Bin binamé, li mêsse dèl mohone nos mostra tos sès batch avou dès tot ptits pèhons, dès noûsons, come dès maques d' atètches. Mins surtout, li deûzinme siteûle qui l' O.R.P.A.vnéve di lî fé avu. Èt ossi dès djènès trûtes qu' i féve po lès Japonès. Poqwè nin dès rodjes po lès Indyins ?

Lès trûtes sâmonêyes, zèles, èstît totès rodjes â dvins. Qu' èlle èstît bèles ! Ènn-aveût tèlemint è vivî qu' èlle ârît bin potchî totès seûles è nosse reûse. On lzès pèha, on lzès compta, on lès pèza, on lès paya. Ci n' èsteût nin po rin ! Bah ! On s' aveût bin plê. Mins po lès magnî, '1 âreût falou mète ine picète al bouwêye so vosse nez télemint qu' èle flêrît l' gale èt l' apotikêre.

Jean-Marie qu' a bon coûr, ramon.ne sovint dès kilos d' rossètes à 'ne brâve èt corèdjeûse famile èspagnole dèl rowe Pâquète. I n' savèt qwè fé po l’ rimèrci. Èt tot l' monde èst contint. On djoû qu' i féve dès coûsses, quî veût-i intrer èn-on rèstôrant démocratique dèl vèye di Lîdje avou on pèzant banstê qu' i ricnoha sol côp, vu qu' c' èsteût l' sonk ! Qu' aveût-i marqué â menu dèl vitrine ? Croquettes de poissons. Çoula n' a nî èspêtchî m' bê fré d' èco rapwèrter dès pèhons âs brâvès djins....

Dè costé d' Îvoz, an face di Tchôkîr, ine famile di Chin'wès pèhe sovint. I nos dmandèt nos grossès brâmes (brême). Mins poqwè nos sinkèt-i 'ne gote di leû pèquèt à chaque pèhon qu' on lzî done ? I parèt qu' zèls ossi tinèt on rèstôrant.

Dè producteûr â consomateûr

So l’ matinêye, an face dès fors à coke, dj' aveû pris deûs gros èt grands sandes âs ptitès âblètes. Divant l' dîner, come ènnè fât lèyî on pô po l's-ôtes, rintré èl mohone, dji lès mostra à m' bê fré qu'è-st-ossi m' vwèzin. « Nète lès, fês- 'nnè dès spèssès rondèles, nos lès alans tchèmner torade po 1's-­èfants ». Côper lès pèhons à boquèts, lès hôder èl bolante êwe, lès dhâssî, èwalper lès rondèles divins dè papî ârdjinté, après lès aveûr salé, peûvré, avou on ptit boquèt d' boûre, on pô d' èchalote, lès cûre à l'ouh so dès tchôdès cindes.... Çoula a 'nn-alé so rin dè monde di timps. Wèy mins... C' èst qu'i-n-aveût pus d' cinq kilos d' pèhon po 'ne qwinzin.ne di magneûs ! On 'nnè ridmandéve...

Jean Stas' on copleû d'ovrèdje, pèhe al frontiére francèsse. Sès brâmes, sès rossètes, sès djvènes, sès bârbês… Ènnè fêt 'ne foû bone èscavètche...

A pârt li tilapia, li silûre èt l' brotchèt, dj' a magnî tos lès pèhons d' Moûse. Po l’ brotchèt, c' èst come po l' loto : s' on vout gâgnî i fât prinde dès bilèts. Ça vinrè mutwèt on djoû. Tant qu'asteûre, lèyîz-m' magnî Moshé Dayan' (li pus gros brotchèt d’ Moûse). Il èst télemint gros...

Lès mèyeûs pèhons por mi : li sande, li pîtche, l' anwèye, li govion... Mins l' Walon n' èst nin on rafâré po l’ pèhrèye. Raplez-v' lès vinrdis à l' ârmêye. Quéle gasse, qué djama po lès treûs ou qwate sôdârts dèl tâve di doze qu' inmît bin l' pèhon â dîner. Èt â soper, ça rataquéve avou lès sârdines.

Chal à Lîdje, si mète èssonle âtoû d' ine fritche èt 'ne masse, ine crolêye djote, on spaguèti, c' èst facile âhèye. Rassonler swassante djins po sawourer chasqu’ eun' on dmèy kilo di ptitès anwèyes âs djônès crompîres, ci sèreût ddja pus malâhèye. Èt portant...

Ine boulinâde è Catalogne

Lès Catalans qui dji hâbite dpôye pus d' trinte ans ci n'èst wêre parèy. I s' rapoûlèt voltî po magnî totes lès sôrs di pèhons. On djoû c' èst onk, ine fèye c' èst l' ôte. Tot l' minme ! Nos èstîs invités à 'ne boulinâde â bwèrd di l'ètang d' Leucate, tot près d' Barcarès'. Il èstît pus d' swassante à fé l' fièsse ci djoû-là, di tos lès adjes, brâmint dès ovrîs. Dès tot djônes disqu' âs pus vîs, il avalît l' magnehon à rlètche deûts, à fé glèter leû minton. Ça valève lès pon.nes dè ratinde ottant d' an.nêyes po cnohe on tél moumint, ine pitite cwène di paradis. Ça n' arive nin sovint èl vèye.

On bon feû d' vîs pîds d' vigne, on grand neûr tchôdron d' fonte come li ci d' â mwane d' Astérix, èt qu' on-z-ècrâhe d' abôrd â-dvins avou 'ne flitche di crâs lârd tot djène... Dès boquèts d' anwèye come mi ptit deût, dès jèbes d' avâr-là, èt çoula cût londjin.nemint, doûcètemint, sins trop' rimouwer. Tot ratindant, djâzer d' traze èt d' quatwaze èt lâmer, bin frisses, leûs bons vins d' Banyuls, di Rivesaltes, dès Corbières, dès Albêres....

I n' a falou qui quéquès eûres di boneûr po qu' i m' djâzasse di sès cnohances, dès acostumances d' on pèheû dè grand lac. I m' ârè falou dès rasan.nêyes po mèriter ine téle confyince... Mins quéle afère po-z-ariver â ptit cabanon pièrdou dvins lès bambous, à quéques mètes dè grand lac. Tot çou qu' dji m' rapèle, c' èst qu' on 'nn-aléve di Canèt.

Al pèhe, li pacyince èst todi rèscompinsêye.

François NYNS (Françwès d’ Bièrleû)

-----
Serè eplaidî e rfondou dins l' Rantoele 75, waeyén-tins 2015

L'île di Pâques

Qwand Djâcob Roggeven, on marin holandès, discovra, an 1.722, l'île di Pâques, i n'î trova qu'ine tère coviète di crouwins, dès wêdes di males p'titès basses jèbes. Pus nol âbe èt quéquès cintin.nes d'âmes qui viquît pôvriteûsemint di mêguès vèrdeûres èt d'poyetrèye.
Sins lès-âbes, sins le0 bwès : nou bate, note bètchète; impossibe po lès Pasqwans dè qwiter l'île ni minme d'aler pèhî è l'ocèyan.
Portant, ènn'aveût dès pèhons, èt nin dès mwindes, là tot près èt tot-âtoû d'zèls.
I fât dire qui lès djins èstît ripârtis inte ine dozin.ne di familes qu'avît dès tigneûs mêsses à leûs tièsses èt qui s'disputît, djoûr èt may, po-z-agrandi l'pârt di leûs tères. L'île ni fêt qu'deûs' treûs cint kilomètes cwârés!
Minme qui dès fèyes, i n'rinakît nin di s'kibate ni di s'kimagnî inte di zèls, tot come dès bons canibales.
Mins dès cintin.nes di grandès hôtès posteûres di pire avou leûs mwèrts-oûy, sonlèt r'louquî èvè l'cîr.
Treûs siékes di d'vant, l'île qui comptéve pus d'qwinze mèye djins, èsteût coviète di grands-âbes rimplis d'oûhês di tère èt d'mér. Avou l'âbe âs grosses neûh qu'on vèyéve tot-avà, i fit leûs bètchètes, leûs mohones, leûs cwèdes èt leûs moussemints. II èstît-st-è paradis, come âs Marquises ou à Hawayi.
Çoula dura disqu'â djoû....
Mâdjinez leûs p'tits chefs, dès Ben Lada èt dès Mac Loden, dès Bouche, Yarafat', Moché-ci, èt Hitler-la avou chaskeun' à costé d'zèls, on janre di pope, di mola, d'ayatola, di pasteûr, di curé, di pâpe, qu'èlzî fèt drèssî dès posteûres, todi al pus grande, todi al pus hôte, todi al pus pèzante. Po-z-aminer lès-adjèyants, lès grands stares, lès grands diâles è cwèr, lès Gôliyates dès cârîres disqû'â bwèrd dèl mér, ènn'a-t-i falou dès cwèdes, dès bodjes, dès strouks d'âbes èt d'l'ovrèdje! ! !
Èt tot çouia, po-z-avu I'main hôte sol famile d'a costé èt po preûtî, po fé Ici Quifêtotmîquinôte.
Bin vite, on s'ritrova sins-âbes, sins bwès. Lès tères ni rat'nît pus .lès-êwes dès plêves; pus d'awous', pus d'râyèdje di legumes. Lès-oûhês d'tère ont bizé èvôye lès prumîs. Lès-omes, onk après l'ôte, ont disparètou.
parèt, d'après dès grands sincieûs, qui n's-èstans ègzactemint come lès Pasqwans dè vî timps. Nos-ôtes, nos n'polans qwiter l'tère; tot come il èstît pièrdous è plin mitan dè Pacifique, à 2000 kilomètes di leûs pus près vwèzins. Nos n'èstans were pus malins qu'zèls ni I'èstît.
Nos galvôdans, ravadjans, tapans à mâlvâ nos principâlès ritchèsses.
Li vèye dès-ornes sol tère si « djowerè », si l'on pout dire, è ç'siéke-chal. Nos-ôtes ossi, i nos fât dès mêsses qui s'kihagnetèt â longueûr d'an.nêyes po d'pârti lès ritchèsses, po fé candjî lès frontîres.
« Israel deût disparète del carte. On n'pout martchander l'manîre dè viquer dès¬Amérikins »...
Pôve Eûrope, sins nol ôte grand projèt qui d'fé confiyince as-grand capital!
Vola, tins, on be projèt po lès-écolos, lès socialos, po tos lès gôchos, lès¬altêrmondios, lès bios : nos-èspêtchî dè dim'ni l'île di Pâques.
N.B. Nin lès catos, pace qu'avou zèls, i nos fârè co fé dès-adjèyants d'pîres, èt qu'i nos soflèt bin trop' di pouces divins nos-orèyes.

---
Modêye e rfondou e l' Rantoele 77

F; Nyns

"Allah n' inme nin muzique, pace qui c' èst sou qui l' diâle veût voltî. Ossi, lès tchanteûses èt lès tchanteûs sèront-i ètèrrés li pus bas possibe èt i d'vinront dès mârticots ou dès pourcês". (Rachid Abou Houdeyfa, rècteûr dèl mosquêye Sunna, Brest, 2013 (Sourdant: Canard encnainé, 18.11.2015.)

On tûse tot dreût â BATACLAN.

Mwèrt al djôye dè viker I Longue vèye al djôye dè mori. !
Mi, dji tûse à Djâke Bertrand, âs Sullon, à Bob Dechamp èt à tos lès tchanteûs francès, américains qui nos ont tant dné dè boneûr, èt rindou si ureûs, tot dè long d' nosse vicârèye. I fèt pârtèye di nosse vèye - Raplez-v' vosse prumî bal, vosse timps d' sôdârd - èt çoula, bin pus' qui tos lès bârbous âs blankès cotes, lès salafisses, djihadisses, lès éminences, lès monsigneûrs, lès sintetés, lès altesses celsticimes.

C' èst vrèy qui JEAN FERRAT tchante : Li fème èst l' avni d' l' ome adon qui lès fèmes arâbes ni polèt on pô raviquer qu' amon nos ôtes. E leû payis, èle sont djusse bones à dmani èl coulêye, moussêyes à spawta, come dès neûrès dîdisses.
Poqwè s' moussèt-i come dès fèmes, avou dès longuès blankès cotes, lès bârbous? Poqwè priyèt-i l' cou è êr? Qu' i sayèsse don di nos fé knoh li paradis chal sol tère, tos lès cis qui nos promètèt infêr si nos n' sûvans nin leûs régues, leûs Iwès, leû politique, li pârti qui lès ahâye, qui lès arindje, qu' i polèt dominer.

Hitler fêt broûler dès miyons d' Djwifs, Mussolini sprâtche li payis arâbe d' â Négus', Franco ahèsse lès gôchisses di l' Espagne po 'nnè dimni dictateûr. Nin on seûl mot dè Vatican po lzî dire leûs vrèyes, à cès fachos-là. Qui dè contrêre.
N' adûze ni Jean Ferrat, bârbou ! Lès dièrins cocos n' ont nin dès calaches mins il ont à rdohe dèl pissène dè bègâ d' pourcês qu' i pôrit bin aler rispâde divins tès mosquêyes salafes. As-se oyou?

Lès Francès. Sâye on pô, tès ôtes lès bârbous, minme après l' prétimps arâbe, d' aveûr è t' payis on prèzidint come Colluche ! El France, c' èst possibe.

Lès Amèrlokes. What a wonderful world. Qwand onk di leûs prézidints djâse dèl pâye : on l' towe. Ossi, mèrci Bush. Grâce à vos... (bièstrèyes), nos avans Daeche. Mins tincion, bârbou. Il ont turtos dès calaches... èt sor zèls.
So lès hôteûrs di Sèrè, al Noûvèye, mi sonle-t-i, ou bin à Hinri Tchapèle, pôrminez-v on djoû âs pîds dès blankès creûh, loukîz l'adje dès djônes sôdârds américains qu'ont d'né leû vèye po nos libèrer des Nazis. Padzos lès  creûh, blancs ou neûrs ont l' minme coleûr. C'èst Piron parey. Vos tûzerez bin lon.

Oh dj'a knohou deûs djônes sôdârs almands, sins rprotches. Hans et Wolf. Il avît a pône 20 ans et mi sèt (dji raconte ça dins l' tècse "Li ptit caporal". Mins vochal li libéracion, lès G.I. èt Glenn Miller. Quéle afêre. Nos bons dius c' èsteût lès tchâfeûs dès G.M.C. Dès neûrs nêgues, såve rèspèt. Qwand i s' arèstît po fé ahote, nos gripîs bin vite è leû cabine, â costé dè sôdârd. l-n-aveût todi à pwèrtêye ine bwète di râcions five in one .
On-z-î tchûzihéve çou qu'on voléve, dès tchiques gomes, dès p'titès bwètes di tchâr, minme ...dès capotes anglèsses qui nos parints, tot come nos ôtes, -såve nos grandès cuzènes-, prindît po dès balons à gonfler.
Lès sôdârds nos ârît dné Lîdje èt Hu.
Nos polîs minme kipougnî leû bê ptit fuzik, distchèrdjî, èclawé inte lés deûs sîdjes. I nos dnît d' bon coûr lès bês insignes è coleûr di leûs mousseûres.
Sol brocante di Sint Foyin, qwand dj' ô on cama qui m' dit : "Fât-st-arawer, n-a nosse Djus-d-là qui toune à Kinchassa. " Dji lî rèspond :"As-se vèyou li bê rislèt, lès bês grands oûy dès ptits èfants âs crolêyès tièsses? Come on-z-a bon d' lès-aconter." Ni roûvèye nin qui m' popa èsteût flamind èt qui tonk provnéve dè nôrd di l' Italie. Deûs tièsses di hoye, djans! Mins deûs-arèdjîs Walons.

François Nyns, Dâ Bièrleû.

Eco on scriyèdje à disconsî âs amateûrs di Halal

Modêye e rfondou e l' Rantoele 77