José Schoovaerts

L' galant dins lès meûles, d'su lès strins, l' awinne èt l' frumint

redjårbaedje da David Herbert Richards Lawrence

Bladjot k’ il èstéve. Sins pont d’ sintimint d’sus s’ vizâdje, tot come
oin ome ki n’ a pus rén à ratinde.

“Alondjoz-vos vêci” di-st-i èt sérer l’ uch. È l’ cayute i fiéve nwâre nût.

Èwarante di choûte, èle s’ a sitindu d’ sus l’ covêrte. Tot d’ shûte, èle a risintu l’ doûce, bèrolante, ardante mwin lî capougnî s’ cwârp èt ranchî après s’ vizâdje. Rasûrants èt rapaujants, pate à pate, lès dwègts carèssîne si néz, si front, sès lèbes...èt adonpwîs, rouf, d’ sus s’ massale, l’ doû riftâdje d’on bètch.

Ele dimèréve sins bodjî, alondjîye, come èdwarmeuwe dins ène sôre di sondje. Èle s’ a mètu à triyaner. L’ balzinante mwin, pansaute èt maladrwète, si muchéve dins sès moussemints. Lès dwègts shènîne sawè d’ avance comint l’ dismoussî ; là, tot djusse èwou èle li voléve.
Avou sogne, li tène camuzole di swè a ridé cauzu à sès pîds.
Il a frumjî d’ plêji à lî djonde s’ doû èt tchaud cwârp. Lî bètchî s’ boutroule. Sins pus ratinde, il lî a falu s’ ètchéssî, trover là, au fin fond di s’ cacane, l’ paujèrté dèl tère. Por li, s’ muchî è I’ feûme divnéve li momint d’ vrêye mêrpaujèrté.

Ele a dimèré ècwète, come èsoktêye, come tote ètîre èdwarmeûwe.

Tot l’ ovradje, tot l’ ayèssâdje vinéve di li. Èle ni poléve pus rin d’ lèye minme. L’ èssèradje dès brès, lès atokâdjes di s’ cwârp, l’ crouweû brodchâdje au fin fond d’ lêye, tot n’ èstéve ki sokiyâdje. I s’ a djoké èt s’ mète à ahananer doûcemint conte si pwètrène. Adon èle a comincî à s’ dispièrter.

Èle s’ a sibaré èt s’ dimander kwè èt kèsse ? Pokwè avéve-t-i falu çoulà ? Pokwè k’ ça lî avéve risatchî on si grand pwèds d’ nulêyes èt l’ rinde si tant paujêre ? E-st-ce ki c’ èstéve po d’ vrê ? L’ vrê-vrê do vrê ?

Doucemint

Doucemint s’ a disnuké l’ flotche dèl fine burtèle

Molemint rider dissu l’ blanke sipale èt lèyî rèche,

Tot purdant s’ tins, li mamuron, dèl dintèle.

C’ èstéve l’ awousse. L’ ièbe, li frumint èstîne tot sètch.

L’ djupon s’ a rabouloté, tot seû, à l’ cinteûre,

À pwinne ène miète rastaurdji pa lès tinres rondeus.

On vraî tåvla, on sondje d’ ârtisse pou ène pinteûre,

Ène vikante scultûre, tayêye dins dèl pîre à feu.


L' pia ki frumjîye,
L' mwin ki s' pormwinrne,
Au rcwèt dès frumints...
Alèz, m’ vîye,
Dji vs-î ramwinrne,
Î somadjî, on ptit momint.


L’ mârbe ki s’ a fé tchaur po s’ kandjî è feume.

On ptit djèsse dèl mwin po stramer lès tchvias.

L’ rigârd riglati, blametêye èt dès stwèles cosème.

Li fèl dårâdje èteûre mes brès, dins l’ cièl on êrdia ?

Vs’ awè, pwètrène, lèbes, ki m’ tièsse tchamboule.

Lès brûlants bètch, lès agnâdjes m’ ont si fwârt mârké

Ki dji n’ a pont d’ sovnance si vs’ènnn’ avîz tchoûlé.

Soûlé, tapé dins lès nuwâdjes, dj’ èstéve maké.


L' pia ki frumjîye,
L' mwin ki s' pormwinrne,
Au rcwèt dès frumints...
Alèz, m’ vîye,
Dji vs-î ramwinrne,
Î somadjî, on ptit momint.


L’ keûr ki toktêye, l’ mwin ki triyane, l’ botch ki s’ assètche.

Tot autoû l’ buwêye d’si stinde, n’ î pus rén voye.

L’ rodjîye massale k’ assatche co d’ pus lès gléteus bètch.

Li stoumac frumjîye, rwèdis, stitchîs, lès mamurons è djôye.

Pus moyin d’ comprinde l’ tchafiyâdje dès frochîyes lèbes

Arivé l’ momint do plêji ki riclot lès ouy.

Avîz fini pa somadjî èt rfrèchi l’ ièbe ?

Pont d’ rimimbrance asteure ki dins m’ tièsse tot s’ brouye.


L' pia ki frumjîye,
L' mwin ki s' pormwinrne,
Au rcwèt dès frumints...
Alèz, m’ vîye,
Dji vs-î ramwinrne,
Î somadjî, on ptit momint.


N’ arîz nén sogne d’ ène fîye nos î rivôye,

Di riprinde dins l’ ayîr dès bias sondjes po dimwin ?

Purdèz l’ bordon, kite à chalter tote li vôye,

Nos î d’ alans ariver à rifer l’ tchimin.


Mins vêlà, po cki èst d’ s’ î riprinde, n’ ratindèz rin.

Vos n’ aroz nén à sayî d’ prinde dès pôzes.


Pus moyin d’ m’ î rimète èt r’doner le bon côp d’ rin,

Minme tot sèrant lès ouy, sondajant à ôte tchôze.


Vêci, pus d’ pawè, rén k’dès tchèrdons, dès cruwåds.

I n’m’î dimère rén come coleûr po m’ vî pinçau.


L' pia ki frumjîye,
L' mwin ki s' pormwinrne,
Au rcwèt dès frumints...
Alèz, m’ vîye,
Dji vs-î ramwinrne,
Î somadjî, on ptit momint.