Martin Lejeune

http://wa.wikipedia.org/wiki/Martin_Lejeune

On doû

Eco l' famile duskwârtulêye !
On ome d'agrès quu l' cir nos print !
Eco 'ne pièle qui s' dufâfilêye
A grêye colier dès vîs parints !

Lu bodje du l'åbe, on côp d' tonîre
S'on éclair l'a tot fracassé...
On grand coûr a qwité s' prihenîre...
On avenir duvint on passé...

On croupèt d' pus' èl cwène du l'aite,
Bruzineûs èclôs d' nos doleûrs ;
One creûs qui sprâtche one ombe èt r'waite
Lès djônes cwêrs apwèrtant leûs fleûrs...

On no qu'on bènih, qu'on s' rèpète
Tot plorant, tot s' sèrant lès mains...
Mais wårdans l'espwêr qu'al copète
On djoû nos l' ruveûrans sûremint.

Twè qui fous tofêr on ègzimpe
D'oneûr, d'ovrèdje èt d' charité ;
Twè qui viquas tranquile et simpe,
So turtos duspårdant t' bonté ;

Twè qui por nos fous corne on pére,
Et, corne on pére, quu nos aimîs ;
Nos sûrans sins flawi, dj'èspére,
Lès pasês qu' tu nos as consîs.

Dwêr pâhûle : nos n' roûvirans måy
Lès leçons du t' grand coûr sins pris ;
Nosse coûr por twè batrè djoûrmây,
Tu souvenir nu sâreût pèri !

Divins : Œuvres lyriques du poète wallon Martin Lejeune
http://wa.wikipedia.org/wiki/Powinmes_Martin_Lejeune_%28live%29