Nwêr Bougnèt
C è-st-insi qu'on l' lomeut paç' qu'ès' pléji, c'èsteut d' djouwér dins l’ bèrdoûye, di fé dès ratatoûyes avè d' l'eûwe èt dèl têre, di ramonç'lér l' tchèrbon dins l' câve... In vré bèrnatî.
Èç djoû la, èl solia tokeut come an plin mwès d'awous' adon qu'on n'èsteut qu'ô mwès d' jwin. Èl dérin sèm'di, vèye dèl distribucion dès pris, èl Nwêr Bougnèt passeut l'après din.nér èyèt l’ niût dé sès grands parints, qui d'meurît al Djambe di Bos, èl long d' Sambe, a cint mètes dè s' môjo.
Mèmêre, c'èst l' djint qu'èle wèyeut l’ pus vol'tî ô monde ; pourtant, èl chouchou c'èsteut s' grande cheur. On pout l' com prinde ! Èle dèmeureut la dispûs qu'èle avent vu l'djoû ô cominch'mint dèl guêre. Is-avît yeû tél'mint dès rûjes pou l'èscapér - èle pèseut 'ne miyète di pus qu'in kulo -. Toudis èst-t i qu'ô fét-a fét qui lès-anéyes passît, èle mèteut toute èl parintéye dins s' poche.
Èle èsteut djolîye, djintîye, av'nante, travayeut bén a scole. Èle aveut dès longs tch'veûs tout doûs, tout crolès, si blonds qu'on-ôreut dit in tchamp d' blé près' a yèsse fôki. Lès wérès bièst'rîyes qu'èle fèyeut, èle lès mèteut su l' conte dè s' cheur qui n'èsteut nén a l'après d' yeune.
C'èst l' vré qu'èl Nwêr Bougnèt n'aveut pont d' bon plan. Si pa chance on lyi doneut 'ne pîce trawéye, d'vant d' rintrér a scole, èle passeut ô boutique du cwin ach'tér ène longue roudje bab'lute qu'èle tèteut avè pléjî, djus'qu'ô momint qu'èl pwinte fuche assèz fine pou piquî tous sès camarâdes. Èl seûle pwinte qu'èle n'ûseut nén, c'èsteut l' cène di s' crèyon pou scrîre sès d'vwérs.
El djârdin dè s' grand père èsteut si bia qu'il-âreut fét blèfér André Le Nôtre ; ètou, bén souvént come pûnicion, è1 Nwêr Bougnèt èsteut-st-oblidjîye di r'ssatchî lès doryphores aclapès su lès foûyes dès canadas ; èle lès mèteut dins-in p'tit saya èt saveut d'avance qu'is dalît fini dins l’ feu èt ça, pour lèy, c'èsteut insupôrtâbe.
Nén rèquis d' fé du mô a çès p'titès bièsses la, si djolîyes avè leû frake a royes su leû dos ; èl seûle solucion, lès r'tapér su lès canadas du vijin, çu qu'èle fèyeut sins balzinér quand l’ vî ome aveut l' cu toûrnè.
Èle aveut ètou dès longs tch'veûs, t't-ossi nwêrs qui lès céns dè s' cheur èstît blonds ; seûl'mint, pour lèy awè dès croles, on lyi stitcheut dès bigoudis d' fiêr qui n' manquît nén di tinglér s' visâdje come ène pia d' tambour... In vré suplice!
Èles djouwît toutes lès deûs su l' coû di d'vant quand in pècheû uke èl grand mère an riyant :
«Mâria, dalèz vîr ène miyète pus lon què l' pont, èl grosse Bèrta è-st-an trin d' nadji; èle è-st-a purète èy' on crwéreut qu'èle a mètu 'ne cuvèle corne culote. Dji vos djure, fôt l' vîr pou l' crwêre !»
T't-ossi rade, èl blondinète dèmande pou dalér, èt bén seûr, Mèmêre a ôte chôse a fé
«Vos n'avèz qu'a dalér avè vos cheur, mins dimeurèz lon assèz d' l'eûwe, vo moman n' vout nén vos vîr asto.»
Après-awè prom'tu di fé atincion, lès deûs cheurs s'èvont an djipant èt zoub'lant corne si èles-irît ô cirque. Fôt dire què l’ grosse Bèrta pèseut cint cénquante kulos!
Après-awè pèstèlè in bon momint, l'alâdje èsteut di pus-a pus strwèt èt èles n'avît co rén vu. Lès deûs ponts èstît woute dispûs lontins èt toudis pont d' balène an vûwe. Ou bén l’ cuvèle chèrvant d' culote aveut pris l'eûwe, ou bén l' grosse Bèrta aveut fini di fé peû ôs pèchons.
Èl Nwêr Bougnèt pinse qui c'èst domâdje d'awè fét ène si longue voye pou rén.
«Et si on trimp'reut sès pîds, istwêre dè sinte si l'eûwe èst boune...»
El guêre èst finîye dispûs seûl'mint trwès-ans èt lès trôs pèrfonds lèyis pa lès bombes dins Sambe sont lon d' yèsse èrbouchis. Maleûreûs'mint, èl grande n'a nén l' tins di prév'nu s' cheur qui c'èsteut danjeureûs... Trop târd, èle pètite èst d'dja ô fond!
Tout-an s' dèscoubatant, èle èrmonte in preumî côp an criyant : «Moman!» Èle a djusse èl tins d'ètinde èl pècheû d'an face ap'lant : «Ô s'coûrs ! Mi, dji n' sé nén nadjî ! », èle èrtchét in deûzième côp.
Sins trop sawè comint, èle èrmonte, èl grande l'apice pa in bigoudi, rèyussit a l’ satchî su l' pîssinte èt lyi fout dès bèrlafes ô rwèd bras tèrmètant qu'èl pècheû èrbeûle: «Sale djon.ne!» an ramassant sès-afêres èt s'èdalant, ès' bondif a 'ne mwin èt sès rosôs dins l'ôte, mwés d'awè vu ène parèye afêre.
Lès deûs-èfants l' chûv'nut dès-îs an r'pèrdant alène doûcèt'mint. Après saquantès munutes, èles cour'nut dins l' câriêre, an priyant l' Bon Dieu qu'on n' mine nén a ç' momint la... Fôt absolumint fé sètchî lès-abîy'mints.
Nûwe come in viér ô mitan dès grossès pires, èl Nwêr Bougnèt d'mande a s' cheur di twade sès loques avè lèy. An triyanant come in cint d' foûyes, èles mèt'nut tout leû keûr a l'ouvrâdje. Ene boune dèmîye eûre pus târd, èles s'èrvont al môjo dès grands parints an courant, s' dijant qu'insi, ça poûreut co sètchi 'ne miyète.
Tout d'in côp, d'ô lon, èles wèy'nut Mèmêre avè l' pècheû. Sins fé ni yeune ni deûs, él grand mere ès' dâre su l' Nwêr Bougnèt come ène aragne su in piqu'ron èt lyî fout cleûs bèrlafes a fé bouchî sès-orâyes.
«Vo mére èn' dwèt jamés aprinde ça, sins qwè ça s'ra co bén pire qu'èl bombardèmint da Matadi!»
Impossibe di racontér dès mintes, il-èst clér' qu'èl pècheû a fé dalér s' babèye.
Rintréye al môjo, Mèmêre ès' dispétche di donér dès sètchès loques ô Nwêr Bougnèt. Èle aveut a pwène fini d' s'abiyî què s' grand père rintère du djârdin, nôji d'awè sârkèlè, foûyi, sumè... brèf, ètèrtenu s' bouneûr. Tout-an r'ssatchant sès chabots, i soumadje :
«Dji seû skètè come ène vîye frake!»
Èrwétant s' feume co èfârfouyîye, i d'mande cu qui n' va nén èt naturèl'mint, èle lyi raconte èl pasquéye an brèyant.
La d'ssus, èl grand pére èrtoûne deûs bèrlafes ô sale djon.ne an r'beûlant come in djoû sins pwin. Al place di s' tére, èl pètite afrontéye a l' culot d' dire :
«I n'èst nén scran pou tout!»
Bèrdaf, i lyi dè tchét co deûs!
El lèd'mwin su l' côp d' deûs-eûres, èl moman arive aprèstér sès-èfants pou l' distribucion. El grande èst prèsse an wére di tins. Ène bèle bleûse cote, in roudje neûd su s' blonde tièsse, dès soquètes bén blantches èt dès p'tits nwêrs solérs vèrnis... Ène vréye princèsse, come dijeut toute èl famîye.
El Nwêr Bougnèt, on l'aprèsteut ô dérin momint pou yèsse a pô près seûr qu'èle dimeure prope. Moman cominche a r'ssatchî in bigoudi èt n' d'èrvént nén:
«Tènèz, c'èst co tout cru !»
Èle dè disfét deûs, trwès, quate... El tignasse èrtchét come dès baguètes di fusik. On-a yeû dès rûjes dè lyi fé crwêre qu'ilaveut ploû, seûl'mint ô d'zeûs dèl môjo d' sès parints! Lèy qui d'meure a cint mètes, èle a yeû râde compris èt lès bèrlafes ont tcheû come lès foûyes a l'ôtone.
El seûl avantâdje pou l’ Bougna, c'èst qu'i gn'a nén yeû dandji di mète du fard, cu qu'èle n'inmeut nén.
Èle a don gripè su l’ sène avè dès machèles bén roudjes dèl côse di toutes lès bèrlafes qu'èle aveut yeû pou awè fét in p'tit plondjon dins Sambe!
Mer 24 Fév - 16:09