Jean Goffart / Raecenes

L’èstvûve au bos

Dins nosse pètite maujo,
I gn-a in stûve au bos
Qui dispus près d’èn-an
Roudjit dins l’place di d’vant.
Nos-avons pris st-i-là
Maugré qu’i n’èst nén bia
Mins nos-avons bén tchaud
Quand on s’achid asto.
                       I n’èst nén fôrt grand, i m’plét bén
Mins dji vos l’dis, lèyèz-l’ d-aler
Quand pa-d’vant i s’mèt à tchaufer
Qwè ç’qu’on-èst bén à sès costés
Ene lumète pou l’fén prinde
Wèyèz, gn-a rén d’pus simpe.
Quand dj’é in djoû d’condjî
Au bos dji m’va voltî
Gn-a pont d’èfôrt à fén
Pou prinde dès môrts bouquèts
Faut dîre qui lès pus spès,
Font tout d’min.me pus d’èfèts.
                       I n’èst nén fôrt grand, i m’plét bén
Mins dji vos l’dis, lèyèz-l’ d-aler
Quand pa-d’vant i s’mèt à tchaufer
Qwè ç’qu’on-èst bén à sès costés
Surtout n’faut nén rouvyî
Tènawète d’èl quèrt’chî
Avou saquantès coutches
Spèsses come dès mantches di broutches.
Quand tout l’bos èst brûlè,
Et qu’i n’dimère pus rén
Nos stitchons dès briquètes
Pa d’z-oûs saquantès squètes.
                       I n’èst nén fôrt grand, i m’plét bén
Mins dji vos l’dis, lèyèz-l’ d-aler
Quand pa-d’vant i s’mèt à tchaufer
Qwè ç’qu’on-èst bén à sès costés
L’èstûve au bos, l’èstûve au bos
                       L’èstûve au bos, di no maujo.
Adon, nos nos r’tchaufons
Avou l’bia nwêr tchèrbon
Souv’nance dès vîs corons
Di no payîs Walon.
Lès roudjes èt djônes èr’flèts
Souvint m’fèy’nut pinser
Qu’i d’meure co èn-èspwêr
Pou no bia payîs nwêr.

Divins li stroete plake « Raecenes » (Racènes) on CD avou 22 tchansons da Jean Goffart, telefonez å 0495/155550 ou emilez a            jean.goffart35@gmail.com

serè rmetou e rfondou sol Rantoele 80

Dèclarâcîyon d’amoûr

Dj’voureu toudis vos prinde
Dins mès bras sins ratinde
Et vos dîre toute èm’ jwè
D’vos-awè rèscontrè,
Tél.mint dj’in.me bén d-aler
Avou vous m’pourmwin.ner
Tous lès sèm’dis au gnût,
Dins lès bos, sins fén d’brût,
Pace qui dins m’è p’tit coeûr
Dji r’sins bran.mint d’boûneûr.
Gn-a bén pacôps d’èl plouve,
Mins chaque côps, dji vos r’trouve.
Et qu’impôrte lès sésons,
Dji seu toudis dins l’bon.
S’i gn-âreut du fôrt vint,
Dji vos tind’reu bén l’mwin,
Maugré l’bîje qui chufèle
Su vos doucès machèles.
Et quand r’vénra l’prétimps,
Dji r’trouv’ré mès-années vingt.
S’i gn-âreut du solia,
Dji s’reu bén dins vos bras :
Dji r’trouv’reu co m’djon.nèsse
Pou vos fén dès carèsses.
Quand s’èvont lès nuwâdjes,
V’là qu’dji pinse au mariâdje;
Mins dji téns à vos l’dîre,
Qui ça n’sâreut yèsse pîre :
Qui d’toutes lès p’titès stwêles,
C’èst seûr’mint vous l’pus bèle;
Dji n’èm’ sins nén tout seû,
Et, dji d’è seu st-eûreûs.
In bètch su vo machèle :
Ca i èst, v’là qu’dji trembèle;
Dji trîyane come nén deûs
Pace qui d’vous, dji seû bleû.
Dji r’wéte dins vo côrsâdje,
Dji rèbrasse vo visâdje,
Qui dj’ôse à pwêne touchi
Peû d’sèrer vos bias-îs;
Vos bèlès mwins tindûwes
Em’ souwét’nut l’bénv’nûwe.

Cu qu’dji pou souwéti,
C’èst bén d’vos vîr voltî
Eyèt çoulà pou d’bon,
Enn’do...m’è p’tit pouyon!!!

Divins li stroete plake « Raecenes » (Racènes) on CD avou 22 tchansons da Jean Goffart, telefonez å 0495/155550 ou emilez a: jean.goffart35@gmail.com

serè rmetou e rfondou sol Rantoele 80

Dins l’bos

Dji wès voltî d-aler au bos
Eyèt dins lès pachis asto
Quand dj’muche dins l’paurt di sapins
Dj’roublîye mès pwênes èt tout m’trèyin
Dji choûte tchîpler lès mouchons
Qui r’djibèl’nut dins lès bouchons
Is tchant’nut du swêr au matin
Sins s’èbarassî du mwés timps
Gn-a vrémint di toutes lès sôtes
Qui s’èvol’nut d’ène couche à l’aute
Quand dj’arîve dins lès noj’lîs
Abîye ardent, dji m’racwètî
Adon, dji d’meure paujêre pa-d’z-oûs
En ratindant l’è p’tit spirou
Qui vént coude in moncha d’nojètes
Pou l’s-étassî didins s’catchète.
N’mîyète pus lon, courant dins l’bos,
I gn-a in bia p’tit clér richot
Qui disquind au-t’triviès dès spènes
Pou s’èr’trouver pa-d’z-oûs lès tchènes.
Su l’bôrd d’ès’ lét, gn-a plin d’cayau
Eyèt dès-ièbes didins leû trô.
Dès p’titès guèrnoûyes is sautèl’nut
Su lès grossès pîres, èles tchant’nut
Binaujes di trouver saquantès bièsses
Qui lyeûs don’ront in din.ner d’fièsse.
Pus lon, i m’chène yèsse dins in rêve :
Dji wès r’djibler in moncha di lièves
Is mindj’nut dès gros pichoulits
Dins leû p’tit bouquèt ètassîs.
Si dji chû èl pètite voy’lète
Dji wéte toudis, à gauche, à drwète
Pou yèsse bén seûr d’ènn’ nén rater
Lès bièsses qui s’catch’nut d’tous costés.
Durant dès-eûres, dji r’wéte lès fleûrs
Em’ n-âme ès’ gonfèle di bouneûr
Quand dji seû rolà, vrémint dj’vos l’dis
Pour mi, èl bos, c’èst l’paradis !