François Loriaux

https://wa.wikipedia.org/wiki/Fran%C3%A7ois_Loriaux

Dins lès rouwèles

1.

Quand l' boune séson nos-èst r'vènûwe,
Qui l' sève fét gonflér lès boutons,
Tèrtous, dins nous minmes, nos r'ssintons
In p'tit diâle qui nos r'mûwe.
Èt c'è-st-adon qu' lès-amoureûs
S'è vont, tout binôjes, deûs pâr deûs,
Profitér dèl séson nouvèle,
Dins lès rouwèles.

2.

S'is cach'nut lès p'tits cwins tranquîyes,
C'èst paç' qu'is-ont peû dès cancans;
L'eûre d'ôdjoûrdu, fôt yèsse mèfiant,
Gn'a pus qu' dèl djalous'rîye.
Ètou, quand vos l'sè rèscontrèz,
Vos wèyèz bén qu'is sont jin.nès;
Lèy, bache sès-îs èt li chufèle,
Dins lès rouwèles.

3.

Amoureûs'mint, s' tènant pal tâye,
Come i n' fét nén lâdje pou passér,
Il-arive qu'is vont pèstèlér
Ô mitan d'ène mèdâye;
Di toutes formes èt di toutes couleûrs,
I-gn-a du chwès, mins come odeûr,
C'èst toudis l' minme qu'on-èrnifèle,
Dins lès rouwèles.

4.

Al swèréye, muchi dins-ène âye,
Alèz-è choûtér leûs discoûrs:
"Dji vos wè vol'tî, m' chêr amoûr!",
Dit-st-i d'èn-ér' canâye.
Lèy, lyi rèspont: "P'tit diablotin,
Djokèz vous, èrtirèz vo mwin,
Vos cafougnèz m' bloûse di dantèle,
Dins lès rouwèles!".

5.  

A vîr leûs grimaces, leûs ramâdjes,
Èl lune qu'èst la dins l' grand stwèlî
Roudjit, èt pou n' pus lès wétî,
S' muche pa d'rî lès nuwâdjes.
Èt lèd'mwin matin, vos r'trouv'rèz
Swèt' in chignon, swèt' in côrsèt,
Ou co p't-ète bén 'ne pére di burtèles,
Dins lès rouwèles.

6.

Pus târd, an s' souv'nant d' leû djon.nèsse,
An s' rap'lant d' cès bias djoûs d' bouneûr,
Is-ont come in r'grèt dins leû keûr.
Èt mi minme, djè l' confèsse,
Quand dj' wè passér dès-amoureûs,
Souvint dj'é sintu, c'èst curieûs,
Ène lârme qui v'neut mouyî m' purnèle,
Dins lès rouwèles.

----
----
Djè sû sôléye

1.

Djè sû l' mèyeû gârçon dèl têre,
Jamés malâde, toudis contint;
Seûl'mint, dj'é l' passion du p'tit vêre:
Ç' n'èst nén in crime, asseûrémint;
Èt quand dj'é bû saquantès goutes,
Què m' tièsse comince pa s'èstchôfér,
C'è-st-adon què dj' sû bén an route,
I fét dificîle m'arètér.

Rèfrin

Djè sû sôléye,
Dj'éme lès potéyes;
On-a chacun sès dèfôts.
Toute èl swèréye,
Minme dins l' djoûrnéye, ,-
Dj'éme a tûtér come in trô.
Mins lès mèd'cins,
Ça, c'èst cèrtin,
Avou mi, crèv'run' di fwin.
Ami, choûtèz,
Pou vo santè,
Èn' buvèz qu' du pèkèt!

2.

Èç' dèfôt la, djè tén d' famîye.
Im' pa 'steut l' pus fôrt dès buveûs
Èyèt m' marne, èstant co djon.ne fîye,
Èle aveut d'dja ès' né tout bleû.
Mès cheurs, qwè qu'èstant toutes mâriéyes,
Ont consèrvè leû p'tite passion.
Tins qu' leûs-omes fèy'nut leû djoûrnéye,
Yeûs', èles fèy'nut sôt'lér l' bouchon.

Rèfrin

Nos 'stons sôléyes,
Toute èl pèkéye;
On-a chacun sès dèfôts.
Toute èl swèréye,
Minme dins l' djoûrnéye,
Nos satchons come dès vrés trôs.
Mins lès mèd'cins,
Ça, c'èst cèrtin,
Avou nous,
crèv'run' di fwin.
Ami, choûtèz,
Pou vo santè,
Èn' buvèz qu' du pèkèt!

3.

Èm' feume è-st-assèz volontére,
Mins dès-èfants, ça, ç' n'èst nén s' gout.
Èt mi qui voureu tant yèsse père!
Djè vos di ça, c'è-st-intrè nous;
Èt quand djè dè pârle a m' Chârlote,
Èle mi rèspont: "Téje tu, soûlôd,
Ô lieû dè li donér l' suçote,
Tè li freus p't-ète bwâre in flèch'tô !".

Rèfrin

Djè sû sôléye,
Dj'éme lès potéyes;
On-a chacun sès dèfôts.
Toute èl swèréye,
Minme dins l' djoûrnéye,
Dj'éme a tûtér come in trô.
Mins lès mèd'cins,
Ça, c'èst cèrtin,
Avou mi crèv'run' di fwin.
Ami, choûtèz,
Pou vo santè,
Èn' buvèz qu' du pèkèt!

4.

Dj'é souvint a fé al police
Èt, quand dj'é bû 'ne miyète di trop,
Il-arive télcôp qu'on m'apice
Pou m'èrmin.nér a l'amigo.
Dérèn'mint, d'vant l' corècsionèle,
On m' jujeut pou chambardeumant.
Come èm'n-afêre n'èsteut nén bèle,
Dj'é rèspondu an m'èrluvant:

Rèfrin

"Djè sû sôléye,
Dj'éme lès potéyes;
Dj'avoûwe qui c'è-st-in dèfôt.
Toute èl swèréye,
Minme dins l' djoûrnéye,
Dj'aveu tûtè come in trô.
Dj'èsteu zinè,
Èt v'la pouqwè
Dj'é rèmoulu l' cabarèt.
M'ssieû l' Présidant,
Dj' sû boun-èfant,
Prononcèz m'n-aquit'mant!".

5.

In bia djoû, djè d'vré quitér têre,
Èt co p't-ète bén sins m' consint'mint.
Adon, c'è-st-adieu lès p'tits vêres;
Djè m'in-iré tout d' minme contint.
Su m' tombe, djè vou ène bèle grosse pîre
Èyant toute èl forme d'in cruchon;
Come ètiquète, on poura lîre
La réclame de la maison:

Rèfrin

C'è-st-ène sôléye
Ci ètèréye;
I saveut bwâre come in trô.
Toute èl' swèréye,
Minme dins l' djoûrnéye,
I satcheut sins d'awè s' sô.
Mins lès mèd'cins,
Ça, c'èst cèrtin,
Avou li crèv'run' di fwin.
Ami, choûtèz,
Pou vo santè,
Èn' buvèz qu' du pèkèt!

Mârdjo

(rèfrin populére)

1.

Come dji fé vol'tî 'ne boune pans'léye,
Vos dè rap'léz co, m' chère Mârdjo,
Dj'aveu conv'nu, l'anéye passéye,
Qui nos dirun' din.nér dins l' bos.
Ô randéz vous, vos 'stîz kèrtchîye
Di boustifâye, plin vo tchèna;
Mi, dj'aveu pris dèl chârcut'rîye,
Paç' qui c'ît vo gout du pourcha.

Rèfrin

Mârdjo, Mârdjo, Vos rap'léz co,
Â, mon dieu, qué djoûrnéye!
Mârdjo, Mârdjo, Vos rap'léz co
Di ç' djoûrnéye la dins l' bos?

2.

Nos-avons disbalè l' dinréye
A l'ombrâdje d'in gros maronî ;
Mins, bén dès bièsses, sintant l' vènéye,
Astun' vènûwes pou d'assayî.
Dj'èrwè co lès nwêrès coupiches
Couru pa t't-avô lès rèstons.
Nos v'lun' lès pourchûre, mins bâ wich,
Èles s'èrdôrun' dissus l' djambon!

Rèfrin

3.
In p'tit mouchon, nom d'ène pètote,
A minme léchi tchér' ène saqwè
(An walon, ça s'apèle ène crote)
An plin dins vo jate di cafè.
Èyèt mi minme, an vûdant l' mène,
A rén près, dji manque d'astrukî;
Dji v'neu d'avalér 'ne grosse alène
Qu'asteut d'meuréye didins m' goyî!

Rèfrin

4.

On s' d'a quand minme foutu 'squ'al gâye;
Tout fét farène dilé l' moûnî.
Vos-avèz d'vu disfé vo tâye,
Mi, dji n'âreu pus seû bôyî.
Nos nos-avons r'pôsè 'ne miyète;
Adon, v'lant fé dès cumulèts,
Quand vos fèyîz l' pwèrî, m' pouyète,
Dji wèyeu l' lune di l'ôte costè!

Rèfrin

5.
V'nant dé mi pou r'prinde vo-n-alène,
Vos d'sîz: "Sintèz come èm' keûr bat..."
Èt come d'èfèt, m' pètite poupène,
Mins ç't-avou m' né qu' dj'é sintu ça.
Pa d'rî, vos-avîz 'ne santinèle
Come ène pètite tôte ô côrin;
Èrtirant vo cote a dantèles,
Vos-avèz du r'nètyî l' papin!

Rèfrin

6.

Pou vos fé roubliyî vos pwènes,
Dj'é djouwè su m' chuflot d' blanc fiêr
Dès roûlâdes èt dès-ârguèdènes
Come on n'ètint dins pont d' concêrt.
Mins tout d'in côp, v'la qui l' champète,
Ô bon momint tchét su no dos
An d'sant: "Dj' vos cole, nom d'ène bèrwète!
On n' pout nén musiquî dins bos!"

Rèfrin

7.

Èstant tôrdjûwe l' djoû d' no fèrdène,
Vo mame vos-a co rasclôwè.
Ça prouve qu'i gn'a pont d' rôse sins spènes,
Mins, dins quinje djoûs, nos s'rons mâriès.
Sins maleûr, al séson florîye,
Quand nos-è dirons co dins l' bos,
Nos-ârons 'ne pléjante pètite fîye
Qui r'chèn'ra tout s' papa Djandjo!

Loukîz a: https://wa.wikipedia.org/wiki/Mardjo_(tchanson)