François Duysinx

A beûre !


Volez-v’ mi dîre çou qui n’ beût nin
Chal so nosse monde ? Li tére beût bin :
Ratindez ‘ne gote qu’ i ploûse !
L’ âbe beût l’ tére . Moûse beût , lèye ossu :
Ele beût l’ êwe d’ Oûte, èt l’ solo lu ,
A s’ toûr beût l’ êwe di Moûse.
Adon , pocwè brèyez- v’ sor mi
Cwand c’ èst qui dj’ vou beûre , mès-amis ? ...


               François Duysinx          Stavelot  ,  1992

Adaptation d’un poème anacréontique

E rfondou walon cial: http://rifondou.walon.org/powezeye_redjaurb.html#anacreyon

1945


Il èstît la d’pôy dès-annêyes,
        Foû d’ leû payis,
Po-drî dès griles todi sèrèyes,
Bin lon èrî d’ leûs binamèyes
        Et d’ leûs mèstîs .
Lès saminnes si disfligotît...
Il èstît la, tos-omes eèssonne ;
Il èstît fwèrts, il èstît djonnes,
Et s’ n’ avît-i rin d’ ôte à fé
Qui dè sayî di s’ rapinser,
Qui dè sayî d’ catchî leû ponne ...
Estît la turtos rèssèrés
Come dès – oûhês divins ‘ne prîh’nîre,
Come dès bièsses po-drî leûs bârîres,
Avou leûs mousseûres di sôdârs,
Leûs vèyès hâres di l’ an carante
-Quéne bièsse di guére ! Arive qui plante !-
Mins po s’ bate il èsteût trop târd...
Il èstît la d’pôy dès annêyes,
         Lon èrî d’ tot,
Erî dès cis qui s’ batît co,
Qwand-i vèyèt s’ lèver l’ solo
          So l’ grande djoûrnêye !
Avou l’ meûs d’ may- li meûs dès fleûrs -
Lès pwètes si drovièt d’vant l’ boneûr
Et vo-l’zès-la qui r’trovèt l’ djôye,
Et vo-l’zès-la qui r’prindèt l’ vôye
           Di leû payîs,
Et qu’ rabrèssèt leûs binamêyes,
Zèles qui dispôy tant dès-annêyes
            Lès ratindît...
Et ç’ fourit l’ pâye... – Guére, seûye mâdèye !


François Duysinx          Stavelot   1995

E rfondou walon sol pådje do scrijheu sol Wiki walon:
https://wa.wikipedia.org/wiki/Fran%C3%A7ois_Duysinx#Onk_di_ses_powinmes

PATER

Pére, vos qu’ èst-st-è Paradis, qui vosse sint nom seûye bèni !  Qui chaskeun’ vi rik’nohe po s’ mêsse èt qu’ tot s’ plôye a vosse volté chal so nosse tére come lahôt !   Dinez-nos, tos lès djoûs d’ nosse vèye, li pan qu’ i nos fât po viker ! Si n’s-avans fêt quéqu’ mâcûle, i fât nos pardoner come nos sayans dèl fé qwand ‘ne saquî nos-a fêt dè mâ . Ni lèyîz nin l’ diâle nos tem’ter, mins d’çou qu’ nos pout piède vinez nos sâver !