Li mwért do tchin
Tot-èstant qu' lès deûs-omes tapît 'n' si fête copène,
I n-aveût là djondant on tchin tot long stindou.
So l' côp i r'lèva s' tièsse èt stitcha sès-orèyes.
C' èsteût Finèt: Ulysse l' aveût-st-apreume drèssî
Qui d'va 'nn' aler à l' guère, sins n' 'nnè poleûr djouwi.
Divins l' timps, lès djônês l' èminît-st-avou zèls
Po sûre l' arote dè ciér, dè lîve ou dè tchivroû.
Asteûr, on l' kitapéve, câse qui l' mêsse èsteût lon.
I d'manéve sitâré, tote djoû, so l' ansinî,
E plin mitan dè l' coûr, là wice qui lès vârlèts
Vinît tchèrdjî lès tchârs po-z-ècrâhî lès téres.
I d'manéve sitâré, tot k'magnî dè l' vèrmène.
Mins qwand i vèya l' ome qui passéve adlé lu,
So l' cô, i hossa l' cowe èt baha lès-orèyes,
Et s' vola-t-i hèrtchî : mins, i n' poléve pus hop !
Ulysse, è cwène, l' aveût loukî. I r'horba 'ne lâme
Et dèri-st-â hièrdî sins fé lès cwanses di rin :
" Hièrdî, qué drole di tchin coûkî là so l' ansène!
Il-a co bèle av'nowe, mins dji m' dimande vôrmint
S'il-èsteût si subtil po cori so l' djibî !
Ni ravizéve-t-i nin onk di cès tchins d' sâlon
Qui lès djins dè l' nôblèsse gâliotèt po l' mosteûre ?"
Et d'vins s' rèsponse, adon, li hièrdî lî dèrit :
"E bin, c' èst l' tchin d' nosse mêsse, qu' èst mwèrt â lon payis.
Âreût falou vèyi kimint qu' l' èsteût vol'trûle
Qwand Ulysse nos l' lèya po prinde li vôye dè l' guère !
Et vîgreûs ! Et subtil ! Ci n' èsteût nin à creûre !
Si vite qu' â fond dès bwès, il-aveût odé 'ne bièsse,
I n' pièrdéve pus l' arote: li prôye èsteût da sonk !
Oûy, vo-l'-la mèsbrudjî! Li mêsse a trèpassé
Bin lon d' chal. Lès mèskènes n'ont por lu pus nole sogne.
Lès sudjèts, c' èst-st-insi: d' abôrd qu' on n' lès mine pus
I k'brôdèt leûs-ovrèdjes èt s' n'ont-i nole èhowe !
Dismètant qui d'visît, il-intrît-st-è lodjis'...
Mins, so l'oûy da Finèt, l'âbion dè l' mwért passa,
La qu' aveût r'vèyou l' mêsse après tant dès-annêyes !
ratournaedje di l' Odissêye.
e rfondou: https://wa.wikipedia.org/wiki/Odiss%C3%AAye
Mer 23 Mai - 5:46