Les eures del veye
(entre parenthèse, les formes régiolectales à Piétrain, Brabant wallon, nécessaires à la rimes)
E vnant å monde, l' efant bodje les aweyes
A l' ôrlodje ki mårkêye les eures del veye
Al prumire eure, on vout ddja vey pus lon
Cwand serè grand, a cwè serè-t i bon?
L' eure di s' prumî sorire k' on s' rafeye tant
Ci serè bén seur po s' djintêye et doûce moman
Vénrè après l' eure di ses prumîs pas :
Kéne binåjhté po s' moman et s' popa
Vola l' eure di ses prumîrès paroles
Adon vénrè l' eure po-z aler a scole
Et a l' eure k' on va fé ses påkes
On croet co tertos å miråke
Vola ddja l' eure d' aler sôdår
Et å payis, d' ofri s' djonne coir (cwâr)
O ! Li bele eure des rindez-vos
Ou çk' on court tertos come des fôs
On va passer on laid cwårt d' eure :
Fåt-st aler al guere: ké måleur !
Mins a l' eure k' on n' î oize pinser
L' eure del liberté va souner.
Des bråves n' ont nén cnoxhou l' victwere
Leus coirs ont rôlé dins l' poûssire (poûchêre)
C' est l' eure do sondjî å mariaedje
Et a deus di s' mete e manaedje
Ene miete pus tård, c' est l' boune novele :
On gros gamén? Ene bele båshele ?
Maria Todi ! Ké bea efant
Ki dirè rade popa, moman !
Ådjourdu, i fårè sondjî
A bouter pus foirt, sins låtchî.
Fåt nouri on manaedje, asteure
Cobén çk' on va wangnî a l' eure ?
Les eures pasnut; on les roveye
C' est come les pådjes k' on toûne dins s' veye.
Byin des vint cwatre eures vont souner
Divant k' vegne l' eure di disteler
Est çk' on-z a travayî assez ?
N' est ç' nén l' moumint di s' ripoizer
Les eures seront doûces dins l' viyesse :
I n' årè co des beas djoûs d' fiesse.
Vla béntoit l' moumint des adiès (adiës)
Serè l' eure k' on n' rivénrè pus (pës)
On dirè d' nos: il est moens l' cwårt
Li dierinne eure, c' est l' eure del moirt (mwârt)
Ç' serè adon l' dierin sospir (sopër)
Tot çki shuvrè, on nd årè d' keure (këre).
Mer 7 Nov - 12:29