Gn a ene sacwè ki m' a todi sbaré dins les pîces di teyåte e walon. C' est kel redjixheu (u l' mwaisse del djowe) cåzéve e francès avou les djouweus.
Ça fwait ki les djonnes ki, d' astcheyance, saynut di s' rimete å teyåte, i voeyèt bén do côp ki tot çoula est artificiel. Dj' ô bén : ki ces djins la n' ont nén l' dår k' on rcåzaxhe e walon pattavå l' Walonreye.
Pareymint, les stadjes di l' UCW po les djonnes comedyins, i sont moennés ... e francès. Yves Paquet - li Bon Diu si åme - s' aveut margayî po çoula avou les boss di l' UCW, mins, al vude. I paretreut k' on n' si comprind nén si on cåze tertos e walon.
Ça fwait ki dji pinse ki les djonnes divrént dmander ås "vîs" ki djouwnut avou zels, d' elzî djåzer e walon, eto foû des repeticions eyet del pîce.
Insi, gn åreut motoit des ôtes djonnes ki vénrént, rén k' pol plaijhi di dvizer e walon podbon (et nén tot-z aprindant on tecse come a scole, et dins on lingaeje ki, por zels, est ene "langue etrindjire", cobén).
Dji va sayî di fé del riclame po ci fyi ci do forom, po-z aveur des ôtè djins ki vénront "dire li leur".