Nicole Goffart

http://wa.wikipedia.org/wiki/N._Goffart

Vo rcial li tecse k' est so Wiki, mins redjârbé avou l' accint d' Transene (po on câbaret walon a Bive li dimegne 29 di mâss).

Tchanson :

Dj’ ê èn ordinateûr

(su l' êr du "Au lycée papillon")

I. Gn è ddja bin lontins ku ça m’ tracassot / Du vey k’ il avint tourtous leu PC / Et mi l’ Ancyin Belje, mi dju scrîjo co / Avu 'ne viye machine prète a s’ dusmantcher / Ossi, dju m’ ê dit / K’ il astot grand tins pour mi

Resplè : Dju n’ su toulminme nin si biesse / Et dj’ ê in pô d’ instruccion / Dju frê bin clicli / Avu ene sèris / Come toulmonde, nondinon !

II. Ça fwèt k' dj' ê sté vey lu Louwis Bêdjot / Ki m’ è dit du côp k' dj’ avo bin rêzon / Ku dj’ asto capåbe, come li, nondidjo / Du sîre les programes Linux a walon / K’ èn ordinateur, / On s’ è rsiervot su ene eure.

Resplè : Dju n’ su toulminme nin si biesse / Dj’ ê minme in pô d’ instruccion / Dju frê bin clicli / Avu ene sèris / Come les ôtes, nondinon !

III. In djoû å matin, dj’ ê monté su Bive / Amon l’ Leyonet achter in PC / A l’ coumére dud la, dju lî ê dit tout fiér / C’ est ene copiutrece ku dj’ vôro achter / Mês in ptit cayet / Come pou les cés ki cmincèt.

Resplè : Dju n’ su toulminme nin si biesse / Et dj’ ê in pô d’ instruccion / Po fé des cliclis / Avu vosse sèris / Dj’ aprinrê bin mes lçons.

IV. La bwêçèle mu djit k’ c’ astot l’ bone adresse / K’ a s’ boutike, dju trouvro mou åjîmint / Mins k’ i falot bin rwêter al vitesse / Et al mèmwâre pou-z ovrer raddumint / K’ avu ses indjoles, / Il alot falu k’ ça vole.

Resplè : Dju n’ su toulminme nin si biesse / Dj’ ê minme in pô d’ instruccion / Dju frê bin clicli / Avu ene sèris / Cand dj' årê pris des lçons.

V. Ça fwêt dpus d’ chîs mwès k’ ça est al måjon / Dju m’ sin ene ôte ome, assî a m’ bûrô / Mês gn è la sèris ki spite dins les cwanes / Sins k’ dj’ el pôye fé mete al bone pôzicion / Mês dj’ fwè des progrès / Dins chîs ôtes mwès, ça irè.

Resplè : Dju n’ su toulminme nin si biesse / Dj’ ê minme on pô d’ instruccion. / Mês pou fé fé clicli / A 'ne ramchiante sèris, / I fåt d’ l’ aplicåcion.

VI. Dj’ ê pourtant sayé toutes sôres du cayets / Du pwin su s' tapis et m’ tchet padrî mi / Mins gn è nin moyin du la fé schoûter / Et k’ elle arètrot du m’ fé aradjer / Ele supite, ele pite / Ele pestele ey ele gripe.

Resplè : Dju n’ su toulminme nin si biesse / Dj’ ê minme on pô d’ instruccion. / Mês pou fé fé clicli / A 'ne hamåle sèris, / I fåt bin tnu l' bouton.

VII. Enute å matin, dj’ ê fwêt ene nûve saye / Dju lî ê fwêt choûter dul muzike da nôs / Ebin vous m’ crwârez, û nu m’ crwayèz nin / Mês dj’ ê veu du côp in fâmeus tchandjmint ! / Lu Wiyam Dunker / L’ è rindu mou påjêre.

Resplè : Çu n’ astot nin co si biesse / Gn av' nin dandjî d’ instruccion / Po fé fé clicli / A 'ne pitite sèris / Lî fåt dire a walon.

(2ime côp) Pou rmète les idêyes a place / Du tous les cés ki nu ls ont nin / Siervèz vs dul muzike / Dul muzike walone / Gn a rin d’ té, nondidom !

(cåzé) Il avint metu su m' papî "gn a rin d' té godferdom". Mins dji vos l' dirè platezak, mi "godferdom", ci n' est nén walon. Minme pou ene boune dringuele, dji nel direu nin su ene sinne.

(redjârbé pa Lucyin Mahin)