http://wa.wikipedia.org/wiki/J._Calozet
Moirmont
A droete del rote di Forire a Sint-Houbert, houte di Marbor, i gn a cwénze måjhons agritchtêyes so on tier et cwarante-troes djins po tot potaedje. C' est Moirmont : cwate måjhons so Nåwinne k' est a troes cwårts d' eure did la, et onze so Masbor, a ene dimeye eure lon.
Låvå, dins les prés, si ctoide li Masblete, ki vént des bwès d' Sint-Mitchî.
Ci ptit viyaedje la doet esse foirt foirt vî, paski les mwaijhès lonwes racontèt ene istwere ki s' î åreut passé vola des cints et des cints ans, manire di discåzer les Moirmonîs ki vikèt todi inte zels (sapinse k' on n' dit, en marge del civilizåcion).
Dji m' vos l' va dire, come dji l' a-st oyou mi-minme, mins, inte di nozôtes, dji n' î croe nén pus k' ça.
On djoû, sint Mårtén eraléve a Nåwinne ki c' est lu l' patron do viyaedje. Si tchvå n' saveut pus hay d' aveur tchamté tote li sinte djournêye, et d' aveur ridschindou l' Tier des Gades e rivnant d' Nassogne. Il esteut arivé a Moirmont, Gn aveut djustumint ene viye feme dissu s'-n ouxh. Ele droveut des grands ouys, tot ewaerêye k' elle esteut di vey li cavlî.
- Mi boune djin, dit-st i, pôreu dj' trover a lodjî e viyaedje ?
- Gn a nén moyén, monsieu, k' ele respond e tronnant.
Sint Mårtén zoubele a tere po copiner on pô avou l' viye djin.
- Oho ! dit-st ele tote rapåjheye, ça s' dismonte ! Intrez, monsieu, vos åroz a lodjisse.
divins "Les Cahiers Wallons", l° 2, moes d' fevrî 1950.
Mar 23 Mar - 4:08