Jacques Dupuis

(asteme ! scrijhaedje nén ehåyî)

C'este djoûdi dichnoûfe d'oktôpe doemeye chiche.

Haïr merkidi il'a stî a Bîfe avou s' kamarôde Willy po z'allè raprinte leu vî lingadje.

Komme il è co bin tiesse è l'èr, è pîr!, ki s' dûr tiesse zoupelle pu voltî su sès proprèz ideyes ki d'sîre çu k'ul messe leu di, il a stî komissionnè d'fè on skriadje su li spètin è moutwè ossi sul rotche bonnette.

I fô seppe k'il a sti èfan tin d'ol guère, k'onne môjhon l'zi a toumè su l'tiesse à torto djusse divin nonne on dîmègne à Môrlonye li vingt è ionque di maye mil noûf cin kwarante kwate. Li gamin aveuve deux ans. Fô seppe k'adon i z'ont stî fwarçès d' enn'alè! Ma d'où? Nin a Rotchfwar su'l voye di Cinè addé li pu vi monnonke Huber è s'femme li matante Mareye d'où çki gn'aveuve dèdja cink pititès bauchelles è ko d'z'aute , adon i z'on stî addé l'matante Guerite è l' pârin Pol su'l voye di Lîdje nin lon do l'matante Lucienne k'esteuve Carmélite. Nin à Rotchfwar mais à Môtche da! Hè d'où à Môtche dijhé-ve? Bin addé onne groumeleuse matante k'aveuve kwate djonnes gamins pu vî k'li.

Li k'a Morlonye esteuve todi din le grands, avou s'gran-man k'esteuve veuve, avou s'man, avou s'pa, one soûr d'a s'man, si djonne monnonke di di-hût an, avou torto ki l'rapautchteufe, i s'a r'trovè adon après on be vicadje avous to grans, dri sè kwates cusins din leu bês tossi bin k'leu mwês kons.

Po le fè choûtè faleufe k'i z'èye sogne. Gn'aveuve ki l'pawe po le fè rote dreu, è ko bin one pingnée. I n'fâ nin si sbarè adon di veye ces mannès djonnes pèt'è vôye poz'allè koru din lè bwès è ko bin rintrè al nut aprèz' aveur riwètè bisè le biesses avô le tchamps è ko bin lè avè fè koru si el ni bizin nin fwâr assè por zè, ratinte sul bôr do Trotti ô fosse è rwêtè ô neur tron po s'fè sogne torto essonnne avou l'biesse, riwètè l'êwe brotchè fou d'ol tère a l'rotche do fond des vaux è s'y r'piète vingt metes pu long.

Adon kwant i rintreuve i fzéve ko bin neur et co d'pu. En z'è ralan al mojhon i passin su le pon d'ol martchette po veye li batard'eau. "Wète à twè sésse Djôke dijhéve-t-i li pu vî des cusins, podzo gna l'rodche bonnette ki va vnu t'hapé." Tèches-tu" dijhéve li Djoke, "elle n'est nin voci elle est à Rwè din l'pousse d'a nossonke Firmin. I m'la co di l' kwinsse d'aousse à l'fiesse. Vossi c'nest nin d'ol rotche bonnette ki fô zavou sogne mâ do spè tin. Wette avou totte vo biestreyie autou do trotti ô fosse è ô sourdan dol Martchette no estan co su l'voye kwant i fè neur. Mi dji su todi drî vo. Adon ci n'est nin di m'fôte si on rintur'si tôr, avou vozonte c'è todi ainsi"

Ni va nin dire çu k'onz'a fwè avou le brocale k'on z'a happè din l'brocalî k'è sul'dresse d'ol tchanme addé li stoufe sésse Djoke. "Dji n'dirai rin" respondeve li Djôke k'aveuve è s'potche li vî briquet d'a s'monnonke è ki to seu lon d'sè cusins sayeufe di mette li feu à l'rèzenne d'onne pesse tin k'zè li fieuve bin broulè avou leu brocales. çu ki fwô dire asteure c'est ki n'on nin fwè pire ki le Américains.

Car kwan l'ovrèdje esteuve là, iz'y bouteuve torto essonne. Li Djôke qu'esteuve li pu djonne riwèteuve bin asn'aise kimin c'ki falleuve fwè, è to seu, kwan le grands esteuve voye i fieuve kom zè. Rintrè l'bwè, li soyé è bokets lon d'onne mwin avou li soylète da mononke Edmond, le rfinde avou l'cougneye su l' blo, le rintrè din l'kûhenne, fè de p'tits bwès avou i'sauplette poz'alumè l'feu à matine, rinètché l'corti, ploucté les gruzalles, allè mechnè po les pon-ye, gnaveuve todi à fwè, kwan c'esteuve li saison de tchampions falleuve ko z'y allè. on purdeuve on tchenna è èvoye fou de pî de parins. çu k'esteuve bin, c'è ki gn'aveuve ossi de comméres ki kmincin a sfè femme, è kan on z'alleuve aux crompires qu'elles tineuve li sac c'esteuve bin plaisant d'olzy veye li cour din leu finnè blouse ki bayeuve. Gnaveuve Madeleine, li feye d'a Lowisse è Djonzef one miète pi vye ki Djôke k'inmeuve co bin rire avou li. Si bin klè mans le apèléve co bin po sèpe çu ki fizin drî le lilas

Gnaveuve ossi la Christiane li feye d'à Denise è s'sour onn' Madeleine ossi. Leu pa aveu stî pris pa les SS è touè à Bande. C'esteuve on Malempré di Lîdje. lz estin deux Malempré à hantè le deux commères Denise et Guerite do Tchaplî à Rwè. Onke esteuve dèdja mariè, l'ôte ni l'esteuve nin co. Guerite s'a mariè avou Georges Batter. Iz ont yu deux gamins André è Marc.

Djôke dè Kambuse

Rimetaedje e Feller :

C' èstèt djoûdi dîj-noûf d'octôbe deûs meye chîj.

Ayîr mèrkidi, il a stî a Bîve avou s' camaraude Willy po-z alè raprinde leû vî lingadje.

Come il èst co bin tiesse è l'èr, èt pîre, ki s' dûre tiesse zoupèle pus voltî su sès propès-idèyes ki d' sîre çu ku l' mêsse lèzî dit, il a stî comissionnè d' fè on scrîyadje su li Spètin èt moutwèt ossi sul Rodje Bonète.

I faut sèpe k'il a stî èfant tins d'ol guère, k'one maujon l'zî a toumè su l'tiesse à tortos djusse divant nonne on dîmègne à Maurlônye li vint-èt-yonk di may mil noûf cint cwarante-cwate. Li gamin aveûve deûs-ans.

Faut sèpe k'adon is-ont stî fwarcès d' enn' alè ! Mas dou ? Nin a Rotchfwart sul voye di Cînè, addé li pu vî monnonke, Hubert - èt s' fème, li matante Mareye -, dou çk' i gn aveûve dèdja cink pititès bauchèles èt co ds-ôtes. Adon is-ont stî addé l' matante Guèrite èt l' pârin Pol sul voye di Lîdje, nin lon do l' matante Lucienne k'esteûve Carmélite. Nin a Rotchfwart mês à Mautche, da ! Èdou a Mautche, dijez-v'? Bin addé one groumleuse matante k'aveûve cwate djonnes gamins pus vîs k' li.

Li k'a Maurlônye esteûve todi dins le grands, avou s' grand-man k'esteûve veuve, avou s' man, avou s' pa, one soûr da s' man, si djonne monnonke di dîh-ût ans, avou tortos ki l' rapaujteûve, i s'a rtrovè adon après on bê vicadje avou tos grands, drî sès cwate cuzins dins leûs bês tossi bin k' leûs mwês cônps.

Po l' fè choûtè, faleûve k'il èye sogne. Gn aveûve ki l'pawe po le fè rotè dreût, èt co bin one pingnée. I n' fât nin si sbarè adon di vèy ces mannèts djonnes la pètè voye po-z alè coru dins lès bwès èt co bin rintrè al nute après-aveûr riwètè bizè lès biesses avau lès tchamps. Èt co bin lès avè fè coru si èle ni bizint nin fwârt assèz por zès.

Ratinte sul bôrd do Troti au Fossè èt rwêtè au neûr trôn po s' fè sogne tortos èssonne avou l' biesse. Riwètè l'êwe brotchè fou d'ol tère a l' Rotche do fond des vaus èt s' î rpiède vint mètes pus lon.

Adon, kwand i rintreûve, i fzeûve co bin neûr et co dpus. En z-è ralant al maujon, i passint su l' pont dol Maurtchète po vèy li "batardeau".

- "Wète a twè, sésse, Djauke", dijéve-t-i li pus vî dès cuzins, "podzo, gn a l' Rodje Bonète ki va vnu t' hapè." Téje-tu" !" dijeûve li Djauke, "èle n'èst nin voci. Èlle est à Rwè dins l' pousse da monnonke Firmin. I m' l'a co dit l' cwinze d'awousse a l'fiesse. Voci, ç' n'est nin dol Rodje Bonète k'i faut-z avou sogne mas do Spètin. Wète avou totes vos bièstrèyes autoû do Troti au Fossè èt au soûrdant dol Maurtchète, nos èstans co su l' voye cwand i fèt neûr. Mi, dji su todi drî vos. Adon, ci n'èst nin di m' faute si on rinture si taurd. Avou vozôntes, c'èst todi insi !"

"Ni va nin dire çu k'on-z a fwèt avou l' brocale k'on-z a hapè dins l' brocalî k'èst sul dresse dol tchanme addé li stoûve, sésse, Djauke !" "Dji n' dirè rin", rèspondeûve li Djauke k'aveûve è s' potche li vî briquet da s' monnonke èt ki, tot seû lon d' sès cuzins, sayeûve di mète li feû a l' rèzène d'one pèce tins k' zès li fyint bin broûlè avou leûs brocales. Çu k' i faut dire asteure, c'èst k' is n'ont nin fwèt pîre ki lès Amèrikins.

Ca cwand l'ovrèdje esteûve la, is-î boutint tortos èssonne. Li Djauke, k'esteûve li pus djonne, riwèteûve bin a s'-n auje kimint çk' i faleûve fè, èt tot seû, cwand lès grands estint voyes, i fieûve come zès. Rintrè l' bwès, li soyè è bokets longs d'one mwin avou li soylète da monnonke Edmond, li rfinde avou l' cougneye su l' blo, li rintrè dins l' cûhène, fè dès ptits bwès avou l' sauplète po-z alumè l' feû au matin, rinètchè l'corti, plouctè lès gruzales, alè mechnè po les pônyes. Gn aveûve todi à fè.

Cwand c'esteûve li sêzon dès tchampions, faleûve co z-î alè. On purdeûve on tchèna èt èvoye foû dès pîs dès parints.

Çu k'esteûve bin, c'èst k' i gn aveûve ossi dès coméres ki cmincint a s' fè fème, èt cwand on-z aleûve aus crompîres èt k'èle tinint li satch, c'esteûve bin plêjant d'olzî vèy li coûr dins leûs finès bloûzes ki bauyint.

Gn aveuve Madlinne, li fèye da Lowisse èt Djônzef, one miète pus vîye ki Djauke, k'inmeûve co bin rîre avou li. Si bin k' lès mans lès apèlint co bin po sèpe çu k' is fizint drî lès clawsons.

Gn aveuve ossi la Cristiane, li fèye da Denise, èt s' soûr, one Madlinne ossi. Leû pa aveut stî pris pa les SS èt touwè a Bande. C'esteûve on Maulimpré d' Lîdje. ls-estint deûs Maulimpré a hantè avou lès deûs coméres Denise èt Guèrite do Tchaplî a Rwè. Onk èsteûve dèdja mariè. L'ôte ni l'èsteûve nin co. Guèrite s'a mariè avou Georges Batter. Is-ont yu deûs gamins, André èt Marc.

Djauke dès Cambûzes

Riscrijhaedje e rfondou

C’ esteut djudi dijh-nouv d’ octôbe deus meye shijh.

Aeyir mierkidi, il a stî a Bive avou s’ camaråde Willy po-z aler raprinde leu vî lingaedje.

Come il est co bén tiesse e l’ air, et pire, ki s’ deure tiesse zoupele pus voltî so ses propès idêyes ki d’ shure çou ki l’ mwaisse lèzî dit, il a stî comissionné d’ fé on scrijhaedje su li Spetin et motoit ossu sol Rodje Bounete.

I fåt sepe k’ il a stî efant tins del guere, k’ ene måjhon lzî a toumé so l’ tiesse a tertos djusse divant nonne on dimegne a Mårloye, li vint-ey-onk di may mey nouv cint cwarante-cwate. Li gamin aveut deus-ans.

Fåt sepe k’ adon il ont stî foircis d’ endaler ! Mins dou ? Nén a Rotchfoirt, sol voye di Cînè, addé li pus vî mononke, Houbert - et s’ feme li matante Mareye -, dou çk’ i gn aveut dedja cénk pititès båsheles et co ds ôtès djins. Adon, il ont stî addé l’ matante Guerite et l’ pårén På sol voye di Lidje, nén lon del matante Lucyinne k’ esteut Carmélite. Nén a Rotchfoirt mins a Måtche, da ! Edou a Måtche, diroz vs ? Bén addé ene groumleuse matante k’ aveut cwate djonnes gaméns pus vîs k’ lu.

Lu, k’ a Mårlôye, esteut todi dins le grands, avou s’ grand-man k’ esteut veuve, avou s’ man, avou s’ pa, ene sour da s’ man, si djonne monnonke di dijh-ût ans, avou tertos ki l’ rapåjhtéve, i s’ a rtrové adon, après on bea vicaedje avou tos grands, dirî ses cwate cuzéns dins leus beas, tossi bén k’ leus mwais côps.

Po l’ fè schoûter, faleut k’ il åye sogne. Gn aveut ki l’ pawe po l’ fé roter droet, et cobén ene pingnêye.

I n’ si fåt sbarer adon di vey ces mannèts djonnes la peter evoye po-z aler cori dins les bwès. Et cobén rintrer al nute après aveur riwaitî bizer les biesses avå les tchamps. Et cobén les awè fé cori si ele ni bizént nén foirt assez por zels.

Ratinde sol boird do Troti å Fossé et rwaitî e noer trô po s’ fé sogne tertos eshonne avou l’ biesse. Riwaitî l’ aiwe brotchî foû del tere a l’ Rotche do Fond des Vås et s’ î rpiede vint metes pus lon.

Adon, cwand i rintréve, i fjheut cobén noer et co dpus. E-z eralant al måjhon, i passént so l’ pont del Mårtchete po vey li "bastårdea".
- Waite a twè, saiss, Djåke, dijheut i li pus vî des cuzéns. Padzo, gn a l’ Rodje Bounete ki t’ va vni haper.
- Taijhe tu ! dijheut i l’ Djåke. Ele n’ est nén voci. Elle est a Rwè, dins l’ pousse da mononke Firmin. I m’ l’ a co dit l’ cwénze d’ awousse a l’ fiesse. Voci, ç’ n’ est nén del Rodje Bounete k’ i fåt-z aveur sogne mins do Spetin. Waite avou totes vos biestreyes åtoû do Troti å Fossé et å sourdant del Mårtchete, nos estans co so l’ voye cwand i fwait noer. Mi, dji so todi drî vos. Adon, ci n’ est nén di m’ fåte si on rintere si tård. Avou vozôtes, c’ est todi insi !
- Ni va nén dire çou k’ on-z a fwait avou l’ brocale k’ on-z a hapé dins l’ brocalî k’ est sol dresse del tchambe addé li stouve, saiss, Djåke !
- Dji n’ dirè rin", respondéve li Djåke k’ aveut e s’ potche li vî briket da s’ mononke et ki, tot seu lon d’ ses cuzéns, sayive di mete li feu a l’ rezene d’ ene pîce tins k’ zels li fjhént bén broûler avou leus brocales.

Cwand l’ ovraedje esteut la, il î boutént tertos essonne. Li Djåke, k’ esteut li pus djonne, riwaitive bén a s’-n åjhe kimint çk’ i faleut fè. Et tot seu, cwand les grands estént evoyes, i fjheut come zels. Rintrer l’ bwès, li soyî e bokets longs d’ ene mwin avou li soyete da mononke Edmond, li rfinde avou l’ cougneye so l’ blok, li rintrer dins l’ coujhene, fé des ptits bwès avou l’ såplete po-z aloumer l’ feu å matén, rinetyî l’ corti, ploucter les gurzales, aler mexhner po les poyes. Gn aveut todi a fé.

Cwand c’ esteut li såjhon des tchampions, faleut co-z î aler. On purdeut on tchena et evoye foû des pîs des parints.

Çou k’ esteut bén, c’ est k’ i gn aveut ossu des comeres ki cmincént a s’ fé feme, et cwand on-z aléve ås crompires et k’ ele tinént li saetch, c’ esteut bén plaijhant d’ elzî vey li cour dins leus finès blouzes ki båyént.

Gn aveut Madlinne, li feye da Louwisse et Djôzef, ene miete pus viye ki Djåke, k’ inméve co bén rire avou lu. Si bén k’ les mans les apelént co bén po sepe çou k’ is fjhént drî les clawsons.

Gn aveut ossu l’ Cristiane, li feye da Denise, et s’ sour, ene Madlinne ossu. Leu pa aveut stî prins pa les SS et touwé a Bande. C’ esteut on Målimpré d’ Lidje. Il estént deus Målimpré a hanter avou les deus comeres Denise et Guerite do Tchaplî a Rwè. Onk esteut dedja maryî. L’ ôte ni l’ esteut nén co. Guerite s’ a maryî avou Georges Batter. Il ont yeu deus gaméns, André et Marc.

Djåke des Cambuzes