Joseph Pirson

Ni nin prinde boû po vatche !

Après awè boutè vint ans å tchèrbonadje
A Lidje, à Charlerwè et minme dins l’Borinadje,
On flamind su vanteûve do conèche nosse walon,
Mês, pô cåzer l’ patwès, fåt awè ça dins l’song !

L’cia k’ n’est d’avôrci, li pètrouye ou l’ coatche
Et sovint, s’i vos choûte, i va prinde boû po vatche
Tot fièr di ç’ k’ i saveûve et po fè do ronflant
L’ome atåtche li grande Fine ki mwinrneût s’ gate ås tchamps.

Vos èstoz tote rayîe, di-st-i al vîye comére ;
Dji wadje ki v’ s’ avoz passè kinze djoûs à l’ mér !
Non.na ! V’z’èstoz brouyî ! Dji rvins d’ ås canadas ;
C’est là k’ dj’ê ramassè deus fâmeus côps d’ solia !

Å Canada, sègneur ! C’est nin on ptit voyadje !
On pout dîre k’ à vost ådje, vos n’ mankez nin d’ coradje !
Et, sins yèsse trop curieus, comint î avez stî ?
E vlà one, di kestion ! Bin dj’ a fêt l’ vôye à pid !

Avou on grand panî, one fotche et one bèrwète :
Mi vî bådet est mwârt et dj’a rvindu m’tchèrète !
-Ele mi prind po on fou ! pinse tot d’ suite li Flamind
Sins awè stî è scole, i saveûve kand minme bin

Ki l’ Canada s’trouveûve o fin fond d’l’ Amèrike
Et k’on n î arive nin sins passè l’Atlantike.
-Dji vous bin crwère, di-st-i, ki vos m’racontez l’ vrê
Mins dj’vôreûve bin sawè comint ki v’s’avoz fêt ?


Si vos èstîz à pîd , po trèvåtchî l’ grande basse ?
E bin, dji m’ vol va dîre, puski ça vos tracasse :
Dj’ a râdmint rtrossî m’cote jusk’à pa dzeus mes gngnos
Pîs, dj’ a zoublè l’ potia, tot parèy k’ on gadot !

-Po n’ pus ôre vôs mintriyes, dj’ vôreûve ètinde deûr !
Rèplike do côp l’ famind sins sawè k’ à Nameur
Cand on cotlî raconte k’ i va aux canadas,
I gn’ a person.ne po crwère k’ i påte po Otawa.

Cè k’ on loume on canada, à Lîdje, c’est one crompîre,
A Mons, po s’fé comprinde, on sét bin k’i fåt dire :
« Dj’ va sakî mes pètotes et tot près d’ saint-Ubert,
Les djins råynut leus trucs, one miète divant l’ivièr !

Comint vloz k’ on flamind seûche aprinde nosse lingadje ?
N’ z’avons l’ chwès inte cate mots po dire li minme messadje.
Li djoû k’ al Sabena û ås contrubucions
I fårè k’ les flaminds conèchnuchent li walon,

Ci n’ srè pus des djins d’ Gand, d’Ypres ou d’ Poperinghe
K’åront les bèles places, pask’i sont bilingues,
Malèreusmint, por nos, l’ candjmint n’est nin po dmwin
Et cand nos vièrans ça, … les pouyes åront des dints !

Jos.Pirson, R N