Joseph Suars

Li cotchessî
so l’ air « Gastibelza »

I.
Pière,li pu bia djon.ne ome di nosse comune / À l’ cwane d’on bwès
Li coûr chagrin, môdichant  s’ t  infortune, / Ainsi tchantèt :
Comint s’ fét - i , mi  ki n’ èst nin  voladje,   /     Comint s’ fét - i ?
Ki dj’ so todi dès coméres do viladje ,   / Li cotchèssî ?    
Ki dj’ so todi dès coméres do viladje ,   / Li cotchèssî ?
II.
À totes lès bèles ki volnut bin m’ ètinde / Dji drouve mi coûr,
Dji  fé ç’ ki dj’ pou po leû  fér bin comprinde / Ki dj’ brûle d’ amour,
Dj’ a beau vantér leûs mwins èt leû cwarsadje,/Môgré ç’ ki  dj’ di,
Dji so todi dès coméres do viladje, / Li cotchèssî.      
Dji so todi dès coméres do viladje , / Li cotchèssî .
III.
Lès cias , vêci, ki conichnut Marîye, / Diront come mi :
Gn’  a pon d’ si bèle,  i  gn’  a pon d’  si djolîye / Dins tot l’ payis;
D’ lé  lèye  vrémint  dji m’ pinseûve bin  astok / Bin  aspouyî,
Por on vôrin ki n’ vôt nin one mastoke, / È le m’ a tchèssî ...
Por on vôrin ki n’ vôt nin one mastoke, / È le m’ a tchèssî...
IV.
Môgré  çola  dji  rpidreûve  do  coradje, / Si l’ vî  yerdî
Volèt m’ donér   si  fèye   Djane è mariadje / Po  m’ ayèssî .
Vola deûs ans po l’ mwinsse ki dj’ èle cowéte,/ Ça m’ fét sètchî,
Môgré mi amour, dji so co pa Djanète / Bin cotchèssî.
Môgré mi amour, dji so co pa Djanète / Bin cotchèssî.
V.
Tot wous’ ki dj’ va, dj’ èl veu bin, on m’ cotchèsse, / Dji n’ î tin pus;
V’ là m’ pistolet, dji m’ va fér sôtér l’ tièsse, / Dji vou moru.
Dji m’ va nn’ alér one sawousse è l’ infièr / Ou   paradis,
Veuye si dj’ sèrè come dj’ a stî dissus l’ tère / Li  cotchèssî .
Veuye si dj’ sèrè come dj’ a stî dissus l’ tère / Li  cotchèssî .
VI.
Kand dj’ sèrè mwârt,  fôt k’ on m’ ètère à l’ ombe / D’ on maronî,
Èt ki tot l’ monde pouche vinu lire su m’ tombe / Ci ki dj’ a scrît :
Véci dzos l’ pîre, c’ èst Pière k’ esteu co pîre / K’ on tchin d’ bièrdjî.
Ka dès bôchèles il èsteuve li martîr / Ét l’ cotchèssî !
Ka dès bôchèles il èsteuve li martîr / Èt l’ cotchèssî !

Da Joseph SUARS Nameur 6/11/1804-9/06/1885
Cwabjî di smèstî . Onk dès fondateurs de “ Moncrabeau “