Jean-Pierre Dumont

http://wa.wikipedia.org/wiki/J.P._Dumont

Å Tribunål dès bièsses

L’ homo sapiens sapiens, come i s’plêhîve a s’loumer lu-minme, aveût tant fêt sofri li p’tite bole qui lî chèrvéve di djîse, qu’al fin dè compte, li Grand Mêsse di l’ûnivêrs évoya sol tére sès missi dominici po –z-aler veûy qwè èt kèsse. Po mète a leû tièsse, i n’ vola nin l’binamé Gabriél, djusse bon a arinner lès båcèles avou sès-andoûleûs mèssèdjes. Bin trop bonasse po wèzeûr dîre leûs vrèy’ ås-andjes-gårdiyins; èt po d’ner l’ grand côp d’hovète qui faléve. I tchûziha don l’grand Michèl, ine andje di guére, pus k’nohou qu’ Barabas’ al passion dispôy qu’il aveût fotou ‘ne danse a Lucifêr tot lî trawant l’pê d’on côp d’fotche.

C’èst-st-insi qu’on bê dimègne å matin, so l’côp d’doze eûres, on grand tchår di feû dihinda dè cîr, po s’taper tot doûcètemint å mitan dèl plèce Sint-Pîre a Rome.

L’ci qu’ènnè fourit li pus èstomaké, c’èst l’påpe lu-minme. Lu, qui n’côpéve nin dès fleûrs divins nosse pré, mins qui s’asprèstéve a d’ner s’bènèdicsion Urbi et Orbi, ènnè ravala s’rètchon èt d’mora ståmus’, li boke å lådje. Dispôy li timps qu’i n’créyéve pus a totes cès chimagrawes ! I måka toumer di s’maclote. Vèyéve-t-i bablou ? Nonna, totes lès mèy’ di djins rassonlèyes låvå avît toumé a gngnos d’vant li r’glatihante indjôle co pus bèle qui l’car d’ôr di Mons èt brèyît dès « aléluyås. »

Adon, i k’minça-st-a tronler lès balzins . Sèreût-ce li chatimint ? I louka è cwèsse åtou lu. Tot l’monde, åcolètes, priyèsses, rodjès cotes, s’aveût tapé a gngnos so l’pavèye èt froumeléve påtèrs èt avés. Tot èwaré, i n’ vèya nin lès vèssous visèdjes dès cardinåls qui souwit turtos a grossès gotes dizos leûs soutånes di fin drap. Esteût-ce li chatimint ?

I n-aveût, astampés so l’ tchår d’ôr, cinq èsblawtants pèrsonèdjes,moussîs a sôdårds di d’vins l’timps, come on l’zès veût so lès posteûres dès-èglîses. Onk di zèls, il aveût come lès-andjes, lès dj’vès d’on blond doré, arinna li peûpe qui s’tèha sol côp. I n-aveût la dès djins d’totes les coleûrs, di tos lès payis, di tos lès lingadjes, èt miråke, come lès-apôtes li djoû dèl Cincwème tot l’monde èl comprindéve åhèyemint. Et i n-aveût nin qui l’tropê dès bèrbis d’Nosse Signeûr a l’hoûter, mins dès miyårds di djins ! C’èst qui lès tèlèvûzions dè monde ètîr èstît la po sûre li grande bènèdicsion. Ossi, dispôy lès salons d’l’Elysète disqu’a l’dièrinne dès favellas d’Rio , lès djins d’morît clawés divant leûs posses a houmer li mèssèdje dè Grand Mêsse.

C’èst qui djustumint, il èsteût måva li Mêsse. I ‘nn’aveût sès cint kilos dès-omes èt d’totes leûs bièstrèyes. Il èsteût hodé, i ‘nn’ aveût s’ sô ! D’acwérd, c’èsteût l’Bon Diu, min stot l’minme ! Bon ni vout nin dîre bièsse, pasqu’on moton, on l’tond ! Qui n’aveût-i nin fêt por zèls, portant ! I l’zî aveût d’né « l’paradis so tére » èt i l’avît si télemint pourciaté qu’Il aveût stou oblidjî d’èlzès piter a l’ouhe !
Pus tard, I lès aveût d’vou nèyî turtos, ni såvant qui Noyé èt sès èfants, qui n’èsteût nin ossi canaye qui l’s-ôtes. Et qu’aveût-i fêt cila po L’rimerci ?
I s’aveût fêt sô ! Si sô qu’ i n’ poléve pus hope èt qu’i s’aveût èssok’té so sès vôyes , lèyant veûy si botike ås cis qui passît ! Et li Loth ? Qu’aveût-i fêt a hipe foû dès blames di Sodome èt Gomorrhe ? I s’aveût “amuzé” avou sès prôpès fèyes! Il èsteût vèf, c’èst vrèy, mins ci n’èsteût nin in’ èscuse !

Asteûre, c’èsteût F-I-N-I !

Diu ènn’ aveût disqu’al copète dèl tièsse di tot çoula. Gare la gare! On aléve divins treûs djoûs rassonler vèci on grand tribunål . Chaskeun i pôreût v’ni plêtî l’cåse di l’ome . Adon, on veûrè !

Treûs djous, c’èsteût bin assez po-z-aminer a Rome tot çou qui l’tére comptéve come omes sincieûs, filisofes, rilidjeûs èt savants. Amon nos-ôtes, lès-èglîses èstît plintes a make, droviètes nute èt djoû. Divant lès kifèssionåls, c’èsteût dès cawèyes abominåbes. On-aveût stou « ås vîs-omes » ricwèri çou qui n’ hossîve nin trop’ è mantche divins lès curés, po hoûter lès djins a k’fèsse. On saya minme d’èmantchî in agayon qui don’reût dès tikèts, come å botchî.Mins, ça lum’cinéve ca lès priyèsses èstit sourdôts èt lès djins n’ kinohît pus leû confiteor.Finålmint, il on-z-a d’né l’absolucion a tot l’monde è minme tins , a grands côps d’aspèrdjès’. Di s’prôpe mouvemint, li peûpe rataqua a fé lès vôyes.

A Hu, dès hièdes di djins, li tchap’lèt èl mwin, montît l’gripète qi Notru-Dame di so l’ Såte.

Å-d’foû, c’èsteût co pès qu’è l’an cwarante. On lèyîve la hatche èt matche. Lès bus’ èt lès trins ni rôlît pus ; li facteûr ni féve pus s’toûrnèye ; li bolèdjî aveût distindou s’fôr…

So c’ trèvint-la, a Rome, li påpe aveût sayî d’andoûler lès-andjes. Al vûde ! Qu’èst-ce qu’ine saquî qui vint dè cîr pôreût bin fé avou on trézôr ou bin on hopê d’çans’ ? On n’lès vèyéve ni beûre, ni magnî. Esteût-ce dès måyes ou dès frumèles, d’abôrd ? Lès djins d’Byzance s’avît margayé sol kèsse dès djoûs å long. Sins trover l’ rèsponse. Et so c’trèvint-la, lès Turcs ataquît l’ vèye.

On l’zî aveût évoyî dès roslantès crapôdes. Dès bês bokèts qui n’avît pus l’florète so l’oûy èt qui sèpît î fé. Bèrwète ! Adompwis dès bês valèts avou dèl loquince èt dès brokètes di roncin. Buscûte ! On l’zî a minme èvoyî dès ‘p’tits moncheûs sins moustache »qui hossît leû cou come dès damzulètes. Bèrnike.

Ni sèpant pus qwè fé, li påpe si mèta-st-a priyî.

Quéne afêre a Rome ! I ‘nn’ aveût dèl djin ! Et dèl bèle, èco ! Tos lès payis, totes lès rilidjons avît-st-èvoyî leûs pus grands-omes. Insi vèyéve-t-on copèner éssonle li påpe avou Ben Laden, G.W.Bush avou Castro, li Dalaï Lama avou Kim Jong-iI, li Tîhon avou l’Walon…Ca tot l’monde si comprindéve al lècsion : li mirâke dèl Cinkwème continuwéve. Mins i n’aveût ossi l’s-ôtes, li peûpe di Rome. Dispôy li grande dame dèl Hôte disqu’al feume di cazêr qui t’néve botike dizos sès cotes. Et dès volèyes d’èfants vinou po veûy Michèl tripler l’ diâle dizo sès pîds. C’èsteût d’dja bin ine saqwè d’drole : li plèce Sint Pîre èsteût plinte a make èt portant dès novèlès djins arivît todi. I ‘nn’ aveût sûr dès miyons asteûre. C’èsteût co on miråke, come qwand Nosse Signeûr aveût ripahou li flouhe qui l’sûvéve avou cinq pans èt deûs fayés pèhons.

Michèl, drèssî sol tchår d’ôr come s’i sèreût so on scanfôr, lèva lès brès è l’êr po fé comprinde qu’on aléve ataker. Ni hûze, ni mûse ! Minme lès mohes s’arèstît dè voler. Adon, i d’manda quî voléve li parole.

In’ anndje passa. Nolu n’ wèzéve ataker.

Pwis, on étinda li p’tite grêye vwès d’on-avocåt pêlète qui d’mandéve qu’on ripwèrtahe li procès d’vins treûs meûs la qu’i n’aveût nin avou l’timps d’aponti sès dossîres. Michèl èsteût trop bin ac’lèvé po l’èvoyî –st-al djote plate-kizak, mins i fa comprinde å vî toûrsiveûs qui c’trèvint-la èsteût rèvolé po d’bon ; qu’on-aveût nin l’timps dè djower èt qu’i n’faléve nin prinde li Bon Diu po on nig’-douye.

Adon, li påpe ataka s’plêtièdje. N’èsteût nin s’dreût å rèsse, lu qu’riprézintéve li Bon Diu sol tére èt qu’èsteût l’grand bèrdjî dèl vrèye rilidjon dè djåser po tot l’monde. L’homo catholicus èsteût bon. L’Eglîse ni d’néve-t-èle nin dès dringuèles a sès pôves ? N’aveût-èle nin èvoyî sès missiyonêres tot avå l’monde prètchî li boune parole, sètchant foû di spèheûr lès djènes, lès rodjes èt lès neûrs tot l’zî apwèrtant li loumîre èt tot bouhant djus lès-îdoles qui l’diâle î aveût drèssî ?

On p’tit lêd vî-ome la lî r’clapa sol côp. C’èsteût –st-on p’tit pèlake tot breun’. Cåzî tot nou, såf qu’I s’aveût nouki on drap d’mohone åtou dès rins po rèspouner s’mizére. I v’néve di d’ l’Inde, wice qui, di s’djonne timps il aveût stou l’discipe da Gandhi. Minme qu’il aveût l’oneûr èt l’aweûr dè l’ prudjî tos lès djoûs èt qu’i poléve mostrer l’trêteû qu’aveût chèrvou po ça.. Qui k’nohéve-t-i d’vins lès pôves, lu, qu’vikève èn-on palå å mitan dès pus grantès ritchèsses ? S’ènn’aveût onk a poleûr djåser al plèce dès pôvriteûs, c’èsteût lu èt nol ôte.

« Bin dit, camèråde, pirsûva Bèn Laden. Et on s’ènnè sovint dèl manîre qui lès creûh’lîs ont –st-apwèrté l’loumîre ! Tot-z-ahorant nos feumes èt nos èfants ! »

On mêsse pougn èl g…l’èvoya valser d’vins lès cotes då Dalaï-Lama, qui s’aveût r’trossi po s’hèrer l’tièsse d’vins sès draps d’sôye po n’pus rin veûy tot come l’ôtruche èl fêt è l’såvion. C’èsteût l’grand cowe-boye di G.W. qui l’ôte aveût fêt potchî foû d’sès clicotes èt qui n’s’aveût polou mêstrî.

-« Vasse å diâle, måssî impérialisse ! », brèyéve-t-i tot foû d’lu Kim Jong-il, « dji t’va fé pèter m’bombe atomique sol t’cabu, mi ! »
Li bagåre div’na jènèråle. Quéne rouflåde ! Ca doguéve, ça tapève, ça dôpinéve, ça pitève… Ca bouhîve, ça hagnîve, ça soukîve, ça s’pingnîve...

Å Tribunål dès bièsses (shûte)

Li moståde monta-st-al narène di Michèl. Il åreût volou prinde si grande èpèye a deûs mwins èt flahî d’vins, come on dèmon. Mins, il èsteût-st-ine andje, ossi s’continta-t-i dèl håssî bin hôt. I ‘nnè brotcha foû come on côp d’aloumîre èt nosse binde di forsôlés ènnè fourît maké fî parèy qu’on gayèt qu’åreût frohî s’hanète s’on fî a l’èlètrike. I d’morît là stårés, èco makasses, qwand on oya dès èclameûres, tot a l’intrèye dèl plèce èt on sam’rou cora avå l’assimblèye. Li flouhe si côpa è deûs come si ‘n’adjèyante èrére l’åreût arôyî, parèye al grande rodje basse qwand Moïse aveût stindou s’baston. Deûs moûrs di djins s’avît drèssi po lèyî passer on drole di cortèje : li cortéje dès bièssses.

A dîre li vrèy, c’èsteût-st-ine pôve atèlèye. Ine cawèye di scrofieûs, di chalés, di twèrdous, di crawés.qu’avancihéve lôye minôeymint, hinke èt plinke, tot claptant, lès pus vigreûs pwèrtant lès pus flâwes a crås-vê ou bin agriptés ås longous pohèdjes di leû scrène. Li colone di mzèreûss’arèsta divant l’tchår d’ôr.

-« Qui volez-v’,mès binamèyés bièsses ? », diha Michèl. « N’åyîz nole sogne èt djåsez-m’ sins mirliflitches. »

Un gros vèra s’aprépia d’in êr modèsse èt s’agnéniha divant l’grande andje.

- « Binamé Sint Michèl, vos qu’a v’nou dè cîr, dji påle å nom di totes cès nièsses-chal, qui m’ont dèmocratiquemint èlu,po v’dimander djustice. Dispôy qui l’ome èst sol tére qui n’avns-gne nin èduré ? C’èst vrèy qui d’avance, å trèvint dè paradis sol tére nos vikît påhûlmint èssone. Ci sèreût co mutwèt parèy asteûr si Adam aveût pris sogne a s’feume al plèce d’èl lèyî fé bébèle avoul’ chèrpint. Mins vola, l’pôve wiyème n’èst nins mêsse è s’mohone , parèt, èt c’èst so nos-ôtes qui s’a r’vindjî ; »

Tot oyant cès paroles,li påpe èsteût div’nou tot rodje, près dè fé on côp d’song’. Å bwérd di l’infractus’, I s’kitapéve come on diâle èl bèneute êwe.-« Kimint wèzît-i », ènn’aléve-t-i tot bètch’tant télemint q’il èsteût foû d’lu, « Kimint wêzît-i ènnè dîre dès si fêtes ! Lès boûrdeûs ! » Et i djåsa d’Sint-Francwès, l’ami dès-oûhês ; di Sint-R’marke èt di s’leû, d’Sint-Rok èt di s’tchin èt minme di Sint-Antonne èt di s’poûrcê !

Li breun gourou l’aspala èt dîre qui zèls, la, è l’Inde ni mâgnît nin leûs vatches èt vikît ås mitan d’ nulèyes di mohes, sins d’dja sayî d’ènnè spater eune.

Bèn Ladin rapèla, lu, qu’lès musulmans ni magnît nin l’tchår dès pourcês.
Et tot l’monde dè voleûr dîre li seûle.

-« Têhîz-v’, mès-omes »,brèya l’grand Michèl, « asteûre, dji voû-st- ètinde lès tèmons ! »

Ci fourit co l’vèra qui chèrva d’avocåt èt qui plêta l’cåse dès plaignants.
Po-z-ataquer , i Iî faléve èscuser tos lès cis qu’n’èstît nin la, comme lès mosses èt lès grèvèsses qui lès-omes tapèt è vike è l’bolante êwe, èt totes lès sôres di bièsses qui l’ome aveût si tant distèrminé qu ‘ènnè d’moréve pus nole. Pwis, i prézinta ine pitite rinne carapate (*)qu’on lî aveût côpé lès pates po l’zèes chèrvi d’vins on rèstorant. Sûva ‘ ne rogneûse cwate-pèces. Lèy, djoupléve so ‘n vî moûrs avou sès camèrådes qwand in ome lès aveût ramouyî avou èle ni sèpéve nin qwè. Todi ènn’èst-ce-t-i qu’èle aveût stou pus tchanc’leûse qui l’s-ôtes qu’avît crèvé sol côp, dismètant lèy, aveût sorviké, mins s’pê asteûre èsteût co pus lêde qui l’cisse d’on crapô-vèlin.
Adompwis, ç’fourit l’toûr dès-oûhês. On veya ‘ne grosse dondon d’åwe, hèrtchant s’panse al tére télemint qu’èlle èsteût cråsse. Ele raconta l’ pôve vicårèye qu’on lî féve miner. Atelèye so ‘ne plantche tot dè long dè djoû on lî v’néve co hérer èl gozî ine sôre di trêteû avou on molin ; Et on l’bouréve, bouréve a l’ fé hiyî qu’èle ni poléve pus hope. C’èsteût pès qu’tot saglotéve-t-èle. Si mame riv’néve todi avou ‘ne tèripe istwére di djèt’rèye di d’vins l’timps qui l’ féve div’ni co a tchår di poye, mins ci n’èsteût sûr nin pès qui çou qu’èle èduréve. On oya ‘ne pôye djustumint. Cisse-chal si plindéve dè passer s’vèye d’vins ine pitite gayoûle qu’èle ni s’î areût d’dja nin polou r’toûner d’vins. Tote li sinte djoûrnèye, ci n’èsteût qui magnî, ponre, polèner, magnî, ponre, poléner… Lèye qui voléve cover èt ac’lèver dès poyons.

Ariva-st-adon ine hiède di tchins. C’èsteût tos « beagles ». Mins, bin sûti l’ci qu’ åreût rik’nohou è c’ pèneûs tropê d’ èstroupîs, d’pèlés èt d’plins crapes lès djoyeûs d’tchins d’tchèsse qui, narène a ras’ dèl tère èt cawe drèssèye come on cièrje di Påque, suvèt tot hawant l’arote d’on ciér ? Zèls, c’èsteût dès blancs moussîs « savants » qu’èlz’aveût mèsbrudjî. A côps d’pikeûres, di droukes, di catablames, di pomådes. C’èsteût sor zèls qu’on-aveût sayî tos lès tchinis’ qui lès-apotikêres vindèt è leûs botikes. Turtos èssone i s’mètît –st-a hoûler. Et dèl plèce Sint-Pîre, di d’la qui lès pus clapantès coråles dè monde avît èvoyî lès pus bèlès muzikes vè l’ Bon-Diu, amonta-st-on long tchant d’mizére. Michèl ènnè fourit tot mouwé. I louka è kwèsse åtoû d’lu. Li påpe féve seûre mène èt båyéve come onk qui s’anôye èt qu’on vint amûzer la qu’il a ôte tchwès a fé. Li gourou, lu, s’aveût èssok’té so s’pitite nulèye. G.W. Bush mostréve si poung a Bèn Ladèn qui l’rèspondéve avou dès hègnes èt dès mokèyes (***).
Dè veûy çoula, Michèl ènn’åreût bin tchoûlé. Mins, ine archandje ni tchoûle nin. I n-a qu’lès-andjes-gårdyins, parèt-i, qui plorèt dès måcules di leûs copleûs. Kimint lès hôtès-êwes n’avît-èle nin co nèyî Rome d’abôrd ?
Qwate vatches avît v’nou tot-èsprès dè Condroz. Chaskeune aveût ine costeûre so l’intche costé dèl panse, avou co a fîye dès fîs qui pindît. C’èst qu’on l’s-aveût cozou èt racozou après qu’ l’årtisse èlzî avasse drovou l’vinte po’nn’ hétchî foû dès vês qui leû nateûre n’åreût polou lèyî passer. Loukîz l’zès avou leû cou parèy ås cis dès pus grossès båyes di d’ so l’fôre a Libråmont. Qu’énn’ aveût-on fêt dès nozèyès-åmayes qu’èle èstît ? Et leû bouname, c’èsteût co pés. I n’poléve pus hope télemint qu’il èsteût gros. Hoûzé come ine rinne qu’on lî a soflé è cou avou on fistou. I n’areût fêt treûs pas sins s’ diveûr rihaper. Et po l’rèsse, ça s’passéve a Cinè, d’vins ine botèye di veûle.

Pus ènn’ aprindéve-t-i, pus èsteût-i disgosté èt discorèdjî, l’archandje ! L’esteût trop bon, l’Bon-Diu ! Ou bin aveûle ?

Ine fwète cavale si v’na plinde di l’ingratitude dès-omes. Portant, diha-t-èle, nole bièsse n’ ènn’aveût fêt ot’tant por zèls qu’li dj’vå. Il aveût hèrtchî l’èrére po qui magnasse lu è sès-éfants. Pwèrté so s’dos å d’triviès dèl tère ètîre po li fé sès handèles.Plonkî è l’neûristè dè beûre a l’wâde di Diu, d’Sinte Bâbe èt d’Sint Linâ, a sètchî âs bèrlinnesdi hoye tote si vicârèye èt n’riv’ni a solo qui po-z-î mori....Et surtout, ! Surtout, il aveût sofrou po s’glwére so lès tchamps d’bataye, d’vins dès guéres qu’i n’aveût rin a-z-î veûy ! Crèvant d’sogne èt lèyant brotchî sonk èt boyês ! Et qu’ènn’aveût-i fêt, l’ome, di s’mèyeû camèrade, qwand lès machènes avît hapé s’plèce èt qu’i n’nn’aveût pus avou dandjî ? Il aveût-st-èvoyî po l’ coutê !

-« C’èst l’vrêye », brèya on p’tit âgne qui lès grossès cavales rèspounît. –« Et a nos-ôtes qu’a-t-i fêt, don ? A nos, qu’onk di nos tâyes a sâvé l’ Binamé Efant foû dès grawes dès sôdârds da Hèrôde qu’ èl volît ahorer ?Ci-la minme qui l’èpwèrta dine trake è l’Edjipe sins prinde li tins di s’rihaper? Minme qui po ça Nosse Signeûr èl tchûziha po l’pwèrter li djoû dè l’ florèyePâke èt qu’ i nos a pondou, a turtos, ine neûre creû so nos spales. Nin co contint d’nos fé danner a l’ovrèdje , i nos prind po dès bâbôs, dès-ènocints, dès bâbinèmes,...po dès bièsses,qwè !

Michèl ènn’ aveût-st-–ètindou assèz. L’ome èsteût vrêmint li pus lêde bièsse qui l’Bon –Diu åye mètou sol tére. Et, sès pus gros crimes, qu’on n’ ‘nn’aveût d’dja nin djåsé, c’èsteût disconte di lu, disconte sès prôpes frés qu’èlz’ aveût fêt. Ossi, sins pus hoûter lès plêtièdjes dè vèrå, håssa-t-i bin hôt s’ palasse.(**)

I n-eurit come on grand toûvion èt totes lès bièsses fourît tapèyes al tére…
Qwand èle s’ont ridrèssî, tronlant so leûs skèyes, totes macasses, i n’aveût pus ni plèce Sint-Pîre, ni tchår di feû, ni batumints, ni vèye di Rome… ni-y- omes.. Tot èsteût ridiv’nou come il èsteût dès mèy ans èn-èrî. Come d’avance, divant lès-omes. I lûhève lès cwate solos èt ine grande rivîre coréve å mitan d’ floris prés, inte dès doûcès hourèyes coviètes di grands bwès. Li grand vèra monta so ‘ne grosse pîre èt bin astampé so sès pates di drî, il arinna l’peûpe dès bièsses :

-« Camèrådes ! Vola riv’nou li timps dè paradis so l’ tére. Asteûre, avou mi, podrî mi, vos-alez bati « Li cinse d’ås-animås ! »

 carapate : cul-de-jatte
 ** palasse : grande èpèye
 *** geste de dérison enfantin qui consiste à se frotter l’index de la main gauche avec celui de la main droite en disant ou non « mokèye ».

Minme tecse e rfondou so l' Aberteke :

http://rifondou.walon.org/dumont_tribunau_biesses.php