Paul Renson

est moirt !

http://wa.wikipedia.org/wiki/Paul_Renson

Dji l'a fwért bin kinohou la qui dj'a sovint avou dès longowès copènes avou lu èt qu'i m'aveût r'mètou sès scriyèdjes. Dji l'aveû ossu rècorèdji a r'prinde si plome èt a s' rimète a riscrîre dès contes. Vos m'alez fé dâner m'aveût-i, dit pus d'ine fèye. C'èsteût; pinse-dju; li dièrin scrîyeû walon dè Payis d' Hu. Asteûre, li fâve èst foû.
Dj'ènnè djâse so m' site è l'antolojîye dès scrîyeûs walons dè Payis d' Hu.
Vâreût mî dè l' claper po l' Cwèrneû. C'èst vrèy qui Renson a ovrer dès-annèyes â long po l' walon èt po l' Cwèrneû.

(JP Dumont so "Viker")

Priyîre d’on fwért vî ome

Wice è-st-i l’ ci, Sègneûr,
qui n’ si mâvèl’rè nin
qwand dji r’vièsse mi cafè
djustumint so l’ prôpe nape ?
Ou qwand dji boûre mi pîpe
èt qu’on pô dè l’ toûbac’
tome so l’ novê tapis,
oûy qui mès mins tronlèt !

Wice è-st-i l’ ci, Sègneûr,
Qu’ârè ’ne miyète di pacyince
Po m’ lére on pô l’ gazète,
Rin qu’ lès novèles di d’ chal ?
Ѐt m’ miner d’ timps-in timps
Prinde l’êr foû dè l’ mohone,
Haper ’ne gote di solo,
Ca mès pôves-oûy sont mwérts !

Wice è-st-i l’ ci, Sègneûr,
qui n’ sèrè nin djinné
dè rèpèter deûs fèyes
li pô di çou qu’on m’ dit,
djâsant on rin pus hôt
po qui, pus-âhèyemint,
dji comprinse eune saqwè ?
Ca dj’ n’ètind pus fwért clér !

Wice è-st-i l’ ci, Sègneûr,
qui m’ prindrè co po ’ne djin ?
Qui m’aconterè on pô
èt qui n’ rîrè nin d’ mi
qwand dji di ’ne sôre ou l’ôte,
qui tot s’ mahe è m’ vèye tièsse,
èt qu’ bin sovint dji m’ piède ?
Ca mi-èsprit a fêt s’ coûsse !

N’ârè-t-i onk, Sègneûr,
eune fèye po m’ tinre li min,
djusse â dièrin moumint,
qwand c’èst qu’ vos m’ rihoukerez ?
Ѐt, tot cloyant mès-oûy,
ci-la tap’rè-t-i ’ne lâme
di r’grèt… ou bin di r’mwér ?

Sègneûr, Vos, sèrez v’ la ?

Si biyografeye e francès :

http://www.actu24.be/article/regions/provinceliege/infoslg/paul_renson_rimait_avec_wallon/233364.aspx