Paul Stienlet

http://wa.wikipedia.org/wiki/Paul_Stienlet

À l' vèye dè l' fièsse

Dëmwin dimègne, à Djodogne, c'est l' grande fièsse
Èt sint Mèdaud sôrtërè s'ë fait bia
En wachotant së l' pavwas s' boune vive tièsse,
Se crosse d'èvèque et s 't-ardjinté tchapia.
Tote lë samin.ne, on a r'nèti nos roûwes
Et c'est tot jësse s'on n' lès-a ni r'vèrnë !
On a r'nov'lé lès potaus dès-av'noûwes
Èt l' sauvadje yèbe a partout dësparë.
Lès Djodognwèses ont flanë à l'ovradje
Èles-ont broch'té l' cauve à l'ouye èt l' guerni,
Èles-ont r'chëré jësqu'aus pës p'têts-ôrdadjes
Avou l' pire ponce èt dè regueûs papi.
Sins protester, pendant ç' pin.neûse samin.ne,
Leûs-omes ont d'vë travayi sins r'moufter.
Dj'ènnè cone qu'ont d'vë, sins piède alin.ne,
Ténre le spretchoule, stwade lès loques à r'loqueter !
Aviès l' Martchi, n-a on fameûs daladje :
Lès djins toun'nèt autou dès baraquemints,
On i ètind bawi tos lès langadjes
Le boche, le naigue et minme jësqu'à l' flamind
À on tél pwint que soucieûs dè l'... bia stile
Qu' aus réunions ont nos brâves consèyers,
Monsieû l' mayeûr po préserver leû... bile
A fait serer l' ëch dè l' Consèy à l' clé.
Dins nos maujones flote on bon gout d' doréyes
Tote le sinte sise, on a vèyê rpasser
Rimplîyes à bôrd lès lautchès clôyes d'aurdéye
D'où v'neûve on r'mwârs que vos flateûve assez.
À l'air dès djins, au sourire dès coméres,
Aus-omes dè l' Vêle, à l'plaive, à l' kèwe dès tchéns,
On sint qu' c'est l' fièsse èt qu' n'arines tôrt dè braire
Malgré qu' c'est l' crise èt que l' Bourse a sombré.

grande fièsse : kermesse
flanë : perdre de son éclat
ôrdaedje : montage, truc
pin.neûse : pénible
r'moufter : regimber
spretchoule : tuyau d'arrosage
daladje : branle-bas
d' doréyes : tarte
sise : soirée
clôyes d'aurdéye : claie d'osier

Pinséyes

Quand djë pinse quë l' bouneûr pout ténre së waire de place,
Qu'ë n'è faut qu'one pëcîye come one pëcîye° de sé
Po d'ner dè gout à l' vîye, po sayi° où ç' qu'èle passe
Et po s 'è continter...

Quand djë pinse quë l’ bouneûr è-st-one tchôse së frajele
Qu'on n' l'ètind ni roter quand 'l est padri nosse dos,
Qu'on sét vraimint ç' qu'ë vaut è l' momint où s' faufèle
Sër one ôte vôye que nos...

Quand djë pinse quë bouneûr n'èst qu'on djë° come on-ôte,
On djë come on-z-è mèt dins lès mwins dès-èfants,
One poupe come è brij'nèt combén d' cops lès crapôdes
On djou tot s'amûsant...

Quand djë pinse quë l' bouneûr dins nos brès tént së waire,
Qu'ël èvole d'on cop d' vint, come nos p'tëts leû balon
Et qu' nos-avans l' coeûr gros de n' soyë l'aler r'qwaire
Come tos lès moutards l'ont...

Quand djë pinse que l' bouneûr è-st-one fleûr qu'on n' sét coude°
Qu'ë faut l' lèyi florë dins l' têre qu'èle a poussi,
One fleûr së délëcate qu'èle s'aflanërot° toute
Dins lès dwègts qu' l’ ont rauyi°...

Djë m' dë quë së dj' sèreu lë cë quë dwèt lë spaude°,
Djë sèm'reû dè bouneûr à bourer lès mèchons° ;
Dëdins tos lès djardéns, il è crèch'reût° dès pautes°.
Djë f'reû l' bouneûr po d' bon !

(1938)
Live da J.J. Gaziaux so Paul Stienlet, p. 119.

pincée
goûter
jeu
cueillir
faner
arracher
répandre
glane
croître
épi