çandriyon
I-n-aveût-st-ine fèye ine djône mam'zèle... Ine djône mam'zèle qu'èsteût foû bèle et foû binamêye, al copète de martchî. Elle aveût dès si bês-oûy, parèt : ossi bleû qui l' cîr è l'osté... Et dès si bês dj'vès, pôr : ossi blonds qui l' grin è l'awous'... Ele n'aveût ni fré ni soûr, çou qui fêt qui s' papa l'inméve po cwate ! Fåt dire qui nosse båcèle aveût pièrdou s' marne la qu'èlle èsteût co todi al fahète. Bråmint trop timpe, come di djusse ! Adon, pôy qu'èle n'aveût nol adje, c'èst lèy qui s'aveût mètou so l' ton dè fé l' manèdje èt lès-eûrêyes... Ariva portant l' djoû qui s' papa s' rimaria... Måva djoû qui ç' djoû la ! Awè, djoû d' måleûr !... A dater di ç' moumint la, li djône fèye ataka a 'nnè veûy lès sèt' creûs... Pocwè ?...
C'èst qui, vèyez-v', li novèle feume d'a papa aveût-st-avu, di s' costé, deûs båcèles d'on prumî lét èt s' ni vèyéve-t-èle nin vol'tî, come qui dîreût, « on treûzinme oûhê èl minme gayoûle » ! Elle èsteût djalote, parèt ! Djalote qui po-z-assoti ! Djalote da veûy qui s' bèle fèye èsteût tot plin pus bèle qui sès deûs fèyes d'a lèy ! Adon, po s' rivindjî, èle vola qu' li bê p'tit poyon divinse li chèrvante dal mohone !... Come dji v's-èl di !... A rés' d'asteûre, c'èst nosse pitite mam'zèle qui d'vreût tchåssî lès måssîs vantrins èt fé tos lès pus lêds-ovrèdjes... Et l' papa n' wèza-t-i rin dire !... Pôve pitite mam'zèle !... El faléve veûy traf'ter, tote li sinte djoûrnêye a prinde lès poûssîres, fé l' bouwêye, côper dè bwès po l' feû èt vo-'nnè-chal èt vo-'nnè-la... El faléve pôr veûy, tos lès djoûs al nut', qui s'aléve rètrôk'ler divins 'ne cwène dè feû. C'èst la qui, mwète nahèye, li vizèdje ossi blanc qu'ine makêye, lès mins neûres come gayète, èle s'èssok'téve a l'intrêye di l'êsse, nin lon èrî dès dièrinès rotchès cindes... C'èst cåse di coula qui lès deûs mètchantès soûrs l'avît loumé « Çandriyon »...
Deûs' treûs-ans pus tård, li rwè fa savu qu'il aléve mète so pîd ine fièsse come on 'nn' aveût co måy vèyou. On grand bal po lès vint-ans di s' fi. Et qu' totes lès såles dè tchèstê sèrît galiotêyes come on n'èl pout nin mådjiner. Et qu'on-z-aléve houkî totes lès pus bèlès djônès fèyes dè payis. Et qui l' prince, ci djoû la, tchûzih'reût s' binamêye, si feume a div'ni : li cisse qui, pus tård, sèreût l' rinne !... Come di djusse, vos pinsez bin qu' lès deûs soûrs s'ont bin vite mètou èl tièsse qu'èlle avît leû tchance... Et, vos l' pinsez bin, Çandriyon si rafiyîve, lèy ossu. Ele broûléve rin qu'a l'îdèye qui, lèy tot fî parèy qui lès deûs-ôtes, si pôreût fé gåy po-z-aler danser, ni sèreût-ç' qu'ine fèye, avou l' prince...
Ele si rafiyîve al vûde, Çandriyon !... Awè çoula qu'on l'avait priyî come tot l' monde mins... « Vos n'irez nin ! », aveût-èle dit l' bèle-mére. « Wårdez vos fwèces po fé l' manèdje !... Vos n' mèt'rez nin on pîd foû dèl mohone, ci djoû la ! »... Adon, nosse pitite mam'zèle s'aveût r'mètou a fé sès-ovrèdjes sins ram'ter : èle frotéve lès pires dèl couhène a gngnos, lavéve li bouwêye avou sès mins, ristindéve, féve l'amagnî, aléve cwèri d' l'êwe â pus' èt... Èvôye li bèle rôbe èt lès bês solés !... Rèvolés lès bês bijoux... Nole avance dè sondjî al fièsse !...
Li grand djoû ariva... Li coûr sitrindou, Çandriyon louka 'nn' aler lès deûs soûrs avou leûs bèlès rôbes èt leûs-ôr'rèyes... Ele lèya cori deûs grozès lâmes di sès-oûy... C'è-st-adon qu'i s' passa 'ne sacwè d'on pô foû dèl bonète... Apreume nosse corèdjeûse bâcèle ava-t-èle mètou sès ponnes ås pîds dè bon Diu, èt s' voléve-t-èle si r'mète a sès lêds-ovrèdjes, qu'èle si trova båbe a båbe avou 'ne dame qu'èle ni k'nohéve nin. Ine foû bèle feume, â rés' !... Moussèye d' ine longue blanke rôbe avou dès mèyes di steûles qui blaw'tît d'sus... Avou 'ne courone di loumîre so s' tièsse... « C'èst sûr'mint 'ne féye ! », tûza-t-èle Çandriyon, pôr qui l' dame tinéve è s' min ine sacwè qu'avait l'êr d'ine baguète magique !...
- Ni tchoûlez nin, èdon, mam'zèle ! Vos vôriz bin, come vos deûs soûrs, aler danser â tchèstê ? C'èst çoula qui v' fêt dèl ponne, èdon ?
- Vos savez bin , nosse dame, qui dji n' pou nin cwiter l' mohone èt qu' dji n'a pôr nole assez bèle rôbe qui po-z-aler danser.
- Ni v' fez nin tant dès mås d' tièsse... Dji v' pou sètchi foû di spèheûr... Apwèrtez-m' pus vite ine citrouye...
Çandriyon ni fa ni eune ni deûs èt s'ala-t-èle cwèri, å pus-abèye, cou qui l' féye lî aveût d'mandé. Apreume aveût-èle vinou avou l' citrouye qui l' blanke dame, d'on côp di s' baguète, ènnè fa on foû bê carotche. Et ç' n'èst nin tot ! Todi avou s' baguète magique, ni vola-t-i nin qu'èle candja, a dj'vås, cwate vîs rats qui passît avår la èt, a cochers, deûs cwate-pèces qui gripît so lès meûrs !... Çandriyon èsteût tote paf di çou qui s' passéve divant sès-oûy !...
- Mins, c'èst qu' dji n'a todi nole bèle rôbe a m' mète, blanke dame...
Nin co l' tins dèl dire qui l' féye adûza l' djône fèye di s' baguète... So l’ côp, Çandriyon si r'trova avou 'ne rôbe di sôye, tot çou qu'i-n-a d' pus bê, parèye qui l' cisse qu'èlle aveût todi sondjî... Ele s'ala bin vite loukî è mureû... Divins sès dj'vès, èlle aveût-st-ine courone di pièles ! C'è-st-adon qu'èle rimarka qu'èlle aveût, divins sès pîds, dès tot fins solés d' crustal... Dè crustal d'å Val Sint-Lambert, pôr !...
- Vo-v'-la prète po-z-aler danser, mam'zèle. Portant, dji v' deû co dire ine sacwè : fât qu' vos sèyése rintrêye so l' cop d' mèye-nut' pace qui, la qu' son'rè l' dièrin dès doze cops, vos v' ritrov'rez avou vos vîlès håres sor vos èt tot-a fêt rid'vinrè come d'avance...
Fat-st-assoti, quéle clapante sîse ! Quéle bèle fièsse ! Nolu ni pola r'mète Çandriyon, tél' mint qu'èlle èsteût gåye ! Minme li prince si lèya adîre d'ine si bèle mam'zèle : i n' dansa qu'avou lèy tote li swèrêye. Li djône fève èsteût-st-ås-andjes : sès-oûy riglatihît d' boneûr èt si p'tit coûr batéve a gros côps come djamåy. Målureûs'mint, li tins passe vite, parèt, la qu'on s' plêt bin... Bråmint trop vite, èdon !...
L’ prumî dès doze côps d' mèye-nut', Çandriyon si rapinsa cou qui l' féye lî aveût dit. Èle si r'sètcha èrî d' tot l' monde, sins rin dire, so l' bètchète di sès pîds. Adon-pwis, èle cora èvôye dè pus vite, qu'èle poléve. Si tél'mint vite qu'èlle ènnè pièrda minme on solé... Li prince cwèra après lèy tot-avå l' tchèstê. Nole avance ! Tot cou qu'i trova, c'è-st-on tot fin solé d' crustal, å pîd dès grands grés...
Lès djoûs d'après, li prince fourit tot pèneûs. I n' saveût kimint fé po r'veûy cisse bèle qu'il djonne fèye la k’ i aveût passé dès si bons moumints avou lèy.
Kimint s' louméve-t-èle ? Wice dimanéve- r t-èle ? Po l' ritrover, il ava l'îdèye dè fé l' toûr dè payis èt d' fé tchâssî li tot fin solé d' crustal a totes lès bâcèles. « I-n-ârè todi bin eune qui s' pîd mouss'rè d'vins tot djusse ! », tûzéve-t-i, « Cisse-lal sèrè m' feume a div'ni ! » On pô pus tård, li prince ariva amon Çandriyon...
On fa sayî l' fameûs solé ås deûs soûrs : bèrwète ! Li solé èsteût tél'mint p'tit qu'èle ni polît nin minme mète li bètchète di leû pîd ! Çandriyon, lèy, aveût rik'nohou li p'tit solé d' crustal qu'èlle aveût pièrdou tot corant abèye èvôye :
- Est-ce qui djèl pou sayî, mi avou ?
Li bèle-mére èt lès deûs soûrs si d'lahî a rire :
- Di qwè ! Vos ! Li chèrvante dèl mohone ! Nole avance, èdon ! Vos n' vèyez nin, mutwèt, qu' ci solé la, c'èst l’ ci d'ine princèsse ?
Sins moti, Çandriyon vina s'achîr divant l' prince èt lî lèya veûy si p'tit pîd. Li prince dimanda qu'on lî passe li solé... È-st-i possibe vormint ! Mèrvèy ! A creûre qui l' fin solé d' crustal aveût stu fêt po l' djône fèye. Si p'tit pîd intréve sins fwèrci èt l' solé lî aléve-t-i tot djusse... A ç' moumint la, li blanke dame atouma co 'ne fèye. D'on côp d' baguète magique, èle rinda a Çandriyon lès bèlès mousseûres qu'èle pwèrtéve li djoû dè bal... Li prince rik'noha, adon, li bèle mam'zèle qu'il inméve tant èt qu'i r'cwèréve pôy si lontins. I lî d'manda s' min, so l' côp... Çandriyon ni rawårdéve qui çoula, come di djusse !...
A çou qu'on raconte, parèt'reût qu'i s'ont dèdja marié li djoû d'après...
Mer 24 Fév - 16:07