Lucyin Gaspar

http://wa.wikipedia.org/wiki/L._Gaspar

Lu cadô do Pére Noyé

Conte d' Elge dont la traduction a été faite par Maggy Marenne de la copin’rîe de Bastogne.

A Bètléyem , gn-a câzi deûs mèye ans,
Cwand ènn-on stâve, Jésus a v'ni â monde,
André Noyé, onk k' èsteût payisan,
Avou treûs vatches d' après çou k' on raconte,
Gn-out dès bièrdjis, tot dreût k' il oyint dîre
Po l' adorer k' atindint dès croupèts
Pwis avou d' l' ôr, du l' ancans èt do myrrhe,
Dès mages vunint d' Orient a l' èsprès.
Lu père Noyé, tot lès vèyant o s' coûr,
Su d'manda bin, sont-is fous cès djins la ?
Apwèrter d' l' ôr a on gamin d' cwinze djoûrs,
C' èst dès djowèts k' i fât po ci djône la !
Et lu, Noyé, k’ i n' âreût dja adon,
Sutou come oûy, atchter â magasin
Lès bês djowèts k’ on veût ozès rêyons,
Décida d' fé one surprise â gamin.
Foûs d' on-ârmâ, i sètcha dès clicotes,
Dès rodjes, dès bleûses, dès djènes, dès cèsses a fleûrs,
Lès ravôtcha, pwis lès ranokant totes
Fit on nounours ruglatihant d' coleûr :
- Volà Jésus. Dju t' apwètes on cadô
C' è-st-on tintin, mès qui ravisse on-oûrs.
Jésus, tot p'tit, n' èsteût nin dja loûrdô,
Nu l' polant fé, fusa djâzer l' nounours :
- Po dîre lu veûr, Noyé, t' è-st-on brave ome,
Et tu cadô ki vint do fond do coûr,
Mu fêt pinser k' i m' fârè on bonome
K’ îrè so l' tère, a Noyé, fé on toûr,
Po-z-î pwèrter dès cadôs, dès djowèts.
Dîre azès djins ku dj' aveû v'ni on djoûr,
Po d'ner d’ l' èspwèr a cès k' ènnè volèt,
Po ku l' Noyé seûhe one fièsse du l' AMOUR.

ELGE (Lucien Gaspar)