Les batlîs
Èl canêl n'astoût nén foûrt lon d' l’ opitâl èt il arivoût tîl coup què les mèd'cins astin' aplès pou dalér sognî les batlîs.
Èç' coup la, c'ît pou 'ne feume qui couminchout ses môs su l' batia èt qui voloût acoûchi a l’ opitâl. L'ambulance s’ è va avè l' tchôfeû, l’ infirmiêre, in.n-ambulancièr, in mèd'cin èyèt mi.
« Allez, viens, tu donneras un coup d' main. »
Quand on-è-st-arivè. i-n-avoût 'ne plantche pou monter su in preumî batia èt i faloût passèr su in deûsième èyèt l' batia qu'o d'voût dalér dssus, c'ît l' twosième; co eûreûs, c'ît in plin djoû paç' qu’i djèloût èt qu'i fèyoût ridant.
Dju n' sé nén si vos-avez d'dja sti su in batia du canal, mes i-n-a wére dè place dins l' cabine èt i fét stwat pou rintrèr; ça fét qu' mi, o m'a lèyi a l'uch in trin d' triyanér d' fwod avè l' futur père qui triyanoût co pus qu' mi tèlmint qu'il-avoût peû. Dju n’avoû vrémint nen l’ér foûrt malèn, tout vèrt dè fwod dins l' vint d' bîje, mès co eûreûs, ça n'a nèn trin.nè; o-n-a tout d' chûte intindu l'èfant beûlér come in pièrdu. L'eûreûs père m'a d'né du bètch tèl'mint qu’il-it contint. Dju n'é seû l’ rastèni èt il-a broki dins l' cabine pou contamplér s' chè deûve.
Èt adon, dj'é vu vûdî du cu l'ambulancier qu'avoût byin des rûjes pou fè passer l’ civière pô ptit uch: i satchoût èyèt l' tchôfeu bouroût a l'ôte costè dèl civière; ça n'est nén éjîle dè fè passér l'èfant pal bawète dayu ç' qu'i dwot vûdi, mès ça a sti t't-ossi maléjîle de fè vûdi l' mouman pô ptit uch dèl cabine! Après, c'èst l'infirmière qu'a chû, fière come potière, avè l' poûpa qui n' breyout d'dja pus dins sès bras; après, ça a stî l' mèd'cin qui n'avoût nèn fét grand choûse èt qui tnoût in grand plat dins ses mins. Èt pou fini, o-n-a vu vûdî èl père contint come in bossu qu'a pièrdu s' bosse, qui t'noût 'ne bou-teye dè pèkèt dins s' min èt qui voloût dè donèr a tout l' monde. Mès o lî a spliqui qu'o n' povoût nén bwore an sèrvice.
Èyèt mi, dins tout ça? Èl mèd'cin a yeû rade fét dè stitchî dins mès mins èl grand plat avè l'ariêre fin tout mouftas’ dèdins; paç' qu'i parèt qu'o dwot vèrifyî s'il-è-st-intiêr.
- Tiens, prends ça, comme ça t'auras l'air de faire quelque chose et n'oublie pas de le vérifier en rentrant!
O-n-a r'travèrsè lès deûs batias; o-n-a r'passè su lès plantches come dès mô bèle ér avè tous lès bat'lîs qui nos r'wétin' an s' foutant d' nous. Ç'astoût vrémint in bia cortéje! Èl civiêre avè lès deus poûrteûs, l'infirmiêre fèle come Artaban avè l' pètit éfant, èl mèd'cin qui n'avoût chèrvi a rén èt pou fini, d'avoût co yun qui n'avoût chèrvi a rén du tout nè rén èt qu'avoût l'ér pus bièsse què sês pîds avè in grand plat tout blanc qu'i t'noût précieûs'mint pa d'vant li pou n' nén l'èrvièrsî.
I n' d'avoût qu'yun qui manquoût, c'ît l'eûreûs père: après ène angouche parèye pa du fwod tans parèy, il-avoût dandji d'yèsse sogni ètou èt lès bat'lîs ès d'ocupin' in vûdant avè li èl fameûse boutèye dè pèkèt ....
Jeu 11 Juin - 16:06