Louis Remacle

Fleûr du sondje

Lu wihète ku dj'êma l' prumîre
aveût dès grands-ûs d' vintche flouri,
dès grands-ûs d' bouneûr èt d' loumîre...
Dju n' l'a nin roûvyi.

Lu wihète ku dj'êma 1' prumîre,
à l' nut', vunéve télefi sondji
èmé lès bwès, so lès brouwîres...
Dju n' l'a nin roûvyi.

Lu wihète ku dj'êma l' prumîre,
cwand dj' m'abahéve po l' rabrèssi,
cloyéve à mitant sès pâpîres...
Dju n' l'a nin roûvyi.

Lu wihète ku dj'êma l' prumîre,
asteûre, è-st-èvôye, èrî d' mi,
bin Ion, so lès têres ètrandjîres...
Dju n' l'a nin roûvyi.

Lu grande vèye

On n'è nin tot seû è l' grande vèye :
on c'not treûs djins so treûs cint mèye ;
on nn'a dès novèles cwand sont mwêrts.

Lès clokes sonèt sins k'on lès-ôye.
On bahe lu tièsse ; on rote su vôye,
come dès frumih, oute lès trotwêrs.

Lu long dès murs sins fin, wice va-dj' ?
Fât-i cori come on sâvadje
po heûre l'anôye ku dj'a so l' cwêr ?

Nu live nin l' tièsse : è lu spèheûr,
è l' plèce dès steûles, on veût dès fleûrs,
lès neûrès fleûrs do dézèspwêr.