Bernard Louis

http://wa.wikipedia.org/wiki/B._Louis

On drole di complumint

L’iviêr a tchwèsi l’ nêt dè l’ novèl an po nos-ayèssî comufaut. Dè l’ djaléye, à blame ! Li wârglas avau lès vôyes. Mâria Dèyi ! Lès quénès rûses po riv’nu d’èwou qu’ nos-avans sîzelé matènes (passé le réveillon) !
Aviè lès onze eûres, Raymond d’tchind au bolèdjî. Pate à pate, sésˊ, valèt ! Faureut nin qu’ ti toumereus po strumer (ètrenner) l’anéye.
Pad’vant l’ botique, li Frasîye d’èmon l’ Blanc. One coriante (coriace) cit’lale. Ѐlle aurè sès quatrè-vingts au fènaumwès (mois de juin), si djè l’ tin bin. Ѐl faut veûy roter pontieûsemint (avec mille précautions) avou s’ satchîye (sac rempli) dins sès brès.
— ’Djoû. ’L’a d’dja faît pus tchôd qu’on n’aleut nin bagnî.
— Non, ô vos qu’on n’ va nin d’meurer sins mougnî.
Frasîye aureut dandjî di s’ fé ostèyî. Si fèye li tane tofêr avou ça. Mins on-aparèy padrî s’-t-orèye, vèyoz, èlle in.me ostant pont. On-z-èst frikète (coquette), là, one saquî.
Raymond a s’ song qui c’mince à boûre.
—Nom d’ tot-oute ! Todi l’ min.me djeu avou l’ vîye caramèl, qu’èle mi faît mau causer. Stornéye come one bwache.
— Dji veu qu’ vos-orèyes sont-st-èdjaléyes.
— Comint d’djoz ?
— Dji di : vos-orèyes sont-st-èdjaléyes.
— Mèrci m’ fi. Ѐt vos parèlièmint.

Bernard Louis