Jean Rathmès

https://wa.wikipedia.org/wiki/Jean_Rathm%C3%A8s


Etér'mint

Piére, acropou so 'ne basse tchèyîre,
tot foumant 'ne pipe si r'hape ine gote.
Si feume Catrène qu'a-st-aponti
si neûre calote, si blanke tchimîhe,
si noû pal'tot, sès fins solés,
ricwîre à l' vole
on boton d' col
è l' bwète âs clâs
qu'èst so l' djîvâ.
Piére, acropou so 'ne basse tchèyîre,
si r'hape ine gote di Magârni,
li pus deûre tèye dè beûr Marîye.
Èt s' feume Catrène, po l' blanke tchimîhe,
ricwîre à l' vole
on boton d' col
è l' bwète âs clâs
qu'èst so l' djîvâ.
Èle lî a dit qwand 'l a rintré
di s' deûre djoûrnêye à Magârni :
« Pusqui v's-alez à l'ètér'mint
d'à Célèstin, vosse mêste-ovrî,
dj'a-st-aponti vosse neûre calote,
vosse blanke tchimîhe, vos fins solés
èt dj' cwîre à l' vole
on boton d' col
è l' bwète âs clâs
qu'èst so l' djîvâ ».

Piére, acropou so 'ne basse tchèyîre,
a rèspondou à s' feume Catrène :
« Rawâde ine gote qui dj' foume mi pipe !
Li mête-ovrî m'a-st-aminé
so Magârni po m' fé crèver;
èt l' mâhêtî, so Magârni,
m'a v'nou cwârer lès djoûs passés.
À l'ètér'mint d'à Célèstin,
fât qu' dji halcote :
dji beûrè 'ne gote
èt pwis co 'ne gote
èt gote so gote...
Done-mu m' calote
èt m' blanke tchimîhe,
mi noû pal'tot, mès fins salés
èt s' cwîre à l' vole
on boton d' col
è l' bwète âs clâs
qu'èst so l' djîvâ !... »

Basse-Mar'hâye

Li clârté qui monte a disminti l' nut';
c'èst l' djoû qui dit l' vrêye.

Çou qu' nos-avis pris po dès djeûs d' tchandèles so l’âté dè cir
n'èsteût qu' dès loumîres dizeû lès-ovreûs.

Wice qu'i n'aveût rin, volà dès mohones
è hô d' leû porotche.

Li stindêye èst grise là qu'on l' ratindéve
avou mèye coleûrs;
là qu'on ratindéve on cîr disgadjî,
lès tch'minêyes plakèt dès tètches di foumîre.

I fêt pèneûs so lès-èrîves di Moûse.

Tot qwitant sès sondjes, à l' prumîre êreûre,
l'orne a d'vou roter.
Pidjote à midjote, i droûve sès deûs-oûy !
i k'mince à s' rik'nohe, i k'mince à s' rimète.
I s’arèstêye tot-èwaré d’èsse dèdja là.

I s’ ritoûne èt i louke so valêye
I louke tote li stindêye qui foume èt qui brazih
I louke si dèstinêye
Si dèstinêye qui s’alouw’rè come on hazin s’alowe.

Dizos lès wagonèts qui s' pôrminèt
à l' lôy'minôye divins lès-êrs,
i-n-a l'acîr qu'on aprustêye à fonde,
l'acîr qu'on coule, qu'on toûne
po fé dès-obus, dès canons,
Pater qui hagne èt qui k'hèye.

I-n-a l'acîr qui towe.

Et l'ome s'èmonte disconte dè l' mècanique,
pace qui c'est l' mècanique qui l'a marqué.
C'est l' mècanique qui l'a-st-atch'té.
I fât qu'i moûre por lèye.

I lî deût ça, l' pôve hére, il lî deût ça !

Por lu,
i n'a pus noie louweûr d'èspwér
è cîr qu'i n' wèz'reût pus loukî sins s' rissov'ni d' sès sondjes.
I s' rimèt' à roter.
I d'hind on pazê inte deûs hourêyes.
I d'hind de minme pas qu'il a monté, londjinn'mint,
èt todi londjinn'mint, i qwite li banne de cîr.

----
Divins l' grosse antolodjeye Piron pp. 542-546
https://wa.wikipedia.org/wiki/Grosse_antolodjeye_Piron