Bernard Cuvelier

I fwét tchôt

C'èsteut in djou qu'i f'jeut tchôd. Lès djon.nes du Prèsgaux n'savént né qwè fwére, is-avént l'flème.

Djosèf dit: « On ireut bén trôlér ô stôle. Drola on n'cach'ra né après nous. » Et rouf-rouf v'la nos djon.nes an route. I fwét tchôd.

L'pètit Jean dit: « On-ireut bén p'ôs pachis, on pas'ra pa l'voyète du Ri Capiô ». I-avént ène saquè padri leû tièsse.

V'la nos djon.nes arivès, i fwét tchôd. L'uche du stôle è-st-ô lôdje, i gn-a qu'a rintrér.

Droci, i gn'a d'l'ombe èt on s'crwèreut dins l'cavèrne d'Ali-Baba. Dès bacs de bière, qué miraque ! Èt né co dèl bibine ! Més del trapisse dè Scourmont !

Albert qui n'a né freud a sès-is : « Si on ouvreut ène boutêye? » Alèz, yeune, deûs, trwès, chaquin. Et i fwét si tchôd. V'la leû tièsse qui toûne. Is èstént sôs, is avént l'licote.

René qu'a toudis dès tas d'cacâyes dins sès poches: « R'wétèz, v'la dès pètârds a mètche èt dès aleumètes, on va rire. » I tchaque ène aleumète èt « Boum ! » in pètârd qui squète.

Lès galopias riyént èt « Boum ! » un deûzième pètârd fwét volér ène boutêye a boquèts.

Aveu trwès, ça tchôfe, hén, l'solia. Ça n'èsteut pus lès pètârds qui pètént, c'èsteut leûs tièsses.

Gustave, li, n'aveut co ré fwét. I prind ène boutêye èt l'pète ô mûr: Et lès galopias riént plin leû boudène. Més pus pou lontins.

Né km dè d'la, Irma, aveu s'tièsse dè djèra tourmintè, r'wéteut nos lascars qui, leûs fèrdènes finiyes, ont stè s'achir su lès marches dè l'èglîje.

L'land'mwin, a l'escole, èle mamzele les ratind et leû passe yun d'ces savons ! « L'djèra tourmintè » aveut canl'tè !

Nos quèt'los n'èstént né fiers. Is-èstént roûdjes, né d'tchôd més d'onte.

El petit Jean, i n'èsteut né roûdje, i steut jône de peû, i l-aveut ôsse. Ses djambes triyanént come des pouplis. I gn-a qu'pichi dins ses marones qu'i n'a né fwét !

Et ç'côp-ci, i faleut payi les pots squètès. I n'én-n'aveut né pou in p'tit côp. Lea mamzèle leus-a apresté ène afwére et qué-n-afwére : vint verbes a tous les tins.

Et qué ratournêye de leû popa!

Tout ça pou vos dîre que, quand i fwét tchôd, perdez vos clics et vos clacs et vos alez al l'chavée.

C'n-istwere-ci n'a né 'sti invantée. On vos l'asseûre, c'e-st-arivé an 1969 a des gamins du Prèsgaux qu'avént tchôd.

Bernard CUVELIER

(Mondjan)